Айылҕа ханна да кэрэ

12 мая, 2014 в 0:44

Аһара уһуннук өрөтөөрү гыннылар диэн өрүтэ тыыммытым олох да биллибэккэ ааста.

Миэнэ мэлдьи биир – саайты сарсыарда саҥардааһын, эрдэни баттаһа айа түһээһин, күнүс атын суруйуулары өтүүктээһин, туох эмэ солуута да суоҕу сонун гына охсооһун. Эмиэ да күн аайы үлэ, эмиэ да устуул сылытар үлэ буолбатаҕын иһин, күнүн аайы көҥүлбүн.

Өрөбүлбэр, хата, айылҕаҕа тахса сылдьан астыныы бөҕөтө. Ыллым да ойуурга баран хаалар идэлээҕим, манна оннук сатаммат. Бииринэн – ыраах, иккиһинэн – ийэм бобор. Барарын барааччыбын да, бу диэки киһитэ-сүөһүтэ суох мастаах-оттоох сири булар уустук. Ханна да тиий — куорат тыаһа-ууһа бу турар.

Оннук ойдом сир баарын биир атаһым биллэрдэ. Сирдээн илдьэн чэччиттэ, чэбдигиртэ. Ол диэки соҕотоҕун сылдьан санаатын сааһылыыр, өйүн босхолуур идэлээх үһү. Мин кинини киһи киһитэ диэн билэрим. Төттөрүтүн, соҕотохсуйарыттан муҥатыйар буолара. Айылҕаҕа тахсан атаспын атын өттүттэн арыйдаҕым үһү.

Ону даҕаны уора-көстө хомунан, уҥа-хаҥас албыннаан барбыппыт. Эчикийэ, туох эрэ диэхтэрэ, туохха эрэ уорбалыахтара диэн. Дьүөгэлэр оннуларыттан хоҥнон бэрт. Кини эрэ куруук улгум. Кинилиин ойуурга буолуохтааҕар, ханна да сылдьар астык. Кэпсээнэ кэмэ суох, күлэртэн соло булбаппын. Ыллаан кытта саататар.

Бу сырыыга киһим кэпсээнэ кэмчи. Кыһыны быһа кыынньыбыппытын кыйдыырбытын мэһэйдэспэппит. Ньургуһун онон-манан эрэ тыллыбыт. Тымныыта диэн сүр. Уу күөйэн, ырааҕынан эргийэн мырааны буллубут.

Харах хатыыр хас көстүүнү, сүрэх түүйэр үтүө үгэни. Саас. Эмиэ саас.

Налыйан-наскыйан сытарбын атаһым хаартыскаҕа хатаата. Онтум аан дойдуга тута айаннаата. Ватсап.

Ньургуһун араҕаһын атыҥырыы да көрдөрбүт, айылҕа ханна да кэрэ, чуумпу кэрэ манна да күндү.

Күөх ньургуһуну көрбөтөх ыраатта. От үрэх төрдүгэр балыктаабатах быданнаата. Дойдум сааһын ахтыбытым ааспата.

 

 

 

12 мая, 2014 Главные новости

Добавить комментарий

*