Арыгы туһунан

19 июня, 2015 в 2:06
images

Чем хуже дела у власти, тем активнее она спаивает народ. Трезвый человек, человек разумный, думающий, опасен для горя-руководителей.

Ф.Углов.

Сүүрбэччэ сыллааҕыта Федор Углов «Из плена иллюзий» диэн кинигэтин аахпытым.

Кини хирург быраас, чөл олоҕу тутуһар. 104 сааһыгар уустук эпэрээссийэни оҥорбута. Илиитэ олох салҕалаабатын киһи сөҕөр.

Ол кинигэтигэр кини хомойон суруйбутун санаан кэлэбин. Талааннаах баҕайы эдэр хирурдар медицинскэй испиири иһэ сылдьан үлэттэн, олохтон эрдэ туораабыттарын туһунан. Араспаанньаларын уларыттым диэбитэ.

Ол саҕана Углову тэлэбиисэргэ киэҥник сырдаппатахтара. Тоҕо?! Алкоголь эрэкэлээмэтэ бөҕө сабардаабыт кэмэ этэ. Пиибэ – алкоголь буолбатах диэн. Оннооҕор «Детское шампанское» диэн баара. Билигин баара дуу, суоҕа дуу, билбэтим. Оҕону-дьахтары, эдэр ыччаты арыгыһыт гынан баран, Россияҕа дьэ өйдөнөн рекламаны аҕыйаттылар курдук. Ол эрэн сорох киинэлэргэ үрүүмкэлэрин тута сылдьаллар.

Ааспыт үйэ 90-с сылларыгар Ленин болуоссата ыччат арыгылыыр сиригэр кубулуйбута. Ааһан иһэн киһи олорор, сынньанар кыаҕа суоҕа. Кыргыттар куурусса курдук ыскамыайка көхсүгэр пиибэ тутуурдаах олороллор. «Бөтүүктэрэ» иннилэригэр тураллара. Хата, кэлин өйөнөрө суох ыскамыайкалары оҥорон абыраабыттара.

Билигин ыччат өйдөммүт курдук, киһи үөрэр. Мин үс дьүөгэлэрим үбүлүөйдэригэр сырыттым да, итириги көрбөтүм. Остуолга бытыылкалар бааллар да, кими да сыҥалаабаттар. Сорох ыччаттар олох да испэттэр быһыылаах. Урут тыаҕа «тааһы эрэ ордорон тас гыннарыҥ» диэн туос көтөҕөллөр этэ.

Мин иккис кыһыммын атын сиргэ көһөммүн кыстаан эрэбин. Урут түүннэри үлэлиир улахан маҕаһыын аттыгар олорбутум. Анаан да манаабатарбын, түннүгүм анныгар айдааралларын арыт көрөөччүбүн. Күлсүү-салсыы, үөхсүү, ытаһыы-соҥоһуу, охсуһуу барыта баара. Мин ордук кэлэйэрим, эдэр дьахталлартан. Сорохтор сатыы, сорохтор массыынанан тиэстэллэр. Үксэ сахалар. Өссө биһиги дьиэбит анныгар эдэр киһи өлүгүн булбут этилэр. Арыгы атыыта хааччахтаммыта үчүгэй. Ылбыттарын иһэн баран утуйдуннар ээ. Өссө олох да испэттэрэ буоллар.

Таарыччы, биир охсуһууну көрбүппүн кэпсиим. Икки миэтэрэттэн ордук уҥуохтаах нуучча уола баар этэ. Быһаҕаһын саҕа саха уолун көтөҕөн ыла-ыла тас уорҕатынан тамныыр. Биирэ да хадаар. Холуочук буоллаҕа. Туран кэлэ-кэлэ киирсэн иһэр. Ол нуучча уола кэлин түбэспит үһү, тугу гыммыта буолла? Саха кыыһа ойоҕор оҕолоох үһү. Маҕаһыын таһыгар атыылыыр эмээхситтэр кэпсэтэллэрин испитибитим.

Билигин араас кэнсиэр, спорт күрэхтэһиитэ бөҕө буолар. Дьон сынньалаҥын тэрийэ сатыыллар. Эдьиий Дора саха норуота арыгыны испэт кэмэ кэлиэҕэ диэбитэ.

В.Васильева, үлэ, тыыл бэтэрээнэ, Дьокуускай.

19 июня, 2015 Главные новости

Добавить комментарий

*