Барыта биир

21 октября, 2014 в 6:13
IMG_20141021_120905

Уоскуйдубут, уһун кыһыҥҥы киэпкэ сөп түбэстибит. Мичээр кэтэн, үтүө долгуҥҥа олорсон хас күнү олоро сатаатахха, барыта кэрэ эбээт.

Ким тугу этэринэн, сүүс сүбэни барытын ылынан олордоххо, куруук куттал, кутурҕан курдуу кууһуо. Букатын бүтэйэн, бэйэ иннин көрүнэн сырыттахха, кыһалҕа кыра.

Биир билэр дьахтарбын көрсө түһэн, ону-маны кэпсэттэҕэ буоллум. Туох сонун кэлиэй, барыта биир, күһүн ыраатта эрээри, хаар суох. Онтон эмискэ: «Эбола диэн эрэй арай суоһуур». “Тугуй ол?” – диэн киһим соһутта даҕаны, бэйэтэ эмиэ соһуйда. “Эс, хайдах, тэлэбииһэри көрбөккүн дуо?”. “Ээ, соло суох”. Кини киһи тэлэбииһэрэ суох сатаммат буолара. Арба, кини НВК-ны эрэ билинэр этэ дуу. Онтон өй ылан, ээ, чуумка турбут үһү дииллэрэ диэн баран иҥиэттэн кэбистэ.

Чуумка буолан, ыт ыарыытыгар дылы. Мин анаан лиэксийэ ааҕа барбатым, соло да суох. Сонун тиһэн килиэптээн сиир ааттаах, син онтон-мантан ойо тардан истибитэ-билбитэ буолар инибин. Хаһан эрэ Эмиэрикэҕэ игирэ башнялар эстибиттэрин мин эрэ билбэккэ сылдьыбыттааҕым. Эмиэ даҕаны кыыстанан баран, акушеркаттан: «Саддам Хусейн сэриинэн түспэтэ дуо?» — диэн ыйыппыппар өйдөөбөтөхтүү көрбүттээҕэ.
Сонуну тиһэн туһа суох. Сонун биир – интэриниэт иһинэн эргийэ сатаан баран, хаһыаттан хаһыакка хатайданар. Сонно тута эргэрэр. Ол иһин атынынан эргитэн, бэҕэһээҥҥини бүгүҥҥү гынан эрдэхпит. Дьиҥ иһинэн, барыта биир. Бэҕэһээ бүгүнтэн улаханнык уратыласпат курдук.

Венера ПЕТРОВА

21 октября, 2014 Главные новости

Добавить комментарий

*