Батас сытыы!

14 июня, 2015 в 10:00
БАТАС

Уххан, В.Габышева, С.Татаринов, «Батас» кэмитиэт суруналыыстарын суруйууларын хос сөргүтэн үргэҥнэтээһин  барда. СӨ-тин борокуратууратын үлэһиттэрэ таһымнара намыһаҕынан кыайан көрбөттөхтөрүн, ИДЬМ ылсарга сананна диэх курдук. Итини, тоҕо эрэ, «Батас» суруналыыстарын уохтарын уҕарыта, туруоруммут соругун туормастаһа сатаан, үөһэттэн сорудах курдук ылынабын.

Тэлэбиисэринэн «Белая стрела», «Меч» диэн уодаһыннаах ороспуойдары      суох оҥорорго      дьон бөлөх тэринэн, былаастартан кистээн, саа-сэп уоҕун туһанан,    охсуһалларын киинэ гынан көрдөрөллөр. Төһө да баҕа санаа буолтун иһин, сөбүлээн астына көрөбүн. Кырдьыга буоллар.

Дьон бөҕөнү сүһүрдэн, харчы туһугар кими да өлөрөллөрүн кэрэйбэт, сыал-сорук оҥостон буруйу оҥорооччулар, хараҥа дьыалалара арыллан, сууттанан, муҥутаан олохторун устата хаайылларга ууруллуохтара. Киһини өлөрөртөн аһыныы (гуманизм) бэлиитикэтэ тутуһуллар. Сымыйа, хараҕы баайыы бэлиитикэтэ ити буолар. Ону кимнээх соҥнуулларый? Арҕаа, Арассыыйаны утары санаалаах дойдулар күһэйэллэр диэххэ сөп. Тоҕото биллэр.

Киһини  аһымматаҕы,  эмиэ аһыныллыа суохтаах. Өлөрүөхсүт тугунан ордук буолан аһыныллыахтааҕый? Өлөрбүт киһитин аймахтара нолуогунан төлөһөр харчыларыгар аһыы-таҥна, киһи бырааптаах сылдьыахтааҕый? Айыы Тойон айааччы этэринэн, Аан ийэ дойдуга өлөрүүтэн — өлөрүү аньыыттан — аньыыта сорунан оҥостон туран өйү өһөрүү. Оннук аньыыны оҥорбут аньыытын уораҕайыгар барыахтаах. Сууттаатах буолан имэриспэттэрин-томоруспаттарын, харчыны хамсаппаттарын туһугар, судургутук быһаарар кыах баар диэн көрдөрөллөр быһыылаах.

Ити кыбырыттан баран, кэпсиирим — үтүөҕэ тардыһыы. Ол тугуй диэххит. «Белая стрела», «Меч» бөлөх дьонун курдук нэһилиэнньэ олоҕун айгыраппат, уоруу, түөкүннээһин, ньымааттаһыы о.д.а. олоххо хараҥа дьайыылар быһаарар күүс буолбаттарын утары охсуһа, тоҥ буордаах олоҥхобут сирин чулуу дьоно бөлөх тэриммиттэр. Сэп-сэбиргэл илиилэригэр ылан, дьайыыга дьайыынан хардарбакка, илбистээх тылынан охсуһа туруммуттар.

Саха билинэринэн Орто бараан дойдуга тылтан күүстээх суох. Тыл киһини кыһи, омугу омук оҥорбута. Тыл — өрөгөйдөөх, эбэтэр өһөрөрдөөх, киһи аймах өйүн, улуу сэбэ. Онон сэбилэнэн, сытыытык этэллэригэр-тыыналларыгар дьүөрэлии тутан, бөлөхтөрүн аатын «Батас» диэбиттэр.   Толору өйдөбүллээх ааттара, ньымааттаһыыны (коррупция) утары охсуһар кэмитиэт. Дьулуһар   дьайар соруктарын (манифест) ылынан, нэһилиэнньэҕэ иһитиннэрдилэр. Сүрүн тэрийэр сомоҕоҕо, урукуттан да, бар дьону утары оҥоһуллар хараҥа дьайыылары арыйан,   хаһыаттарга кырдьыгынан  суруйан нэһилиэнньэ билиитигэр тиэрдибит  суруналыыстар.

Ааттарын биирдии ааттаталаабаппын, ааттарын өссө чаҕылҕайдык иһитиннэриэхтэрэ диэн,  суруйууларын болҕойон, көтүппэккэ ааҕар буолан, кинилэргэ бүк эрэнэбин.

«Батас» үлэтэ үлүгэр элбэх буолуон сэрэйэбин уонна суолтата сүдү улахан. Урут да, билигин да СӨ-тин салайар тэрилтэлэр сололоохторо, барылара диэбэккэ, сорохторо дууһаларын манньыттаралларыттан, ытыстарын сылыттарартан аккаастамматтарын туоһута үтүгэн соҕус.

Холобур, ааспыттан бүгүҥҥүгэ  сөргүтэн таһаарбыттарынан В.Доржиев холуобунай дьыалата көрүллүүтэ буолар. Бу киһи  Дьокуускайдааҕы үүт собуотун баһылаан-көһүлээн олорон, мээр солбуйааччытынан ананан үлээбитэ. Олбоҕо халбарыҥныах курдук буолбутугар солотун үрдэтэн, СӨ-тин Баайга-дуолга уонна сиргэ сыһыаннаһыы миниистирин солбуйааччытынан анаабыттара.  Хайҕалга сылдьар хаарыаннаах үлэһит, дойдутугар Бүрээттэр өрөспүүбүлүкэтин Судаарыстыбаннай Сүбэлэригэр дьокутаатынан талыллан баран хаалбыта.

В.Доржиев биир сөбүлэһиилээҕэ (партнер) «Крытый рынок» тутууларын бас билиигэ өлүүлэһиилэригэр мыынан үҥсүбэтэҕэ буоллар, саха омукка үйэлэргэ үтүө киһинэн, өрөспүүбүлүкэни өйөспүт хаһаайыстыбанньыгынан харыстыы ааттана сылдьыахтааҕа,

Ити, алҕаска биллэн хаалбыт иликичитии-үлүкүчүтүү-түлүкүчүтүү. Төһөлөөх үтүө тутуулар приватизацияланар, аахсыйаланар аатыраннар буор босхо ыһыскайданнылар этэй? Өрөспүүбүлүкэ хааһынатыттан ыскайдааһын диэххэ сөп, оттон ылсыы-бэрсии илии охсуһуута сыһыарыылаах буолбута саарбахтаммат. Ону көбүтэн көрүөхтэрин син этэ эрээри, суолларын-иистэрин сууйан-сотон килэбэчиччи ыраастаатахтара. Оччолорго докумуоннары харалтаҕа туттарыы (архив), суот-учуот оччуотуттан ураты, олус ирдэммэтэ. Туттарыллыбыт суруйсуулар даҕаны, уурар сир кэмчитинэн болдьохтоох биэс сыл ааспытынан үөрэ-көтө халлааҥҥа көтүттэхтэрэ.

Иккиһинэн, үлэлэрин хоруупсуйанан салайтарбыт сололоохтору батастар арыйан суруйан хаһыатынан, интернетинэн тарҕатан бардахтарына, ньымааттаһыы баҕата намырыан сөп.

Ол эрээри, хоруупсуйаны утары үлэлиэхтээх тэриллиилэр, бырабыыталыстыба «Батас» тэриллибитин олус айхаллаабат быһыылаахтар. Тоҕо оруо-маһы ортотунан сабаҕалыыбыный? Быһаарыым.

СӨ-тин ИДьМ-тэ «Батас» кэккэтигэр туруммут суруналыыстар урукку суруйууларын, дьэ өйдөнөн, олус баһыылаах (экстремизм) суруйуулар эбит диэн ирдэһэр үлэни саҕалаабыттар. Ордук чорботон Уххан туһунан аҕыйах тылы этиим.

Николаев Иван Николаевич саха омук кэлэр көлүөнэлэринэн аата ааттаныаҕа. Ама да буолтун иһин, штыровтар, борисовтар хамаандалара үйэлэргэ бас буолан олорботтор ини. Итини эмиэ халлаантан ылан эппэтим. Мин иннибэр И.Н.Николаев — Уххан соторутааҕыта тахсыбыт «Кэм суолунан» уонна «Республика распродана..» дэммит СӨ-тин икки судаарыстыбаннай тылларынан тахсыбыт кинигэтэ сытар. Уххан бу кинигэтин ХИФУ исписэлиисэригэр чинчийтэрэ биэрбиттэр, «улуу» үөрэхтээхтэр кутталаах кинигэ  диэн түмүк оҥорбуттарын туһунан иһитиннэрии тахсыбыта.

 

И.Николаев – Уххан «Аллах над Якутией» диэн суруйууну интернеккэ бэйэтин сайтыгар таһаартарбытын иһин, Дьокуускай куорат мээрэ А.Н.Николаев, оччолорго бэрисидьиэн уонна бырабыытылыстыба дьыалаларын сааһылыыр тойон этэ,  Штыровка бэрт буолан, суукка үҥсүбүтүнэн, толоругас сокуонньуктар элбэхтик Ухханы эрэйдээбиттэрэ биллэр. Көмүскээччэри соболоҥноһоругар да кырата суох ороскуотурдаҕа.

Штыров В.А. хамаандата Ухханы сойуолаһыыта өрөспүүбүлүкэ борокуруора А.А.Подласенко маннык суругунан түмүктэммит: «В соответствии с ч.1 ст.136 УПК РФ извинение от имени государства приношу Вам официальное извинение за причиненный вред в результате законного уголовного преследования.» Сойуолаһыы РФ борокуратуурата орооһооһунунан тохтотуллубута. Кырдьык уонна дьиҥнээх, тутулуга суох суут-сокуон үлэһиттэрдээхпит буоллар ШВА, БЕА, НАС  холуобунай эппиэккэ тадылыахтаах этилэр. Үҥсүү суох диэхтэрин сөп да, «прокурорская проверка» диэн эмиэ баар. Өрөспүүбүлүкэ олохтоохторун утары үлэлэрэ, ону ааһан сымыйанан баайсан суукка үҥсээһиннэрэ, хобулааһыннара  дөкүмүөннэринэн бигэргэтиллибиттэрэ баар.

Уххан, В.Габышева, С.Татаринов, «Батас» кэмитиэт суруналыыстарын суруйууларын хос сөргүтэн үргэҥнэтээһин  барда. СӨ-тин борокуратууратын үлэһиттэрэ таһымнара намыһаҕынан кыайан көрбөттөхтөрүн, ИДЬМ ылсарга сананна диэх курдук. Итини, тоҕо эрэ, «Батас» суруналыыстарын уохтарын уҕарыта, туруоруммут соругун туормастаһа сатаан, үөһэттэн сорудах курдук ылынабын.

Сыыстарбыт буолларбын ханнык. Сабаҕалыырым кырдьык буоллаҕына, СӨ-тин үрдүкү сололоохторугар хоруупсуйа хоннохторун анныгар киирбит диэн өрөспүүбүлүкэ аатын суолун түһэрэр олус куһаҕан түмүк буолан тахсар.

Ытыктабыллаах саха хорсун суруналыыстара, суобаһы атыылааһыны суох оҥорсорго туруммуккутун уруйдаан туран, тускуллаах соруккутун ситиһэргитигэр Аар Айыы Тойон арчылаан көмөлөстүн, күүскүтүгэр эрчим эпсистин!  Дом! Дом! Дом!

Уһук УЙБААН.

 

 

14 июня, 2015 Главные новости Новость дня

Добавить комментарий

*