Биир хочолуокка симиллибит артыыстар

25 июня, 2015 в 1:54
images (2)

Оҕо сылдьан көрбүт киинэлэрим ааттарын, хас артыыс хайдах туттан оонньообутун ымпыгар-чымпыгар тиийэ билэр этибит.

Киинэни нэдиэлэҕэ үстэ оҕолорго диэн көрдөрөллөрө. Дьэ, онно бырааһынньыкка барар курдук оҥостуу, эрдэ тиийэн миэстэ уурааһына буолара. Бастакы үс эрээти мэлдьи эдьиийим котоку Натааһа бас билэрэ. Үчүгэй соҕус кэмпиэттээх буоллаххына, ол миэстэҕэ олорор чиэскэ тиксэҕин.

«Вий» диэн киинэ кэнниттэн дьиэбин нэһиилэ булан турабын. Хас баҕана, мас барыта абааһы курдук көстүөр диэри куттаммытым. Индийскэй киинэҕэ улахан соҕус болотуоктаах бараммыт анаан-минээн ытаһар этибит.

90-с сылларга тэлэбииһэргэ сериаллар көстөр буоллулар. «Богатые тоже плачут», «Просто Мария» эҥин. Эмээхситтэр ийэбэр киирэн кэпсэтиилэрэ ол эрэ туһунан. Куһаҕан Карлоһы мөҕүттэллэр, Маарыйаны аһыналлар.

Биирдэ Ньурбаттан видик диэни кулуупка көрдөрө кэллилэр. Сыаната да тос курдук – биирдии киинэ биэс уоннуу солкуобай. Көрбүтүм – сыанаҕа кыра баҕайы тэлэбииһэр турар, мыына санаатым. Туох эрэ кэмиэдьийэ көһүннэ быһыылаах. Син күллүбүт-үөрдүбүт. Онтон ужас холбоотулар. Дьэ, көрбүт онно саҕаланна – ким эрэ орулуур, ким эрэ дьон кэннигэр саһа сатаан ол мучумаана буолла.

Үһүс киинэбит порнуха диэтилэр, өссө сыаналаах диэн буолла. Оҕолору дьиэлэригэр утаартаатылар. Уонна саҕаланна эбээт, саха төрөөн баран көрбөтөх киинэтэ. Саала иһэ уу чуумпу, ким да тыыммат, хамсаабат даҕаны. Сотору буолан баран, инники эрээккэ олорбут кырдьаҕастарбыт куух-хаах, пахайбын даа диэн буолан-хаалан турдулар, онон киинэбит бүттэ.

Катикка диэн тулаайах дьахтар ыалы кэрийэн киинэнэн дьээбэлиир идэлээҕэ. Оччолорго «Кинг-Конг» саҥа көстүбүтэ. Биир ыалга киирэн чэй иһэ олорон кэпсиир – бүгүн били киинэбит салгыыта буолар, «Кинг-Конг жив и женился» диэн. Тахсан барбытын кэннэ дьиэлээх хаһаайын, кулуупка мээнэ сылдьыбат бэйэтэ, ол эбисийээнэ хайдах ойохтоммутун көрөөрү барар. Ол күн киинэ суох буолар. Катикка аҕыйах кэмҥэ ол ыалыгар сылдьыбат.

Дьэ, ол курдук кэлин сериалларбыт элбээн, билигин миэхэ киинэм артыыстара бары биир хочолуокка симиллэн сылдьаллар.

НӨНҮӨҺЭ.

25 июня, 2015 Главные новости

Добавить комментарий

*