Бит-билгэ туолар суолун муннара

27 ноября, 2014 в 4:09
2-1.2.Селл.Бит билгэ суолун муннара

“Арай түүн уһукта биэрбитим – хараҥаҕа кутуйах тугу эрэ кирэн хачыгыратыы бөҕө. Туох да сиэххэ айылаах аһаҕас сыппакка дылы этэ. Аччык дьыл кэлэрин биттэнэн, айаҕалыы сатаан, таҥаһы-сабы кирбитэ буолара дуу?
Күн бэҕэһээ биир тимир биэдэрэ баарын босхолоон, хамнас кэллэҕинэ куруппа хаһааныам диэн бэлэмнээбитим этэ. Ол биир биэдэрэнэн сылы тахсыах курдук. Дьүөгэбэр тыл быктарбыппын – Арассыыйаҕа хаһан олох чэпчээбитэй, сылы туораныллыа диэн уоскуппута».

Атын билгэһиттэр да киксиспит курдук биири этэллэр – кытаанах кэмнэр иһэллэр. Бэл, ол кутуйахпыт олору кытта куомуннастаҕа.

Оттон биһиэхэ биир биллэр – сотору Саҥа Дьыл. Аҕыйах сылтан бэттэх киин куораппытыгар ол бырааһынньыкпыт битэ инньэ икки ый инниттэн биллэр. Оҥоһуу харыйалар атыыга тахсыбыттара ыраатта. Уулуссаларга турбуттара быданнаата.

Бит битинэн, Саҥа Дьыллааҕы остуолбут, хаһан да буоларын курдук, биир-икки ыйдаах хамнас саҕа сыаналаныаҕа. Атын омуктар курдук биир сүрүн бүлүүдэнэн сөп буолбат дьоммут. Сылын аайы аатырбыт оливьены аҕыйах гына оҥоһуллуо диэн андаҕайабын да, хас эмэ хонукка холодильнигы иччилээн турбутун курдук турааччы.
Санкция санкциянан, сыбаайбалар буолуохтара, сылы быһа бырааһынньыктаан саайыахпыт. Ол биһиги Индийскэй акыйаан кытылыгар олорор омуктар курдук, муора биэрэгэр түөлбэлээн олорон дьааһыгынан пиибэни кирдиргэтээт үрэл гынан хаалар сыбаайбанан астыммат буоллахпыт. Биһиэнэ — ньиргиччи, олохтоохтук, өйдүү-саныы саныы сылдьар гына.

Ол буоллун – арҕааҥҥы «адьырҕаларга» биһиги, сахалар, хардабыт, бит-билгэ туолар суолун муннарар ньымабыт.

Венера ПЕТРОВА

27 ноября, 2014 Главные новости

Добавить комментарий

*