Бугун аьыыра суохха муеттээх да тыл эмп буолбат

15 апреля, 2014 в 8:48

Сибэтиэйдэр да уруккута дьоннор. Дьон дьону таҥараҕа холоон оннук солону бу сирдээҕи болдьохторо бүппүтүн кэннэ аныыллар. Киһиттэн эрэ ордуктук, тоттук олорбукка буолбатах.

Тоттуҥ да тойон оҕото дии үөрэммиппит да, тот тохтообот, баарынан сөп буолбат, хараҕа туохха да туолбат. Байар диэн бараммат дабаан, тохтообот айан. Баайынан өттөйүү кэмэ ааһа быһыытыйан, ол баайдарбыт дьону кытта дьон курдук олоробут, үлэлиибит дэтээри аны судургутуйа сатыыллар. Онтуларын быыһыгар аньыыларын соттороору үтүөнү оҥордоҕо буолаллар. Кэмин иннигэр үйэтийээри бэйэлэрин тустарынан кинигэ суруйтаралларын, киинэ уһултаралларын ааһан, бэйэлэрэ айбыт курдук ааттаталлар. Сатанара буоллар, абаансанан сибэтиэй оҥорторуо эбиттэр. Ол да өртөн буолбат ини, дьон хараҕа бааллара, өйө көтөрө түргэн. Уруйдуу сатаан баран, биир бэйэлээхпитин сибэтиэй гыммыттарын кытары толору сөбүлэспиттэрин билиминэ да хаалыахтара.

Туох барыта атыыга турда. Олох, доруобуйа кытары. Таптал эҥин туһунан этэ да барыллыбат. Үтүө аат үп үктэтиилээх, албан аат харчы атыылаах. Ардыбыт аһара атта, сүүстэ да сэбиэскэйдии киэби кэтэрдэ сатаабыттарын иһин, атын үйэ кэлэн баран ааспыкка тиэрэ эргийэн хаалбат.

Дьону кытта дьон курдук буола сатааччылар, уустук кэмбинээссийэлэри  айа оонньуохтааҕар көннөрү биэнсийэлээх биир күннээх олоҕунан олорон көрүө эбиттэр.

Күн бүгүн суутунан суйдааччыларга (приставтарга) биир биэнсийэлээх эмээхсин ытамньыйар. Бааҥҥа түспүт биэнсийэтин дуомун приставтар курдары тутан ылбыттар. Хайдах ыйы тахсабын, тугу аһаан киһи буолабын диэн эдэр үлэһиттэри ыга сатыыр. Ол дьон суут уурааҕын толоробут дииртэн атын тылы булан эппэттэр. Ол тыл диэн, бүгүн аһыыра суохха мүөттээх да тыл эмп буолбат. Эмиэ бу күн куорат балыыһатын уһун уочаратыгар биэнсийэлээхтэр буола турар быһыыны-майгыны ырыталлар. Кыһайан, Путиннаах Медведев хамнаспыт кыра диэн икки бүк эбиммиттэр, маннааҕы дархан кэмин иннигэр хат быыбарга турар үһү диэн сурах маҥнайгы нүөмэрдээх сонун буолбут. Ол уот анньыбытыныы кырдьаҕастар куолулара сүрдэнэр.

Кинилэр уонна биһигинньиктэр диэн араастаһыы ааһан бэрт ини. Уочараттара кэлэн бырааска тиксибиттэр куолунан сөп буолан атын кыһалҕаларын өрө тутуохтара. Атыттарга да күннээҕи кыһалҕа үгүс.

Кыра киһи кыһалҕата да кыра ини саатар уоскутунар буоллахпыт.

Венера ПЕТРОВА

15 апреля, 2014 Главные новости

Добавить комментарий

*