Былааннаммыт быһылаан

5 июня, 2015 в 7:24
агран

Дьон чулууларабыт дэнээччилэр бэлитиичэскэй баартыйалары тэринэн, дойду ис, тас бэлиитикэтигэр бэйэлэрин олоххо көрүүлэрин кыттыһыннарарга соруктаналлар. Арассыыйа судаарыстыбатыгар элбэх баартыйа тэриллиэн сөбүн сокуонунан көҥүллээһин уопсастыба өйүн-санаатын элбэх хайысхаҕа хайытан салайар баартыйа баһылыыр-көһүлүүр кыаҕа улаатарыгар көмө оҥоруу диэн суруйан турардаахпын.

Билигин, «Туймаада» хаһыат 255 №-гэр (28.05.2015 c.)  тахсыбыт Арамаан Дьөгүөрэп «Тыа сирин ким көмүскүөй? Аграрнай партияны хайдах былдьаабыттарын туһунан» диэн суруйуутун сыныйан ааҕан баран өссө урукку санаабын  эбэр түмүккэ кэллим.

А.Дьөгүөрэп эппитинэн, Аграрнай баартыйа салайааччыта быйыл инники кэмпириэнсийэнэн талыллыбытын үрдүнэн, СӨ-тин баһылыга Е.А.Борисов Аграрнай баартыйа  киин кэмитиэтин салайааччытыгар Башмачниковаҕа туруорсан, кининэн дьаһайтаран, Аграрнай баартыйа СӨ-нээҕи салаатын уочарата суох кэмпириэнсийэтин ыыттаран баартыйа бэрэссэдээтэлин хаттаан талларары ситиспит.

Саҥа   кэмпириэнсийэ ыытылларын көҕүлээччилэри  өйүөхтээх дэлэгээттэри улуустарга булааһынтан саҕалаан, хайдах харах далын иһинэн ыытыллыбыта сиһилии суруллубут. Дьон ааҕан билбитин хоһулаабаппын.

Тоҕо, туохтан баартыйа талыллыбыт салайааччытын устан, саҥа быыбар барда диэн  бэйэбиттэн ыйытыммыппар эппиэтээн көрүүм.

Баартыйа кэмпириэнсийэннэн талыллыбыт бэрэссэдээтэлин  аҕыйах ыйынан ууратыы араллааннаах быһылаан түмүгүнэн өйдүөххэ сөп. Баартыйалар истэригэр үлэ, ордук баһылыктарын талалларыгар,    дэмэкирээтийэ принциптэрин тутуһан ытылыахтаахтар уонна  ону  тутуһа  сатыыллар даҕаны. Тоҕо диэтэххэ, баартыйа тэриллиитин сүрүн соруга, дэмэкрээтийэҕэ олоҕуран судаарыстыба саламтата ыытар бэлитиичэскэй уонна экэнэмичэскэй хайысхаларыгар бэйэлэрин идеяларын киллэрсии буолар. Баартыйа тэриллиэҕиттэн дэмэкирэтиичэскэй тыыннанар  уонна тыыннаныахтаах. Устааптарыгар  сурулларынан баартыйа кэмитиэтин салайааччытын болдьоҕун иннинэ уларытыы баартыйа маҥнайгы сүһүөх кэмитиэттэрэ туруосууларынан ыытыллыахтаах. Хаһыакка суруйулларынан, аграрнай баартыйа СӨ-нээҕи салаатын салайааччытын уларытыы үөһэттэн ыйыыны толоруу быһыытынан барбыт.

Холобур, Сэбиэскэй былаас саҕана обком маҥнайгы сэкиритээрин талыллыбыт больдьоҕо бүтүөн иннинэ аҕыс араллаана, тоҕус түрүлүөнэ суох үлэтиттэн устуллуба. Бэл, хомуньуустар баартыйаларын диктатуратын саҕана да үөһэттэн оннук сорудух бэриллэрин истибэтэҕим. Баҕар, биирдиилээн түбэлтэ тахсыбыта буолуон сөп. Буолбут  да түбэлтэтигэр, баартыйа аата алдьанар диэн   ону сонун гынан ыспаттара баартыйаҕа олохтоммут сиэр быһыытынан ылыныллар. Биһиэхэ дьон да, бартыйа да сиэриттэн-майгытыттан ойуччу курдук.

 

Тоҕо баартыйа өрө тутар сүрүн куоһура, дэмэкирэтиичэскэй принциптэрэ кэһилиннэ?

СӨ-тин кылабаата бэйэтин киһитин талларыан баҕарбыт үһү. Ама, кырдьык дуо?

А.Дьөгүөрэби, тыа сирин олоҕо-дьаһаҕа олус мөлтөөбүтүн ис дууһатыттан ылынан кырдьыгы суруйууларын көтүппэккэ ааҕан, ис хоһоонун ыараҥнатан толкуйдаан көрөр буолан, итэҕэйэргэ тиийэбин.

Е.А.Борисов илэ бэйэтинэн уонна көмөлөһөөччүлэрэ,    сокуон таһаарааччы да, толорооччу да судаарыстыбаннай, муниципальнай былаастар бары таһымнарын сололоругар үлэлии олорооччулар баартыйа олоҕор орооһоллоро сокуонунан бобулларын үрдүнэн, тоҕо Аграрнай баартыйа өрөспүүбүлүкэтээҕи салаатын салайааччыта ким буоларыгар олус кыһаннылар?   Эппиэтэ дэбигис өйгө көтөн түспэт.

Тоҕо диэн боппуруоспар эппиэтин көрдүүрбэр кэтэх санаам, СӨ-тин нэһилиэнньэтэ хайдах тарҕаһан олорорун сыныйан көр, эппиэтин булуоҥ  диэн сипсийдэ.   Көрдүм. Кырдьык сэрэйэргэ орун биэрдэ.

СӨ-тигэр олохсуйан олороочу киһи ахсаана 960-ча тыһ. киһи, онтон 65% курдуга куораттарга олорор. Нэһилиэнньэ 35% кэриҥэ тыа сирин түөлбэлэригэр сахалар олороллор. Өрөспүүбүлүкэ иһигэр олорооччу сахалар ахсааннара 470-ча киһи. Урут 80-ча бырыһыана тыа сиригэр олорбут буоллахтарына билигин эйэ-дэмнээхтик куоракка көһөрүү бэлиитикэтэ бара турур.

Сымыйалаама диэччилэргэ быһаарыым. Өрөспүүбүлүкэҕэ тыа хаһаайыстыбатын ырыынак ирдэбилинэн өйөөһүн барбат. Көмө оҥоруллааһынын үлэ түмүгүнэн буолбакка, буосуобуйа кэриҥинэн оҥороллор. Үүт туттарыытыгар харчы төлүүллэр даҕаны оҥоһуллар ороскуотун саппат курдук төлөбүр харчытын кээмэйин быһаллар.

Ити оҥорор көмөлөрө үлэһит киһиэхэ таһаарыылаах үлэҕэ дьулуһарыгар сорук (стимул) туруорбат. Холобур, хамбаайыннары, күүстээх тыраахтардары бүддьүөт харчытыгар атыылаһан аҕалан   биирдиилээн бас билиилээх улахан тэриллиилээх хаһаайыстыбаларга бэлэх кэриэтэ биэрэллэр. Ылааччы хаһаайыстыба техникэ сыанатын 5% эрэ уйуналлар диэн үтүөнү оҥорор курдук киһиргээн кэпсииллэр. Көмө оҥоһуллубут тустаахха үчүгэй бөҕө. Оттон онук дьолго түбэспэттэр олус элбэхтэр. Ньымааттаһыы сиэмэтин ыһыы буолбатах дуо?

Аграрнай баартыйа бэрэссэдээтэлинэн кылабаа бэйэтин эрэллээх киһитин туруорбут кубулдьуппут кырдьыга икки куобаҕы биир ытыыннан охторор кэриэтэ эбит диэн сабаҕалыыбын. Мин сабаҕалааһыммын кырдьыктаныа суоххутун сөп. Толкуйдуурга саҕа биэрэбин.

Бастакыта. Өрөспүүбүлүкэ тыа хаһаайыстыбатын сайдыытыгар диэн ааттаан ыытар бэлиитикэтин өйөөһүн уонна тыа сирин дьонугар үтүөнү оҥоруу, кыһаллыы курдук өйдөтүү быһылаах.

Иккиһэ. Быыбарга куоластыы тахсар дьон ахсааныгар саһан сылдьар эбит. Куорат дьоно, билээҕимсийэн буолуо, муҥутаан аҥаарбарын кэриҥэ быыбарга куоластыыра үгэскэ кубулуйбутун тэҥэ. Тыа сирин дьоно 90%-тан тахсаллара быыбарга кытталлар.   Аграрнай баартыйаннан бырабыыталыстыба кыһамньытын киэҥник өйдөтөн тириэрдиллибит тыа сирин дьоно өрөспүүбүлүкэ саламтата туруорбут «Единая Россия» дьонноругар куоластарын биэриэхтэрин төрдүн оҥоро сатааһын диим.

Сылтан аҕыйах ый ордугунан Судаарыстыбаннай Сүбэҕэ дьокутааттары таллыахтааҕы умнубатахха, Аграрнай баартыйа көмөтүгэр эрэл улахан буолуохтаах.

А.Н.Жирков салайбыт Аграрнай баартыйата «Единая Россия» баартыйатыгар салаа быһыытынан киирэн хаалбыт уопута умнуллубат.

Дьэ,  дьикти, дьиктитин ааһан,  сүрдээх.

 

Уһук Уйбаан

5 июня, 2015 Главные новости

Добавить комментарий

*