Владислав КОРОТОВ: Аҥаардастыы айбардааһын

9 сентября, 2014 в 2:45
БЕА Сунтаарга

Миигин, спортивнай суруналыыс уонна педагог Владислав Коротовы, спорка сыһыаннаах дьон син билэллэрэ-истэллэрэ буолуо диэн эрэнэн туран, доҕорум Александр Николаевич суругар кыттыһан, бэйэм санаабын аһаҕастык этэргэ быһаарынным.

Быһаас Е.А.Борисов быыбарга турабын диэн быдан инниттэн сыыйа, онтон Россия президениттэн көҥүл ылыаҕыттан ыла олох аһаҕастык, харса-хабыра суох аҥаардастыы айбардааһын, былааһы кэрээнэ суох туһаныы барбытыттан кэлэйэн, ытырыктатан, быыбарга кыттыбакка хааларым сатаммат буолбутун өйдөөбүтүм.

Сокуону тутуһан, ытыгылаан, саха дьонугар үтүө холобур биэрэн, биһиги аҕа баһылыкпыт эһиил, буолуохтаах болдьоҕор бэйэтин кандидатуратын туруорбута буоллар, биһиги киниэхэ муҥура суох итэҕэйиибит күүһүрүө этэ. Онтубут олох утарытынан буолан таҕыста. Саха сирин дьонун-сэргэтин санаатын аахсыбатын, болҕомтоҕо ылбатын көрдөрөн, биһиги, саха дьоно барыта, нолуок төлөөччүлэр киллэрбит үппүтүн-харчыбытын сыала суохтук ороскуоттаан, больдоҕун иннинэ быыбары биллэттэрдэ. Манна эрдэттэн бэлэмнэнэн, киниэхэ күөн күрэс оҥорор кыахтаах дьону араас ньыманан суолуттан туоратта. Онтон ыам ыйыттан саҕалаан туох баар маассабай иһитиннэрэр-биллэрэр сириэстибэлэргэ ханнык да хааччаҕа суох, быыбар сокуонун баардыылаабакка, тэлэбииһэргэ, араадьыйаҕа, бэйэтиттэн тутулуктаах бары хаһыаттарга хас күн аайы арбааһын, төтөлө суох хайҕааһын саҕаланна. Республикаҕа туох оҥоһуллубута, бюджет харчытыгар араас тус сыаллаах программаларынан, министиэристибэлэр, федеральнай бырабыытылыстыба үбүлээһининэн ыытыллыбыт бары тутуулар соҕотох баһылык э.т. өҥөтүнэн эрэ оҥоһуллубут курдук кэпсэнэр. Киин быыбар хамыһыыйатыгар докумуонун туттара да илигинэ, кандидат быһыытынан регистрацияламмакка да сылдьан, киэҥ хабааннаах агитацияны ыытан барбыта. Республика бары улуустарыгар уонна куораттарыгар, хас биирдии нэһилиэккэ кини хаартыскалаах баннердар ыйаммыттара ыраатта.

Туох баар бырабыытылыстыба чилиэннэрин, Ил Түмэн дьокутааттарын батыһыннара сылдьан Саха сирин улуустарын үксүн сөмөлүөтүнэн, сорох сирдэргэ бөртөлүөтүнэн кэрийэн биэрдэ, итиннэ төһөлөөх бюджет харчыта сыала суох ороскуоттаммытын бэйэтэ эрэ билэрэ буолуо.

Е.А.Борисов штабыгар, кинини агытаассыйалыырга бары улуустар, нэһилиэктэр баһылыктара, дьаһалталар үлэһиттэрэ, бары министиэристибэлэр, биэдэмистибэлэр салайааччылара, үлэһиттэрэ сүүрэллэрэ-көтөллөрө кимиэхэда кистэл буолбатах. Бу тыһыынчанан киһи бэйэлэрин тустаах үлэлэрин толорбокко, быыбарынан эрэ дьарыктаналларын бары көрө-истэ сылдьабыт, ону кистии да сатаабаттар.

Тэлэбииһэргэ киниттэн атын кадидаттар харчы да төлөөн тахсыбаттар, “Саха” НКИК биэриилэригэр сүрүн утарылаһааччы Э.Б.Березкин туһунан хаһыс да нэдиэлэтин биир эрэ түгэҥҥэ — хараардар эрэ хабааннаах ахталлар, кини программатын, бэйэтин этиилэрин, быыбардааччылары кытта көрсүһүүлэрин туһунан саараама ахтыбаттар. “Дебаттар” диэн ааттаан, дьон бары үлэтигэр барар, хомунар эбэтэр айаннаан иһэр кэмигэр сарсыарда 8.30 саҕалаан, киһи сонньуйуох, Саха сиригэр сыһыана суох хайысхалаах кэпсэтиилэри ыыталлар. Манна Е.А.Борисов биирдэ да кыттары наадалааҕынан аахпата эмиэ кини быыбарга, сахатын дьонугар сыһыанын арылыччы көрдөрөр.

“Быыбары чиэһинэйдик ыытыахха” диэн сотору-сотору тылларын биэрэллэр, ыҥыраллар, андаҕайаллар даҕаны, араас ньыманан Эрнст Березкины тус бэйэтин, биир санаалаахтарын, кинини өйөөбүт “Гражданскай платформа” партия, штабын үлэһиттэрин туһунан оруна суох дойҕохтору тарҕаталлар, кини чиэһин-дьоһунун харса суох баһааҕырдаллар, онто да суох аҕыйах ахсааннаах, киһи хараҕын улаханнык аалбат аҕытаассыйалыыр матырыйаалларын буорту гыналлар, тоҕута тардаллар алдьаталлар. Административнай ресурсаны хото туһанан, Березкин быыбардааччыларын кытта көрсөөрү гыннаҕына, араас сылтаҕынан куоһурданан, сокуонунан мэктиэлэммит көрсүһэр миэстэлэри биэрбэттэр, хааччахтыыллар. Ол курдук, Мииринэйгэ МПТИ, устудьуоннарын кытта көрсө олордоҕуна, суһаллык “баһаарынай үөрэтии” тэрийэ охсоннор, дьиэттэн үүрэн таһаардылар.

Маннык биир эрэ хайысхалаах, ханнык даҕаны демократия өйдөбүлэ сыстыбатах быыбардарын ыытан эрэллэрин дьон көрө-билэ сылдьар, онон бэйэтигэр сөптөөх түмүктэри оҥостон, булгуруйбат быһаарыныыны ылбыт буолуохтаахтар диэн бигэ эрэллээхпин.
Ытыктабылы кытта Владислав КОРОТОВ.

9 сентября, 2014 Главные новости

Добавить комментарий

*