Гербалайф: Ким абыраныа, ким алдьаныа

17 октября, 2014 в 0:52
3-1.Гербалайф.Ким абыраныа ким алдьаныа

Киэр бар диэтэ диэбитим, Гербалайф диир эбит

Гербалайф курдук устуукаларынан үлүһүйүү долгун-долгун кэлэн ааһар курдук.
Дьэ, хаптайан, аан дойдуга акаары аҕыйаан, арыый да намыраабыттар дуу диэм ыккардыгар, ити дьон баалларын биллэрэн бардылар.

Куоракка кэлээппин кытары оптуобус тохтобулугар турдахпына, биир дьахтар тэһэ үөгүлээн ылан, туох айылаах уойдуҥ, биһиги мантан чугас кулууптаахпыт диэтэ.

Аны туран, хаһааҥҥыта эрэ миигин тура албыннаан, бэйэтин аннынан итилэргэ холбообут дьахтарым сүгүн олордорун ааста. Үс күн босхо аһатабын, отут биэс бырыһыаннааххынан бэлэх биэрэбин диэн эрий да эрий. Мин ыалдьан өлөөрү сытабын, грипп эҥин диэн куотуна сатыыбын. Суох, кэллэххинэ клеточнай активатор иһэрдэн, түргэнник атаххар туруоруохпут диир. Икки мөһөөккө массаас баар диэн эбиликтээх онто.
Ол мин хаһааҥҥыта эрэ ырбытым устуоруйата уһун. Гербалайф эрэ өҥөтүнэн дииргэ кэрэгэй. Уунан эрэ сылдьан иккилиитэ кырынан, түөртүү уоннаах биэдэрэ отону хомуй эрэ. Туос сатыы сылдьан. Ырдьаччы ырбыккыт эрэ баар буолуо.

Бэлэм сылтах, киирбитим аньыытыгар элбэҕи ылбытым эрээри, барытын бэйэм мэҥиэстибитим. Кими да албыннаан, угаайыга киллэрэн уһуйбатаҕым. Тоҕо да баччааҥҥа диэри ол отут биэс бырыһыан чэпчэтиим сотулла илигэ буолла? Көмпүүтэринэн өҥө иһин диэн сылга биирдэ харчы ылаллара бу кэллэҕэ. Электроннай почтабар гербалайфтар сонуннара кэлэрин сотторон иһэрим иһин харчы төлөөн эрдэҕим.

«Эковита» эрэ

Онно хабааннаах түмсүүгэ оҕо сааһым дьүөгэтэ быһаас киирэн иирэ сыспыттааҕа. Мыылата суох суунан экономия бөҕөтө, сотору Дубайга барыам диирдээх өссө. Мин пирамида үрдүгэр бааллар эрэ ол дойдуга үктэнэллэр диирбин истэр аат диэн суох. Туох эмэ диэтим да ол диэки иэҕиллэр, экологическай ыраас бородууксуйа биһиэхэ эрэ баар диэн буолар. Иһэ-таһа «Эковита» буолбут дьүөгэм тоҕо эрэ уоскуйбут. Уруккутун курдук уу иһэ-иһэ хайҕаабат. Иэскэ киирэн туран дьааһыгынан ылбыт бородууксуйата бэйэтигэр хааллаҕа буолуо. Аҕыс эрэ тыһыынчалаах швабранан дьиэбин сууйдахпына ыраас дьахтар аатырыам үһүө.

Кини хаайан ылларбыт наборуттан валига таах да абыраабыта. Тыаҕа улахан дьиэни мыылата, бороһуога суох ол быыкаа валигынан сууйан бүтэрбитим. Уу да кыра барбыта. Сүрэҕэ суохха туһалаах устуука. Ырааһырда эрэ суох, «Эковита» буоллаҕа.
Итинник хабааннаах түмсүүлэр киһини хайаан да кулууптарыгар угуйа сатыыллар. Онно тиийдэххинэ, куолаан өйгүн баайаллар.
Мин кыыһым бииргэ үлэлиир дьоммун буулаары үтүө көр. Биир дьахтары оптуобуска кытары сырсан киирэн, «тоҕо миигин преследуйдуугун?» диэн мөҕүллүбүт этэ.
Мин ити фирма бородууксуйатын туһунан биир идэлээхпэр төлөпүөнүнэн кэпсээбиппэр, киһим хап-сабар сыаналаах ахан битэмииннэрин ыла охсубута. Эйиэхэ быһа итэҕэйэбин диэннээҕэ.

Саалыс буолбуту санатар, атыыга барбаты арбыыр

Мантан инньэ, сах сиэтин, аны тугу да эрэкэлээмэлээн эрэйгэ киирбэппин. Мыылаҕа экономиялыам этэ диэн хас эмэ тыһыынчалаах вехоткалара да суох олоруллуо. Нус-хас утуйуом этэ диэн сүүһүнэн тыһыынчалаах матарааска матайданыҥ диэн тылым ууһун киллэриэм суох. Арай кыһалҕа тирээтэҕинэ, иэс баайдахтарына, хайҕаан көрүллэрэ дуу?
Эрэкэлээмэ аата эрэкэлээмэ, саалыс буолбуту санаталлар, атыыга барбаты арбыыллар.
Хомуньуус аҕам сэбиэскэйдиҥи хаһыакка тахсыбыт хас эрэкэлээмэ иһигэр ахтыллыбыты суруйтара сатыыр. Сэбиэскэй, ол аата дьиҥнээх диир. Холоон, харчы төлөөн хайа баҕарар хаһыакка таһаартарар буоллахтара. Миэхэ да дук гыналлара буоллар, тугу баҕарар тук курдук таһаарыам этэ.

Уу иһэ-иһэ уһуннук хайҕыыр Гербалайфтара

Уу иһэ-иһэ уһуннук хайҕыыр устуукаларын, ону тула түмсүүлэр тустарынан уһуну-киэҥи суруйуохха сөп этэ да, олус тэнийбэккэ, билэрдии Гербалайф туһунан ымпыктыым.
Уу иһэри кинилэр, дьэ, өрө туталлар. Ол, дьиҥинэн, сөп. Биһигини тумуулаатахпытына эрэ, уута элбэхтэ иһиҥ диэн санаталлара. Атын кэмҥэ аһара элбэх ууну иһэр бүөргэ буортулаах диэн буолара.
Сөпкө аһааҥ дииллэрэ эмиэ син. Мин аһаан-аһаан баран кинилэргэ кулгуйаары гыммаппын. Сөптөөх сиэр диэн бигэргэтэбин. Ол эрээри ырарынан, тупсарынан эрэ өйдөрө бааллыбыт дьону кытта наар алтыһар сылаалаах. Ким хас киилэни түһэрбитин, ыраастаммытын, эдэригэр түспүтүн эрэ ыастыйалаан, онон ымсыырдан саҥаттан саҥа дьону бэйэлэрин кэккэлэригэр киллэрэллэр. Сыаната диэн ынырык. Ырарын ырыаҥ, тирииҥ салыбыраан хаалбатын курдук белок иһиэххин наада. Онтулара бэрт кыра баанкалаах, сыаната сүр. Ол эрэ үһүө, кинилэр эрэ битэмииннэрэ буортута суох, туһалаах аатырар. Барыта наада курдук. Ону барытын ылан истэххэ, дьиэ кэргэн аччыктыырыгар тиийэр.
Туһалаах, туһата суох, буортулаах эрэ буолбатын. Миигин кытары тэҥҥэ ити кэккэҕэ киирбит бииргэ үөрэммит кыыһым икки нэдиэлэ гербалайфтаан баран, инсуллаабыта. Ити хайҕыыр энергия эбэр чэйдэрэ туох да сиэрэ суох үрдүк кофеиннаах.

Киһиэхэ барытыгар туһалаах диэн суох. Ким абыраныа, ким алдьаныа. Бэрдин бэрт да, аһара барыы, арбаныы, күүһүнэн күндү буола сатааһын эмиэ наадата суох.
Гербалайф – иһэ-таһа позитив. Сиэрэ суох позитив. Итинник аһара үөрэр дьону «обкуреннайдар» дуу дииллэр.

17 октября, 2014 Главные новости

Добавить комментарий

*