Дойдум миэнэ: Күөх дуолга

7 июля, 2014 в 3:57

Кыһыны быһа ыралаабыт, санаабынан ымыылаабыт кэмим-кэрдиим кэлэн, толору дьолбун кэрэһилиир кэтэһиилээх күнүм үүннэ.

Дойдубар, дьоммор эргиллибит үөрүүбүн уһатаары утуйар уубун сарбыйабын, халтай хардыыны аччатабын. Маҥнайгы күнүм хас түгэнин сөллүбэттии баайаары хаартыскаҕа хатаатым, онтон бу суругунан сургуустаары соруннум.
Күммүн үлэнэн да саҕалаатарбын, халлаан сылыйыыта үлэ үтүмэн үтүөнэн үтүрүлүннэ. Күнүскүгэ тиийиминэ Фейсбукка икки атахтаах араас доҕордоох ыппын кытары өрүс уҥуор туораатыбыт.
Ол да иһин мин ыксаабытым, ультиматум туруоран күүспүнэн бу диэки кэлбитим. Баттастым. Саха эрэ санаата охтор сардааната уот кыһыл ойуу буолан от-мас быыһынан кылайарын көрөр дьоллоннум. Аҕыйах күн хойутаабытым буоллар, кэрэкэ кэхтэн барыа эбит.
Биһиги диэки сардаана сибэкки үүнэрин эдэр дьүөгэм биһикки алҕаска арыйбыттаахпыт. Ол соһуччу үөрүүлээх сайын кэннэ бу айылҕа кэрэтин харахтыы илик этим.
Хаартыскаҕа хатаабыт түгэннэрим хасааһа быйыл сайын бэркэ хаҥыыһы. Ону өрө тутан сир астыырым да аччыыһы, атын дьарыгым да дьадайыыһы. Үлүһүйүүм үүйэ тутан, тугу барытын быраҕан туран хас түгэни хатыырга бэлэммин. Куоракка аттынааҕы хаарбах дьиэбит инньэ төрдүс төгүлүн умайан эрэрин көрөөт, түһэрэр сэппин хаба тардаат онно ойбуттааҕым. Ама дьон докумуоннарын урут туппуттар этэ. Кыра тыал кыымы көтүтэн аҕаллар, биһиги да дьиэбит уокка былдьаныах курдуга.
Сир аһа төһө ситэн эрэрин көрө-билэ диэн соруктааҕым букатын умнуллан, наар хаартыскаҕа түһэрэн таҕыстым. Ол эрэ буолуо дуо, сонно тута доҕотторго утааран, онно харда ылартан соло буолбатым.
Маннык үтүө күнү, кэрэ дуолу, күөх сирэми, эгэлгэ өҥү хаартыскаҕа хабан хаалларбытым хас кыһыны быһа хараҕы манньытыа, сүрэҕи сылаанньытыа биллибэт. Сардаана кэрэтин интернет кытары билинэр. Сымыйа сардаана диэн ааттыыр, атын хайа да сиргэ харахтаабатах сибэкким аата «лилия пенсильванская» диэнин биир актыыбынай френд этэн сырдатта.
Сардаанаттан сардаанаҕа ойо-тэбэ сылдьыбыт дьолум чаҕылхай туоһулара тус бэйэм архыыбым бастыҥ баайынан эрэ буолбакка, дьон-сэргэ санаатын табар, дууһатын кылларын таарыйар хартыыҥкалар буолан көстүбэт ситимҥэ сырыттыннар ээ.
Өрүс уҥуортан эргиллээт инньэ сүүрбэччэ сыл биһигини дьэдьэнинэн хадаҕалыыр сирбитигэр бэлисипиэтинэн аттанным. Аара тохтоон хонуу сибэккилэрин ортотугар сытан сылаанньыйдым, бэйэм бэйэбин хаартыскаҕа түһэрэ оонньоотум.
Арай, сайын аайы сылдьар ахан ыырбар мунан ыллым. Солооһун отунан-маһынан саба үүнэн киһи атыҥырыыр. Атын өттүнэн киирэн кэлбитим – дьон дьэдьэннээн ырааппыт эрээри, эмиэ да хаппыт курдук, эмиэ да отун быыһа өрө тэбэ илик. Ол да буоллар кыйа сылдьан кыҥастастым, хаама сылдьан тараахтаатым. Кып-кыра дьэдьэннэри чугастан түһэрэн дьон санаатым таптым.
Кэлэн баран, тиэргэн отун мустубут. Киэһилик балыктыы диэн кытылга киирэ сырыттыбыт. Уу тымныыта сүр. Сайын үтүөтүгэр ханна сөтүөлээн сөрүүкүүрбүт буолла?
Ытым биһикки ахтылҕаммытын таһаардыбыт.
Итинник биир күн биир сылы сабырыйар курдук.
ЧЭГДЭ

7 июля, 2014 Главные новости

Добавить комментарий

*