Дьокуускайдаагы Кемулуек Уеьээ Булуугэ

5 апреля, 2014 в 23:48
Улус

   Кулун тутар ыйга Дьокуускайтан «Көмүлүөк» түмсүү Ороһунан, Үөдүгэйинэн кэнсиэртээн, түмсүүлэри кытта уопут атастаһан барда.

18 буолан, таарыччы бэйэлэрин чилиэннэрэ Александр Михайлович Семенов – Ырыа Сааска сыанаҕа ыллаабыта 55 сылынан, төрөөбүт, үлэлээбит, олорбут сирдэринэн сырыттылар. Түмсүү салайааччыта Мария Константиновна Александрова кэпсииринэн, 10 сыл устата элбэх да үлэни ыыппыттар, талааннара элбэҕэ сөхтөрдө. Ырыаһыттара, хоһоонньуттара, иистэнньэҥнэрэ, көстүүмнэрэ кэрэтэ биһиги улуус түмсүүлэригэр умнуллубат көрсүһүүлэри өйбүтүгэр-санаабытыгар хааллардылар.

   Биһиги улууспутугар ыһыллыы-тоҕуллуу сылларыгар оҕолорбутугар, сиэннэрбитигэр көмөлөһөр санааттан эбэлэр түмсүүлэрэ тэриллэн барбыттара. Бастакынан Нам нэһилиэгэр “Көмүлүөк” түмсүү   тэриллибитэ. Салайааччылара Раиса Денисовна Руфова, сүбэһиттэрэ, музыкальнай салайааччылара, биллэр мелодистка Мария Игнатьевна Константинова, билиҥҥи салайааччылара Мария Ивановна Егорова үлэлэрин айымньылаахтык саҕалаабыттара. Кинилэр республика улуустарыгар, бэл, кыраныысса таһыгар бэйэлэрин талааннарын көрдөрдүлэр. Эмиэ кинилэр бастакынан эбэлэр ыһыахтарын тэрийбиттэрэ. Ити үтүө бачыымы өйөөн, сайын аайы уочаратынан түмсүүлэр ыһыахтары тэрийэбит. Оттон “Көмүлүөктэр” үлэлээбиттэрэ 20 сыл буолла.

  Эбэлэри кинилэр көҕүлээн, иккиһинэн Анастасия Варламова салайааччылаах оройуон киинигэр “Дьулуур” түмсүү тэриллибитэ. Билиҥҥи салайааччы — Зоя Васильевна Егорова. Кинилэртэн холобур ылан, “Дьүөгэ” түмсүү (салайааччы Любовь Федотовна Григорьева) үгүс эбэлэри түмэ тардан үҥкүү кэрэ эйгэтигэр угуйбута. Кинилэр элбэхтик эрчиллэн, үгүс үҥкүү конкурстарыгар кыттан, мастыйан эрэр илиилэр, атахтар бэркэ имиллэҥнэһэр буоллулар. Билигин бу түмсүүнү Ирина Васильевна Потапова иилээн-саҕалаан илдьэ сылдьар.  Былырыын Испанияҕа тахсан, үҥкүүлээннэр лауреат буолан кэлбиттэрэ. Кинилэр саҥаттан саҥа сүүрээннэри эбэлэр түмсүүлэригэр киллэрэллэр, болҕомто киинигэр сылдьаллар.

  Кинилэр кэннилэриттэн “Айылгы” түмсүүнү Ольга Ивановна Харахова тэрийбитэ, билигин Ирина Иннокентьевна Степанова салайар. Бу эмиэ кыахтаах түмсүү. Кэнтиккэ  Галина Александровна Семенова “Сайдам” түмсүүтэ сылтан сыл аайы ахсаан өттүнэн эбиллэннэр, күрэхтэһиилэргэ күүстээх хамаанда буолан эрэллэр. Бүлүү эбэбит уҥуоргу өттүгэр Далырга, Дүллүкүгэ, Сургуулукка, Хомустаахха, о.д.а. нэһилиэктэргэ барыта 28 түмсүү баар.

Оройуоҥҥа үсүһүнэн ороһулар “Күбэйэ” түмсүүнү тэрийбиппит 18 сыл буолла. Билигин түмсүүбүтүгэр эһэлэр эмиэ бааллар.

   2005 сыллаахха пенсионердар Сэбиэттэрин республикатааҕы конференциятыгар  бара сылдьыбытым. Онно республика пенсионердарын Сэбиэтин бэрэссэдээтэлэ Люлия Николаевна Григорьева Нам улууһугар таһааран, пенсионардар хайдах общественнай үлэнэн дьарыктаналларын көрдөрбүтэ. Ону сэргэ улуус киинигэр уонна тэйиччи саха балаҕаныгар сырытыннараннар сүргэбит олуһун көтөҕүллүбүтэ.

  Киһи кыайарын биһиги  да кыайыахтаахпыт диэн Ороһу оҕонньотторо саха балаҕанын 2005 сыл күһүнүгэр биир биэс харчыта суох туппуттара. Ити улууска бастакы балаҕан буолар. Сайыҥҥы өттүгэр “Эбээ үөрэҕэ” диэн лааҕыры үлэлэтэ сылдьыбыппыт. Оччотооҕу социальнай харалта начаалынньыга Зоя Васильевна Тарабукина үбүлээн, экологическай хайысхалаах үлэбитинэн иккитэ грант ыла сылдьыбыппыт. Сиэннэри кытта үлэни билигин да ыыта сылдьабыт.

  Кэлин тупсарыллыбыт үчүгэй балаҕан Тамалакааҥҥа тутуллубута. Онно “Ааныска”, “Талба” түмсүүлэр үлэлииллэр.

  Түөрт Бүлүү улууһун региональнай түмсүүлэрин конференциялара, конкурстара Бүлүүгэ, Үөһээ Бүлүүгэ, Ньурбаҕа тэрээһиннээхтик ыытыллаллар. Биһиги итинник тэрээһиннэргэ барарбытыгар баһылыкпыт А.В. Антонов үп-харчы өттүнэн мэлдьи өйүүр. Итини таһынан нэһилиэкпит баһылыга уонна улуустааҕы культура управлениета саҥа баян ылынарбытыгар көмөлөспүтүгэр махталбытын тиэрдэбит.

   Ороһуга Анастасия Федоровна Болтокова дьиэ кэргэнинэн көһөн кэлиэҕиттэн, музыкальнай салайааччыбыт буолан, музыка кэрэ эйгэтигэр биһигин түмтэ. Олунньу 22 күнүгэр түөрт Бүлүү улууһун түмсүүлэрэ Ньурбаҕа ыытыллыбыт “Иһийбит иэйиини күөдьүтэн” конкурска дипломант I степенин ылан, үөрэн-көтөн кэлбиппит.

   Түмүкпэр, биһиэхэ кэлэн, бэйэтин 10 сыллаах үлэтин-хамнаһын билиһиннэрэн, ыллаан-туойан барбыт Дьокуускай куорат “Көмүлүөк” түмсүүтүгэр улахан махталбытын хаһыат нөҥүө ыытабыт. Кинилэргэ ситиһиини, өлүөр-сөлүөр чэгиэн сылдьалларыгар баҕа санаабытын  этэбит.

  Республика үрдүнэн эбэлэр түмсүүлэрэ уларыта тутуу сылларыгар төрүттэммитэ. Оттон аҕалар түмсүүлэрин үлэтэ-хамнаһа билиҥҥитэ сэмэй. Кинилэр турунан түмсэллэрэ буоллар, уһун кэмҥэ кыаллыбатах уопсастыба куһаҕан дьаллыктара умнууга барыа этилэр. Аҕалар чахчы ылсыһан туруннахтарына, кыайбатахтара диэн суох буоллаҕа. Ыччат эмиэ түмсэр.

 Түмсүүлэр үлэлэрэ кииннэнэн, биир сыалга-сорукка түмүллэрэ буоллар диэн баҕа санаалаахпыт.

Ороһутааҕы “Күбэйэ” түмсүү салайааччыта

 Ксения Самсонона ВЛАСЬЕВА

5 апреля, 2014 Главные новости

Добавить комментарий

*