Ил Дархан: Соло дуу, соргу дуу?

9 сентября, 2014 в 3:03
БЕА с женой

Биһиги Иллээхпит дуо? Иллээх буолан Ил Дарханнаах инибит.

Ил Дархан диэн ааты аны талыллар бас-көс киһиэхэ иҥэриллэр диэбиттээхтэрэ да, онно тиийиминэ ити аат анаммыт, билигин үлэлии олорор бэрисидьиэммитигэр тиксэн хаалбыта.

Ол сокуонунан биир сомоҕо судаарыстыба иһинэн тэриллии дэнэрбитин Ил диэн усулуобунайдык ааттыыр буоллахпыт. Ил иһигэр иллээх дьиэ кэргэн курдук олоруохпутун ол-бу суругунан киирсэр «провокатордар» Ил Дархаммытын олорор олбоҕуттан түөрэҥнэтэ сатыыллар үһү. Сурулунна да сокуон буолбатах эрээри, ону барытын сымыйа диир эмиэ кэрэгэй. Ким эрэ кини солотугар дураһыйан, суруксуттары наймыласпыт диэҕи, барыларын кытары баартардаһан, инфо-куйаары бүтүннүүтүн курдуур үллэ турар үптээх үтүө киһи чугаһынан суохха дылы. Федераллар соруйан гыналлар диэҕи, бэйэ да дьоно бэрт диэбэттэр. Киһи сонньуйуоҕа, бас-көс киһибитин аатынан да аанньа ахтыбат буоллулар. Оннооҕор Путины сордууллар диэххит гынан баран, Сырдык Сыдьаана мантан ыраах, бэйэтин туһунан айдарбыт остуоруйа сорҕотун эрэ курдук ылыныллар.

Атын өрөспүүбүлүкэлэр бэйэлэрин баһылыктарын итинник көҥүл ыыстыы, суругунан үөҕэ сылдьаллара иһиллибэт. Биитэр чуо биһиэхэ тыл көҥүлэ аһаралатара дуу?

Интернет форумнарыгар оннук көҥүл бэриллибит курдугун иһин, наада буоллаҕына, эҥин уорганнар ник кэтэҕэр саспыты сонно булан эппиэккэ тардыа этилэр. Модератордар Ил Дархан таарыллар топтарыгар күлүүс да ыйаабат буоллулар. Ити – соччото суох сибики. Хойобууннаабыт кус бэйэтэ биэтэктэн туораан биэрэрин кэтэһиминэ эрэ кэһэтиһэргэ, эбии-сабыы буоларга көҥүл бэриллибитигэр дылы.

Ол бэтэрэнэн этэллэринэн БЕА туһунан суруйар муодунай буолбут кэмигэр мин эмиэ эбилик буолан эрдэҕим. Хос санаата суох, суруллубукка сигэнэн, баар балаһыанньаны биир сиргэ түмэргэ холонуум. Сылы түмүктүүр кэммит да бу кэллэ. Оттон ааһан эрэр сылга саамай элбэхтик СМИ хабар иэнигэр хаарыллыбыт, ахтыллыбыт киһинэн бэрисидьиэммит Егор Афанасьевич БОРИСОВ буолара мэлдьэҕэ суох.

Ахтыллара сокуон, онон килиэптэнэн олорооччу элбэҕин кэннэ. Хаарыллан, хараардыллан ахтыллара эмиэ баара. Сыл бүтүүтэ ити иккиһэ үксээтэ, сытыырхайда, сыл сүрүн интригатыгар кубулуйда. Ол аата киһибитин түөрэҥнэтэн эрдэхтэрэ, күнэ-дьыла ааҕыллан эрдэҕэ дэһээччи элбээтэ. Суруллартан эрэ түмүк оҥорон, биир сылынан буолбакка, анаммыт болдьоҕун толору олордубакка, эһиил быыбар буолууһук диэччи хара баһаам. Эмиэ быыбардаары эҥинник тэринэн барыахчалар. Ким Ил Дархан солотун иһин киирсиэй диэн ыйытык инники күөҥҥэ таҕыста. Биирдиилээн дьону ааттыы-ааттыы уксаллара эрэ хаалла быһыылаах.

Сайын үгэннээн турдаҕына, көстүбэт дьон Барыыһап устуоруйаҕа туох суолу хаалларыай диэн ыйытык туруоруна-туруоруна куолулаабыттарыттан быһа тардан киллэриим. Никонор диэн никтаах табаарыс ыйытык үөһэ ыйытыгы ыйаабыт этэ:
— Барыыһабы барбытын кэннэ Ньукулаайабы курдук ытыгылыахтара дуо? Туох уһулуччуну кини оҥордо? Туох үтүөнү киллэрдэ? АЛРОСА атыылаан, атын баайы ыскайдаан эрэ устуоруйаҕа хаалыа дуо?
Онуоха хардарбыт дьон этиилэрин биир тиһиккэ киллэрэр буоллахха маннык буолан таҕыста. Харда тылларынан икки бөлөххө араарыахха. Бастатарбыт – негатив. Онно сыһыаннаах тыл-өс элбэҕинэн.

НЕГАТИВ:
— Бюджет харчытын сиэбит Олонхо-лэндинэн.
— Кини саҕана гастердар, миграннар халҕаһалаан киирбиттэринэн.
— Юридическэй сирэйдэри маассабайдык суох гыныынан.
— Үлэтэ суохтар элбээбиттэринэн.
— Үлэҕэ ылыыга конкурсу барары киллэриитинэн.
— Тендердэринэн.
— Хоруупсуйа силигилии сайдыбытынан.
— Бюрократическай аппараат, кэмитиэт үөһэ кэмитиэт элбээһининэн.
— Иннэ-кэннэ биллибэт кадровай политика, тойотторго дьыала тэриллиитинэн (Евсеев, Антоненко, Максимов, Стахов, Куркутов, Ракитин, Подголов дьыалалара).
— АЛРОСА-ны аһыы, акцияларын атыылааһынынан.
— Корпорациялары кытта тэҥ-тэҥҥэ сатаан кэпсэппэт, дойдубут интэриэһин кыайан турууласпат буолуутунан (Газпром, Сургутнефтегаз, Транснефть, Мечел).
— Москубаҕа мөлтөх лоббированиенан.
— Дьоҥҥо ытыктамматынан.
— Дьон дьадайыытынан, бомж элбээһининэн.

ПОЗИТИВТЫҤЫ:
— Элбэх оҕолоохторго учаастактары нэһиилэ биэрэллэринэн.
— Пилотнай бырайыагынан.
— Арыгыны атыылыырга кэминэн хаарчахтааһыны киллэриитинэн.
— Манчаары оонньууларынан.
— Чурапчыга суолу асфаллатыынан.
— Улахан спортивнай эбийиэктэр үлэҕэ киирииилэринэн («Триумф», «Чолбон»).
— Эдэр кадрдары уонна урбааны өйөөһүнүнэн («Сахаселигер», «Министр» оонньуу).
— Киин куоракка тутуу күүскэ барыытынан.
— Бэстээххэ тимир суол тиийэн кэлиитинэн.

Атын өйдөммөт дьайыыларынан устуоруйаҕа хааларга сайаапкалаһыан син:
— Элиэнэ эбэни туоруур муоста тутуутун туһунан кэпсэтиини ыыппытынан.
— РИК уонна атын фондалары тэрийиитинэн.
— Ыксаллаах быһыы-майгыны утары дьаһалларынан.

Күлүүлээх да түгэн устуоруйаҕа хаалар:
— Андаатар тилэҕэ ойуулаах транспорант.
Бэрисидьиэн диэн солотуулаах соло эрэ буолбатах. Бу – улахан эппиэтинэс, үллэ турар үлэ. Ол чэрчитинэн барбыт барыта устуоруйаҕа киириэх курдук улуу дьыала дэммэт. Эбээһинэһи толоруу, хамнаһы толуйуу – бу көннөрү күннээҕи үлэ.

Кириитикэлээн кирдиэттээтэххэ, кир-хох таҕыстар тахса туруон сөп. Үлэлиир киһи үөҕүллэр, дьаһахтаах киһи дьарыллар. Бас-көс киһи куруук харах далыгар сылдьар, ол иһин хаарыллар. Баҕар, Барыыһап сүрүн аньыыта – кини үөһэттэн анаммытыгар буолуо. Анаммытын эрэ боруостаары тук курдук толкуйдуур, этэллэрин хоту сылдьар эмиэ сөбө суох. Хамнаһы эрэ толуйа, соло туһа эрэ диэн соруктана сылдьар дархан уруйдаммат, улуута уруһуйдаммат.

Устуоруйаҕа хаалыы дуу, дьоҥҥо-сэргэҕэ ытыктаныы дуу, солону туран биэрбэт туһугар ууга-уокка киирэн, икки саары ыккардынан ырыта тыытыллыы дуу? Ону киин сиргэ үгэргээн, өссө хаартыскалаан аан дойду хараҕын далыгар ыйаабыттар этэ. Биһиги бэрисидьиэммитин итии хобордооххо уж курдук эргичийэр диэбиттэр. Айдааннаах РИК-Финанс утары холуобунай дьыала тэриллэн эрэрэ тугунан эргийэн тахсыа биллибэтин туһунан эппиттэрин ити курдук туустаан биэрбиттэр (http://asaratov.livejournal.com/4209195.html).

Ол аайы биһиги сирэйбит саатар, сахалар ааттара алдьанар. Соло солонон, сахалар сарсыҥҥылара онтон сатарыйар.

Били сир аннынан кэпсэллэр илэ иһиллэн, эттэнэн-сииннэнэн, туох эрэ мөкүгэ сыбаналлара кэллэ быһыылаах. Сокуону сорук-боллур гына оонньообуттара бэйэлэригэр эргийэн кэлэр күнэ-дьыла ыкта быһыылаах.
Ити курдук күөрт ыт күлүүтүгэр, эриэн ыт элэгэр барбыт дьон илбит иһигэр иһийэбит дуу, Ил Дархан дэнээччибитин тула, дьэ, түмсэрбит дуу? Бэлиитикэ кирдээх дииллэрэ тыл домоҕо эрэ буолбатах. Ол эйгэттэн ыраас тахсыбыт суох. Биир өлүүгэ сылдьан биккиллэллэрэ сокуон. Буруйдааҕы булан ылар уонна уустук. Арай, өрө оргуйан тахсаары гыммыт эйгэни эстэримээри, айдааны соруйан күөдьүтэн, кытыы киһини кыһарыйаллар, ол аата паары таһааран, хочуол итиитин тэҥнииллэр диэххэ сөбө дуу.

Онтон атыннык албакааттыыр кыах суох. Ил иһигэр ил бэйэтэ нэһиилэ иҥнэн сылдьарын, биир сололоох туһуттан түргэтэтэн биэрбэтэрбит ханнык.

Бу былдьаһыктаах быыһык кэмҥэ дархан хас тылын ыйааһынныах кэриҥнээх. Ама бүтүн холдинг тухары кини тылын-өһүн чочуйар чокуур өйдөөх суох муҥа дуу? Биитэр суруйан аһыыр дьону провокацияҕа уорбалаан үргүтэлээн кэбистилэр дуу? Сибис гынар дьонноро, сүбэһиттэрэ, илии-атах дьоно хамнастарын толуйар толкуйдара татымнаата дуу? Уоту ыыппыттарыгар утары уоту ыытан дуу, умуоруорар уус тылы айан дуу дьону уоскутар уолдьаста. Биитэр, тыала суохха мас хамсаабатынан, этиллэр сорҕото да оруннаах буоллаҕына, баҕа өттүнэн отставкаҕа барар суол баар.

Кырдьык албын аҥаардааҕынан, сымыйабыт кырдьык кыбытыктааҕынан, тылга тылынан хардарар куолута. Оруннаах буоллун, омуннаах буоллун.

Оттон ол иннинэ атын тыл-өс сүрдэнэр. Дархан бэйэтинэн биэрбит интервьютун ырытыы ыраатар. Баһылыкпыт уустаан-ураннаан саҥарарга эрэ аллаах диэччилэр кытары көһүннүлэр (http://www.yktimes.ru/glavnoe/kak-vsegda-egor-borisov-govorit-odno-a-delaet-drugoe/#more-14948).
Урут Барыыһабы утары холуобунай дьыала тэриллэн испитин саба туппуттара кытары оронно. Ол орооннор киһибитин талбыттарынан эргитэллэр, тугу эппиттэрин барытын толортороллор. Итинник салайааччы үрдүкү саламтаҕа туһалаах диэн түмүккэ кэлэллэр.

Эрэйдээх-буруйдаах РИК харычытыгар тэриллибит «Якутагроснаб» тэрилтэни Ил Дархан аймахтара салайбыттара аһаҕастык ахтыллар. Кини бииргэ төрөөбүт быраата Илья Афанасьевич Борисов нэдиэлэни нэдиэлэнэн арыгылыы сатаан баран, тэрилтэни моҥкуруоттаппыта сыыска түспэтэ. Ол киһи уолун ити тэрилтэ дьоно быһахтаан өлөрбүттэрин дьыалатыгар эмиэ улахан киһи аймаҕа уорбаламмыт эрээри, ууттан кураанах тахсыбыта кэпсэлгэ хат киирэр. Уопсайынан даҕаны, Ил Дархан сууттарбыт үлэтигэр орооһоро, кини тылыттан ол сокуон дьоно тахсыбаттара сараланар. Уонна, биллэн турар, ЧК тиэмэтэ күөрэйэр. Чурапчылар күтүөттэрэ Еремеев хааһынаттан харчыласпыт аатырбыта да, бэрисидьиэн көрдөһүүтүнэн көҥүлгэ тахсарын ааһан, Ил Түмэн дьокутаата, тутууга бастайааннай хамыыһыйа бэрэссэдээтэлэ буолбута холобурга барар. Ити курдук Уххан убайбыт сайтыгар Кугдаарап диэн куолуһут дарханы ырытан баран, Арассыыйа икки баһылыгар быһа туһулаан – Барыыһап болдьоҕун иннинэ боломуочуйатын устунан туран, Ил Дархан быыбарыгар кыттар түгэнигэр, Арассыыйа эбэ хотуну чахчы уоруйахтар уонна сүүлүктэр салайан олороллоругар букатыннаахтык итэҕэйиэхпит диэн түмүктүүр (http://uhhan.ru/news/2013-11-23-8787).

Кугдаарап диэн айыллыбыт аат буолара сэрэйиллэр. Онно улуу тойоммут туох диэн хардарарын кэтиир киһи элбиир.
Сыл түмүктэнэрэрэ чугаһыыр. Уотунан уһуутаппыт, кыһалҕанан кыһарыйбыт, саахалынан салыннарбыт, ууга кытары уһуннарбыт уһун сыл. Манна даҕатан этэр буоллахха, быйыл уокка 58 киһи былдьаммыт, уоттан сылтаан тахсыбыт хоромньу өрөспүүбүлүкэ үрдүнэн 8 миллиард буолбут.

«Алтан Сэргэ» архыыбыттан.

9 сентября, 2014 Главные новости

Добавить комментарий

*