Кыбыттарыы кыһалҕата (Салгыытын 3-һэ)

19 мая, 2015 в 1:48
кризис

Күн сирин уонна орто дойду олоҕо дэнэр тыынар, тыыммат эттиктэр барылара куйаар сыралынан (космическая тонкая энергетика) салайтаран олорор диэн түмүк оҥордоххо киһи-аймах олоҕор сүрүн баһылыгынан куйаар сыралын биир көрүҥүнэн өй буолар.

Оннук да быһыылаах. Тыынар тыыннаахтар ууһууллара сыдьаантан (ген) саҕаланар. Сыдьаан куйаар сыралын уонна кини сиргэ ситимин биир көрүҥэ, өй аттарыллан, чөкөтүллэн түүрүллүбүтэ диэн сабаҕалыахха сөп.

Өй туохтан да инникитин, сыдьаан үөскэххэ кубулуйан удьуор төрдө (зародыш) сайдыыта итэҕэтиилээхтик көрдөрөр. Балыктан, баҕаттан саҕалаан киһи үөскэҕэр тиийэ   сайдаллара бастарыттан саҕаланар. Ийэ иһигэр ситэр төрүөхтэр төбөлөрө урут күн сиригэр тахсаллар. Дьахтар төрүүрэ сатаммакка оҕото атаҕынан тахсарын, холобурга ылан,   киһи өйүнэн тиийиммэтин сахаҕа «төттөрү төрүөх», «таҥнары төрүөх» дииллэр.    Онон өй инники сайдан олоҕу-дьаһаҕы сааһылыахтааҕа киһи үөскэҕиттэн төрүөр диэри сайдара этэ сылдьар.

Олох-дьаһах туругун араҥаларыттан (социальное положение) киһи өйүн-санаатын таһыма уратылаһар диэн өйдөбүлүнэн олоробут. Ити олох-дьаһах өйү сааһылааһына буолбатах,  өй кыбыттарыыттан  муунтуйуута буолар. Атыннык эттэххэ, түмүк төрүөккэ төттөрү дьайыыта.

Кыбыттарыыны (кризис) харам санаа баайы-дуолу  былдьаһыытын дьайыыларын өй тобулан толкуйдаан таһаарыыта диир буоллахха, ону хайдах уодьуганнаан, сир үрдүгэр эйэ-дэмнээх, чахчы доҕордуу олоҕу тэрийиэххэ сөбүй?

Өй бэйэҕэ саба тардыныы киксэриитин кыайдахха эрэ   киһи аймах кыбыттарыылара суох олоруо этэ уонна оннук олоруон баҕарар. Итинтэн, киһи бэйэмсэҕин хайдах тохтотуохха сөбүй диэн ыйытык тахсан кэлэр. Айылҕа айан биэрбитин суох оҥоруллубат эрээри,  өйү бэйэтин эрэ көрүнэригэр буолбакка, этэҥҥэ сылдьарын толкуйдаан тобуларыгар айыллар.

Санаа ис хоһоонун салҕыы арыйарга социализмы туппут,   Улуу держава буола сылдьыбыт Сэбиэскэй Сойуус сайдыытын идеяларын тумулуктарын ыараҥнатан анааран ааһыым.

Социализм —  тыл өйдөбүлүнэн да, соруга да бар дьон олоҕун-дьаһаҕын туругун таһымын муҥутуур үрдэтиигэ. Сэбиэскэй Сойуус ону ситиһэр идеятын төрүт олоҕо үлэ оҥоруутун (производственные силы) судаарыстыба таһымыгар уопсай бас билиигэ  ылан, былааннаахтык сайдыы этэ. Ол аата дойду экэниэмикэтин сайдыытын бырабыыталыстыбанан биир ситимҥэ киллэрии  этэ. Айылҕаҕа  кыратыттан улаханыгар уонна төттөрү өттүгэр, бэйэ бэйэлэрин үтүктүһэллэр диэҥҥэ олоҕурдахха, судаарыстыба киһи этин-хаанын үлэтин улаатыннаран, майгыннатан, атын сир олоҕун эйгэтигэр үтүгүннэриллибитэ. Киһини мэйиитэ салайарыныы, бырабыыталыстыба дойду экэниэмикэтин биир агрегат эбэтэр киһи организма үлэлииллэрин курдук былааннаан дьаһайан хамсатара туох куһаҕаннаах буолуой.

Олох кырдьыга этэринэн,  дьон-сэргэ олоҕун баай-тот таһымҥа таһаарыы, табаары оҥорон таһаарар баайы-дуолу ким бас билэриттэн тутулуга суох барыахтаах. Арассыыйаттан атын сайдыылаах дойдуларга баар даҕаны. Холобур, Скандинавия  тумул дойдуларыгар

Өскө уопсай бас билиигэ судаарыстыба экэниэмикэни барытын иилиир-саҕалыыр, оттон биирдиилээн бас билиигэ үлэ оҥоруутунан экэниэмикэтинэн дьарыктаммакка, нэһилиэнньэтин олоҕун-дьаһаҕын сайдыннар соруктанар. Хамсатар үбэ эргинии барыыһыттан булбакка, аҥаардас нолуогунан хомуйар. Этиллибити сааһылаатахха, социалазмҥа судаарыстыба ханнык баҕарар бас билии тутуллааҕыттан тутулуга суох тиийиэххэ сөп. Уопсай бас билиигэ эрэ олоҕуруохтааҕын курдук өйдүүр сыыһа,

Кытай Норуодунай Өрөспүүбүлүкэтин бас билии икки көрүҥүн тэҥҥэ сайыннарар экэнэмиичэскэй бэлиитикэтэ чаҕылхайдык холобур. Биирдиилээн уонна уопсай билиилэр сэргэ сайдалларыгар тахсар ньымааттаһыынан түөкүннээһини уонна уорууну кытайдар кытааных эппиэккэ тардаллар, өлөрүүнэн буруйдуурга тиийэ.

Эмиэ сэбиэскэй саҕанааҕыны ахтыыһыбын. Оччолорго уопсай буоллар эрэ билсии-көрсүү таһымыгар тарҕаныахтаах уонна уора-көстө ылыллыахтаах диэн толкуй сырса сылдьыбыта. Баартыйа салайар баһылыктарын байар баҕа тууйа туппута. Кистээн харана, ыла сатаан баран, соруйан кыбыттарыыны тэрийэн, уопсай бас билиини суох оҥорон, биирдиилээн бас билиигэ көһөн, норуот уопсай баайа дэнэри, эмиэ билсии-көрсүү эргимтэтин иһинэн, сокуон сурунан, үллэстэн ылбыттара.

Тоҕо итини санаттыҥ диэтэххэ, Арассыыйаҕа байар баҕа балысхана былыргыттан баһаам уонна намырыы илик. Куһаҕана, судаарыстыба сокуоннарын көмөтүнэн, бар дьону сүүлүктээһин өрөгөйдөөн иһэр курдук. «Инфляция», «кризис» диэн тыллар эргинээччилэргэ,  хомуньуустары өргөстөөх санаалыыр, охсуһууга уһуйар «интернационал» ырыа курдук, дьону сүүлүктүүргэ турунуҥ диэн дорҕоонноох ыҥырык буолар ньиргийэн иһиллэр.

Нэһилиэнньэ олоҕо-дьаһаҕа, Сүрүн Сокуонунан (конституция) ылыммыт муҥур былааһын, туох толкуйдаах-санаалаах киһиэхэ   эрэнэн биэрэритэн улахан тутулуктаах. Ону баара, салайа олорор сололоохтор норуот талар көҥүлүн ньымааттаһыы сиэтиитигэр киллэрбиттэрэ ыраатта, соторунан тохтуур сибикитэ суох.

Ханнык баҕарар эттик атома ыһыллыбатаҕына эттик быһыытытынан уларыйбат туруктанар, ол кэриэтэ судаарыстыба дьонун сүрэ-кута чөл, санаата сайаҕас буоллаҕына  сайдар. Арассыыйа сайдар инникитэ, үөһэ суруйбуппунан, элбэх кэтэмэҕэйдэрдээх.

Холобур кэриэтэ СӨ-тин ыллахха, нолуогунан хомуйбутун уонна Федерация оннук хомуйбут  хааһынатыттан ааттаһан, үҥэн-сүктэн,  «дук» гыннаттарбытын аттаран бүддьүөтүн оҥостор. Эбии үп киллэринэр үүт-хайаҕас суох. Сири түүлээһиҥҥэ биэрбэттэр, хамсыыр-хамсаабат баайдары бастарын батарбыттара. Сатаан тэрийэн үлэлэтэр кыахтара суоҕун билинэн, оннооҕор саамай барыыһы киллэриэхтээх аламаас тааһы хостоон туһаҕа таһаарар тэрилтэлэрин «Нижнеленскэйи» босхону эрэ үрдүнэн атыылаабыттара.

Босхону эрэ үрдүнэн диир түһэрэн этии буолбатах. Инники, үп баай-дуол чочу кэмҥэ ылыныллар кээмэйэ  диэни кытта тэҥҥэ тутан толкуйдаатахха иһин эриэнэ тахсар.

Экэниэмикэҕэ кэм кээмэйэ (временной фактор) диэн дириҥ ис хоһоонноох өйдөбүл баар. Кэм харчынан кэмнэммэт, кэм харчыны дьаһайар. Ити өйдөбүлтэн саҥаны оҥорон үлэлиир турукка киллэриэхтээҕэр, бэлэми туһанан  баллайар барыыстааҕын билбэт буолуохха сатаммат.

Өссө эрэдээгин эттэххэ, СӨ-тэ бар дьон бас билэр үбүн бүддьүөтүн хайдах туттарый? Нэһилиэнньэ итэҕэллээх дьоно хомуллан үлэлиир Ил Түмэннэрэ быһаарар диэхтэрэ. Эмиэ төннөн кэллибит, хайдах көрүҥнээн быыбары ыытар, ол түмүгэр кимнээх дьокутаат солтугар олороллорун боппуруоһугар.

СӨ-тэ аахсыйанан бас билиилээх тэрилтэлэр саҥа тутууларыгар үп бөҕөнү үөрэ-көтө үтэн биэрэр. Тутуу кэмин кылгатыһар. Туһанааччы барыыһын киллэринэрин эрдэ саҕалыыр. Үбүнэн көмөлөспүт нэһилиэнньэ онтон кэттэгэй кэппиэйкэни туһаммат. Холобур, тимир суол тутуутугар өрөспүүбүлүкэттэн үп бөҕө угуллубута.  Нэһилиэнньэ тимир суолга босхо таһыллыа буолуо дуо? Саарбах соҕус ини. Кыһайтарыыга сигэнэн тарыыптарын   үрдэтэллэрэ баҕас саарбахтаммат.

ГРЭС-2 тутулла турар. СӨ-тэ кырата суох үбү кыттыһыахтаах. Нэһилиэнньэ уларсыбыт харчытын хайдах өҕүтэн ылар?

Өскө өрөспүүбүлүкэ биэрбит харчытын аахсыйаҕа кубулутан, кыттыгаска киирэрэ буоллар син тугу эмэ күүтүөххэ сөбө. Дьэ оччоҕо, биирдиилээн бас билиини умсарбакка эрэ Кытай Норуодунай Өрөспүүбүлүкэтэ барар экэниэмикэтин суолун тутуһуохха сөп этэ. Судаарыстыба куһаҕан хаһаайын диэһин кимнээх былааска олороллорун, сирэй эппэккэ кэдэритэн этии, түөкүннээһини билинии. Биир дойдуга кыһайтарыы силиһин-мутугун ылбаккын. Киһи-аймах өйө-санаата ситтэҕинэ ол кыаллыа. Ону аныгыскы суруйуубар.

 

Уһук Уйбаан

(Салгыыта угуллуо)

 

 

19 мая, 2015 Главные новости Новость дня

Добавить комментарий

*