Кырдьык сыыһын тиэрдээри таайбараҥы таҥыахпыт

7 июля, 2014 в 4:16
Цензура

Олорон кэлбит олохпутун биир үтүө күн тиэрэ эргитэн, үөйбэтэхпитигэр үктэннэрбиттэрэ, түһээн да баттаппатах суолбутугар үтэйбиттэрэ.

Наар бииргэ биһиктэнэн олорбут бэйэбитин эгэлгэ иһигэр киллэрэн, мэйиибитин эргиппиттэрэ. Харахпыт аһыллан, атын баарын амсайан киһи тэҥэ сананан эрдэхпитинэ ол үлүгэр дэлэйтэн матараары гыннахтара үһү. Быыс сэгэйбитинэн көрө түспүппүт өйбүт дуомун дьалкыйбыта суола-ииһэ суох хаалбатаҕа чахчы.
Матарбыттарын тугунан толуйан, туох бэйэлээҕинэн солбуйан, атын улуу оҥоруктарыттан аралдьыталлар? Тосту-туора дьаһанаары гыннахтарын аайы кыра кыһалҕаларга болҕомтобутун хататаннар, мэһэйэ суох оҥоруохтаахтарын оҥороллор. Устунан букатын да дьону кытары аахсыбат аакка бардылар. Сорук-боллур сокуонньуттар суругунан эрдэттэн бэлэмин оҥордохторо. Мыык да дэппэт гына. Туох да бэйэлээх дьаабыны саҕалаатахтарына утарылаһар кыах аны суох. Олорон биэрэрбитигэр эрэ тиийэбит. Санаабытын тэбээн саатыыр сирбитигэр аһаҕастык айдаарар аны табыллыбат. Харчыга ыйыахтара, хаайыахтара. Наай гыннар бэйэ ыккардыгар мөҕүттэн тыыммытын таһаарыахпыт эбитэ буолуо. Тыын таһаарар ньымаларбытын да сокуонунан боптулар. Үөхсүөҥ иһин сокуону кэспит аатырыаҥ, табахтыаҥ иһин эмиэ табыллыбат, арыгы иһэри аччата сатаан баран бэйэлэрэ ночооттоох тахсыахтарын сэрэйэн, өйдөрүн өссө атыҥҥа сынньан эрэллэр.
Сокуон сололоохтору, туспа солотуулаахтары эрэ араҥаччылыыр, кыра-хара дьонтон күрүөлүүр.
Көрүнньүк да буоллар, көҥүллээх эбит буоллахпытына, түүл-бит кэриэтэ көстө-биллэ түһээт туох да содула суох суураллан хаалаахтаата.
Хайыахпытый, хайа диэки хайысхалаталларын хоту хардыылаахтыыр буоллахпыт. Хотуулаах буолуо – ким санаатын самнары баттыыр, саҥатын саба тутар биитэр букатын саҥатыттан матар сөп түбэһиик бэрдэ.
Биир киһи үйэтэ биллэр. Саатар оҕолорбут быыһык кэннинээҕи бүдүмүк бүүрүктэнэн, саҥа эргиир саҕаланарыгар тиийэн, арыый атын олоххо тиксэллэр ини. Сырдык сыдьаанабын дэнээччи да бу сиргэ букатын кэлбэт.
Суруйар дьоҥҥо уустук кэмнэр үүннэхтэрэ. Кырдьыгы кыйа хаама сылдьан онон-манан эргитэн суруйбуппут быыһыгар кыбыппыт кырдьыкпытын таайтаран этиибитин була оонньуур буоллаххыт. Аныгыта айымньы үксэ таайбараҥ, ыстатыйа кытары ыына-мээнэ хаххалаах кистэл сурук буолуо турар.
Тус санааланыы уот субурҕатын бэйэҕэ туһаайыы.

7 июля, 2014 Главные новости

Добавить комментарий

*