Кыыс оҕо дьоло

8 ноября, 2014 в 2:13
images

***
Кыыс оҕо дьоло тугуй,
Бу сиргэ, орто дойдуга?

Биирдии киһи араастаан,
Эппиэттиирэ буолуо,

Ол эрэн бэйэм санаабар,
Кыыс оҕо дьоло диэн:
Таптыыр, өйдүүр -өйүүр,
Уола аттыгар буолара.

Кырачаан, күн тэҥэ
Көмүс чуораанчыга,
Бастакынан сарсыарда
«Ийэккээ» диэн ыҥырара.

Сырдык сулус кэриэтэ
Истиҥ мааны доҕотторо,
Мэлдьи бары бииргэ
Кини тула буолаллара.

Тапталлаах ийэтэ, аҕата,
Убаастабыллаах дьонноро
Дьоллоохтук олороллоро,
Ол буолар кини – дьоло…

***
Оо, көҥүлбүн дии мин,
Барабын киэҥ сиринэн,
Сиккиэр тыалы эккирэтэн
Сөрүүн салгыны эҕирийэбин,

Ыраас хонуу устунан
Аа-дьуо хааман иһэн,
Лыах сибэккигэ олорорун
Көрөн ытыспар ылабын.

Сылаас ардах түһэн
Мас анныгар саһабын,
Онтон сүүрэн тахсан
Тэбис-тэҥҥэ мэниктэһэбин.

Оо, бу дьолун диибин,
Көҥүл хаамабын, сүүрэбин,
Оҕолуу үөрэбин-көтөбүн,
Кырдьык, мин дьоллоохпун…

***
Мэлдьи соҕотох кыысчаан,
Тоҕо тулаҥ кураанаҕый?
Тоҕо сүрэххин мууһурдан
Барыларын эн тэйитэҕиний?

Ким даҕаны билбэт эйигин,
Дьиҥ бэйэҕин көрдөрбөккүн,
Тугу куруук кистии тутаргын
Билбэттэр баар дьонноруҥ.

Эн иччитэ суох суолунан
Олоҕун устун баран иһэҕин,
Эргиччи эргийэн көрбөккүн,
Барытын хааллара бараҕын.

Мэлдьи соҕотох кыысчаан,
Дьонтон арахсар уратыгын,
Соҕотох, бэйэҥ сылдьаргын,
Эн быдан ордорон талаҕын…

***
К~ыыс аанньал, кэпсээриий эн,
Ы~раайга хайдах сылдьаргын,
Ы~раах дуо, олорор дойдуҥ?
С~ырдык дуо, эргиччи тулаҥ?

А~ас эн түүлбэр көстөҥҥүн,
А~аптаах түүнү бэлэхтээҥҥин,
Н~аар сылаастык көрсөммүн,
Нь~ургуһун сибэкки ыламмын
А~а-дьуо эйиэхэ уунуоҕум,
Л~ыах кэриэтэ көҥүл киһим…

Аныыбын истиҥ доҕорбор
Виктор Романов — Странник-Айанньыкка

***
Баар этэ кини хараҕар
Улахан таптал кыыма,
Уол оҕо тэбэр сүрэҕэр
Истиҥ сыһыан сылааһа.

Кыһын хаар түһэригэр
Аттыбар баар буолбута,
Кылгас күн тыгарыгар
Доҕорум ааттаммыта.

Баар этэ ис дууһатыгар
Киһи билбэт кистэлэҥэ,
Тугу тутарын бэйэтигэр
Кэпсээбэт буолара мээнэ.

Мин махталым тылларын
Хоһооммунан тиэрдэбин,
Олохпор көстөн ааспытын
Умнубаппын диэн этэбин…

Аныыбын күн тэҥэ дьоммор
Ирина Колодезникова — Ымыыга
Анна Баишева — Туолаанаҕа

***
Олохпор сырдык сулустарым,
Күнҥэ тэҥниир күндү дьонум,
Куруутун бииргэ миигинниин
Мэлдьи буоларгытыгар үөрэбин,

Санаа үллэстэр дьүөгэлэрим
Биир дууһа кэриэтэ буолан,
Барытын эрэнэн кэпсээммин
Санаабын чэпчэтэн ылабын.

Күнчээннэрим, кыргыттарым,
Сүтүктээҥҥит долгуйаргытын,
Ахтаргытын-суохтуургутун
Олуһун даҕаны сыаналыыбын.

Истиҥ доҕордоһуу сыһыанын
Утары ууммут чыычаахтарым,
Эһиэхэ суруйбут хоһооммун
Анааммын мин бэлэх ыытабын…

***
Биирдэ эмит толкуйдаан,
Ырытан көрбүккүт дуо?
Доҕоргут олоҕун устун
Хайдах айаннаан иһэрин.

Санаатыгар тугу кистээн
Саҥата суох сылдьарын,
Туохтан эмискэ хомойон
Хараҕын уутун тоҕорун.

Биирдэ эмит толкуйдаан
Ырытан көрбүккүт дуо?
Доҕоргут сүрэҕэ туохтан
Соҕотохсуйан ыларын.

Тоҕо чуумпуга талаһарын,
Элбэх дьону туоратарын,
Тугу ситэри кэпсээбэтин,
Кимҥэ да, тугу да эппэтин…

ххх

Кэллим дойдубар бүгүн
Мин төттөрү төннөммүн,
Сири-дойдуну көрөммүн,
Доҕотторбун көрсөммүн.

Тапталлаах Горнайым,
Көрүстүҥ эн үөрэнҥин,
Күүппүккүн биллэрэнҥин
Хоту тыалын түһэрдин.

Кылбаа маҥан хаарынан
Тула төгүрүччү бүрүллэнҥин,
Көстөҕүн күлүмүрдээнҥин,
Өссө тупсубукка дылыгын.

Таптыыбын мин Горнайбын,
Төрөөбүт ийэ дойдубун,
Ханна да сылдьаммын
Наар ахтабын, санааммын…

***
Көрөбүн таһырдьаны түннүгүнэн,
Бытааннык хаар үҥкүүлүү түһэн
Төгүрүччү маҥанынан бүрүллэрин,
Эргиччи күлүмүрдээн сырдыырын.

Тахсаммын сүүрэбин ыллык устун,
Кэннибэр быраҕа барабын барытын,
Тула өттүм уу чуумпу, соҕотохпун,
Ол эрэн, бүгүн олус дьоллоохпун.

Тымныы тыал аа-дьуо иһиирэн
Сылаастык наҕыл-наҕыл үрэн,
Кыра оҕолуу мэниктии сырсан
Сирэйбин таарыйар кычыкалатан.

Маҥан хаар кыырпахтарын ылан
Көтүтэбин мин үөһэ араастаан,
Оонньоһобун кинилиин үөрэн
Кыһынҥы күлүмнэс доҕорбунаан…

© Марика К – Күндү

8 ноября, 2014 Главные новости

Добавить комментарий

*