Кэлбит эрэ олохсуйар дойдута

10 июня, 2014 в 0:12

Сөмөлүөт сороҕор тоҕо эрэ кэлэн быстыбат. Ардыгар пуорка ынах туолан, хаһан үүрүөхтэригэр диэри үөһэнэн элиэтии сылдьааччы.

Ийэм, убайым Сэмэн буолан икки күнү быһа сөмөлүөт манаатыбыт.

Антошка самолет

Кэмниэ-кэнэҕэс көтөр көлө кэлэн айаннаатыбыт. Куоратчыт тэҥэ сананан испитим этэ. Арай ийэм куттанан, миигин түннүгүнэн да көрдөрбөт, хам баттаан баран сытар. Онтун быыһыгар Сэмэни көхсүгэ табырҕатар. Сөмөлүөппүт Куокунуга түспүтүгэр биһиги тахсан баран хааллыбыт. Мин куораттаан бүттэҕим ол. Сарсыныгар таһырдьа оонньуу сырыттахпына ийэм Сэмэнниин элэс гынан хааллылар. Ол аата куораттаабыттар. Сэмэн үллэр үйэтигэр Дьокуускай диэни ол көрдөҕө.

Якутск в 70 годы

Ийэм үлэтинэн командировкаҕа син барааччы. Аҕабынаан эдэрдэригэр дойдуну биир гына кэрийбит дьоллоохтор. Бүтүн дьиэ кэргэнинэн Москубаҕа Кыһыл болуоссакка хаамсыахпыт диэн аҕам кэпсэл оҥосторо да, үлэттэн биир да күнү сайынын ырыбыллаан соннук барбатахпыт.

Духи одеколон Красная Москва

Барыта кэлиҥҥигэ үтэйиллэн иһэрэ. Ол кэлиҥҥибит биир сиргэ хараҕалатыан хантан билиэхтэрэй. Онтон бара да сатаабат буолбуттара. Наар ынах, суолу тулуйуом суоҕа диэн дьиксинии.

Ийэм сөмөлүөтү тулуйбатынааҕар куттанара ордук быһыылааҕа. Аан маҥнай сөмөлүөтүнэн мин кинилиин Мирнэйгэ диэри көтүспүтүм. Дьэ, түһүү-тахсыы, эмискэ аллара сурулааһын. Мирнэй пуордугар самолеттан тахсаан сиргэ лах гына олоро түһэн эрэ баран һуу диэбиттээхпин. Мин да сөмөлүөтү соччо сөбүлээбэппин. Сиргэ син тирэхтээх курдуккун, оттон ол кыырай үрдүккэ эйигин быыһаатаҕына таҥара эрэ быыһыыр ини.

Сөмөлүөт анаан почтаны таһара. Киһи ыарыйдаҕына кытары кэлэрэ. Ыһыах кэмигэр ойууру уоттан харыстааҥ диэн суруктаах листовкалары кытта ыһара. Ким элбэҕи хомуйар эбит диэн оҕо аймах куоталаһан турардаахпыт. Мин эбэм үйэтигэр иккитэ дуу «Антошканан» көтөн төрөөбүт Хоротугар баран кэлбитин кэпсэл оҥосторо.

Сөмөлүөттээҕэр оччотооҕу оҕолорго бөртөлүөт кэлэрэ сонун этэ. Тыаһа иһилиннэҕинэ бууппут быстарынан түһэр сирин диэки сырсарбыт.

Вертолет

Билиҥҥэ диэри сөмөлүөт миигинэ суох көтөн хаалбыт, түргэнник сүүрэн тиийбэккэ бөртөлүөтү көрүмүнэ ыыппыппын диэн түһүүбүн ээ.

Бөртөлүөппүт бөһүөлэк ортотугар ырааһыйаҕа түһээччи. Ону да ынах суох буоллаҕына. Халлаантан түспүт нууччалары көрүү-истии бөҕө. Нууччалары атыҥырыыр оҕолор буолбатах этибит. Инньэ саха маҥнайгы алмааһа көстүөҕүттэн Кириэстээххэ омук дьоно тоҕуоруһара. Кэлин үрдүк күүрүүлээх линияны тардар нууччалар быстах олорон үлэлээбиттэрэ. Вагончиктарын аттыгар быа тардан таҥастарын сууйан ыйаабыт буолаллара. Түннүк оҕолооҕо сиитэс сабыылааҕа. Мин итинник вагончикка олоруохпун тоҕо эрэ баҕарар этим. Биһиги сахха ыра диэн атын, туолбат, көннөрү санааны аралдьытыы диэн өйдөнөрө. Хараххар оҥорон көрөрүҥ хайаан да туолар диир үйэҕэ кэлэн санаатахпына, вагончигы эрэ баҕарар буолан баччааҥҥа диэри дьиэлэнэ илик инибин. Дьиэлэр бааллара да мүччү туппутум.

Долгун-долгун тутуу нууччалара кэлэн бараллара. Хайаан да ким эрэ биһиги Кириэстээхпитигэр дьолун булан хаалара. Биһиги бэйэбит дьиэбитин оннук нууччалар туппуттара. Маҥнай саас пилорамаҕа мас кэртэрбиттэрэ. Ийэм күн аайы баран ас астаан аһатара. Борщ миинин иһээри мин онно барсарым. Дьиэҕэ да борщ баар буолара да, пилорама киэнэ ордук минньигэс курдуга.

Ол нууччаларбыт бэрт уһуннук ылахтаһан дьиэбит көҥдөйүн туппуттара. Иһэллэрэ мэһэйдээн бүтэн-оһон быстыбаттара. Онно биир грузин баара. Миигин наһаа оҕоргуур этэ. Көтөҕөн олороро эҥин. Ийэм кыыһырара, көтөхтөрөрбүн боборо. Мин тоҕотун кыайан өйдөөбөтүм. Билиҥҥи курдук кыра оҕолорго, уол буоллун, кыыс буоллун, дураһыйар дууһалар ол саҕана суохтара да, сэрэҕэдийэр быһыылааҕа.

Сопхуоска да нууччалар үлэлииллэрэ. Нина Ивановна Санникова, Валерий Яковлевич Тырин тэллэйдьиттэрин билигин да ахталлар.

Тэллэй

Ол саҕана тэллэйдиэхтээҕэр сиэри таһынан сир астыыр да суоҕа. Сиир барыанньаҕын хаһаанныҥ да бүтүүкэтэ. Морозильник эҥин диэн суох этэ буоллаҕа. Сайын эккин подвалга уурарыҥ наар сыттанан хаалар. Сайыҥҥы эт кыратык сыттааҕын буолуохтаах буолуохтааҕын курдук ылынарбыт. Ыһыахха эрэ сибиэһэй эти амсайарбыт. Хабырыыска диэн киһи буһа-хата эт эттиирэ. Мин кинини ыһыахтан ыһыахха эрэ көрөрүм. Теплица диэн көрүллүбэт. Мин дьонум хойукка диэри парникка огурсу үүннэрэллэрэ. Биирдэ ревень диэни ыспыттара олох кэлиҥҥэ диэри бэйэтэ билэринэн үүнэр эбит этэ. Ону сол сатаан сиэбэтэхпит. «Книга о вкусной и здоровой пище» диэҥҥэ компот оҥоһуллар диэн этэ эрээри сатамматаҕа эбитэ буолуо.

компот из ревеня

Кириэстээххэ кэлии дьон улам элбээн испитэ. Кэлбит эрэ олохсуйар дойдута. Арай партком сэкиритээрдэрэ үрдээн бараллара. Биһиги дьиэбит иннигэр уопсайга парткомнар уонна сопхуос дириэктэрэ аах олороллоро. Самойловтар оҕолорун кытары оонньуур буоларым. Самойлова Галялыын кыһын сибиинньэлэрин хотонун хоп курдук оҥорон оонньуур дьиэ гыммыттарыгар ыаллаан оонньуур этибит. Биитэр бүтүн түөлбэнэн сасыһан эҥин оонньуурбут. Хайа эрэ кэмҥэ мин наар улахан кыргыттарга сыстарым. Сороҕор кыралары кытта бииргэлэһэрим.

Биһиги дьиэбит биир өттүгэр сопхуос кылаабынай бухгалтера Савва Николаевич Саввинов дьиэ кэргэнинээн олороро. Кыргыттара Роза, Венера миигиттэн олох улахаттар. Ийэлэрэ Нааста почтаҕа үлэлиирэ. Роза миигин мэҥэстэн бэлисипиэтинэн почтаҕа диэри илдьэрэ.

Итинник дьиэ хочуоҥкалара силбэһэн турар буолааччы. Ол кэннигэр наадата суохтарын мунньар дьааһык турара. Эргэ кинигэни бырахпыттарыгар «Тимур уонна кини хамаандата” диэн Гайдар кинигэтин сахалыы тылбааһа баара.

images

Мин биир-биэс тыла суох иҥэринэн, сөбүлүүр кинигэлэрим кэккэлэригэр киллэрбитим. Оҕолорго аналлаах итинник чараас кинигэлэри мин оҕолорум кэлин аахпыттара. Икки-үс үлбүрүйүүнү тулуйумуна дуу, сороҕун бэйэм суох гынан дуу, билигин биир да кинигэ ордубатах.

Саабалаах дьиэ туттан көспүттэрин кэннэ Оскуола дириэктэрэ Дмитрий Сергеевич Игнатьев дьиэ кэргэнинээн олоро сылдьыбытттара. Онтон Борис Степанович, Варвара Алексеевна Трофимовтар киирбиттэрэ. Ол саҕана биһиги диэки тэлэбииһэр саҥа үөдүйэн эрэр кэмэ этэ.

телевизор

Маҥнай Баишевтарга эрэ баара. Кинилэр эрэ үрдүк антенналаахтара. Биирдэ аҕабын Дьокуускай тэлэбиидэнньэтэ көрдөрөр диэбиттэригэр анаан тиийбиппитигэр хаар быыһынан туох да бэйэлээх омоонун булан көрбөтөхпүт.

Трофимовтар тэлэбииһэрдэннилэр. Биһиги киэһэ ахсын кэриэтэ киирэн, фигурнай катаниены эҥин көрөрбүт. Мин утуйар хоско үөһэнэн эркин ханаппаакыта түһэн дьөлөҕөстөммүтүнэн уоран кылатан кытары көрөрүм. Киирэр аан аһылыннаҕына, харахпар сыыс киирэр буолара. Бэйэбит, арааһа, саҥа дьиэҕэ көһөн киирэн баран биирдэ тэлэбииһэрдэммиппит. «Вечный зов» диэн маҥнайгы сэбиэскэй сериалы көрөр дьолго тиксибиппит.

Ити өрүс үрдүнээҕи уопсай дьиэҕэ дьиҥнээх оонньуулаах оҕо сааһым  ааспыт эбит. Сэбиэскэй былаас соҥнообут сырдык ыратын туолуута кэлэр кэмҥэ кэһиилэнэр этэ эрээри, дьиҥ олохпут да онно чугаһыы сылдьыбытын туоһулуур улахан кыһалҕата суох кэрчик кэм. Биитэр оҕолорго үчүгэйин эрэ үрүмэлиир буоланнар, толору дьоллоох курдук сананан ылбыппыт эбитэ дуу?

ЧЭГДЭ.

 

 

 

 

10 июня, 2014 Главные новости

Добавить комментарий

*