Леонид СЕРГЕЕВ «ньомуой» ролига эбэтэр Березин тиһэх “куоһура”

12 сентября, 2014 в 5:27
Сергеев Березин

Быыбар буолара бу кэллэ. Тиһэх куоһурдар хостоннулар, эҥин дьиктилэр күөрэйдилэр.

Сунтаар улууһугар баар хартыына атыттарга да баара биллэр.

Быыһа суох былакааттар ыйаннылар. Березиҥҥэ да Борисовка эрдэттэн «галочкаламмыт» «бюллетень образецтара» кытары ыйаннылар.

Тэлэбииһэринэн реклама акаарыларга анаммыттыы хатайданна. Онно да биир биири сабырыйа сатыыра билиннэ.
ТНТ канаалга хандьыдааттар роликтара аһара бэркэ бараллар. Арай Ил Түмэҥҥэ Сунтаардааҕы быыбардыыр уокуруктан депутакка кандидат Леонид СЕРГЕЕВ ролига эрэ ньомуойдарга анаммыттыы саҥата суох бара турар. Оригинала – ролик ролик курдук, хартыыҥка саҥанан доҕуһуолланар. Тэлэбииһэргэ киирдэ да – ньим барар.

Ама да атахтыы, була сатаабыт иһин, сүрэ бэрт диэбэккит дуо?

Маҥнай утаа табаарыс Березин хаардыы хаамабын, праймеризка бастаабытым, миигин билбэт буолан киирсэр ини диэн тылласпыта этэ.

Тиһэҕэр дьыала атыннык эргийээри гыммытын билэн итинник көрүдьүөс ньымалары туттан эрдэхтэрэ дуу?..

Информация тахсаатын кытары ролик саҥаланна. Ол оннугар атын моһуок түгэннэр күөрэйдилэр.

Түмүктүүр күн диэки ыал-ыалы кэрийэр агитатордар Борисов икки Березин икки килэйбит буклеттарын почта дьааһыктарыгар уга сылдьан, таарыйа Сергеев былакааттарын хайыта тыыттылар.

Агитатордарбыт бэйэбит биир дойдулаахтарбыт, күннэтэ көрөр дьоммут эбээт.
Ама да быыбар дьону икки аҥыы хайыта оонньообутун иһин, күн сарсын чуумпу күн, өйүүн быыбар буолан, олохпут оннугар түһүө эбитэ буолуо.

Ол хартыыҥканы хайыта тыыттахха Бэриэһин бэрдэ бэргиэ эбитэ буолуо дуу?..

12 сентября, 2014 Главные новости

Добавить комментарий

*