Надежда РУМЯНЦЕВА-НӨНҮӨҺЭ: Алта мөһөөктөөх собо

26 мая, 2015 в 4:40
загружено

Киһи аайы хайдах собо сиэн маннык буолтум туһунан дакылаат бөҕө. Таарыччы, баҕар, өлөн хаалыам диэн страховкаланан барыларын кытта истиҥник быраһаайдастым.

Уонча сыллааҕыта сайын бүтэһик күннэригэр кыра уолум Тойбохойго күүлэйдээн кэллэ.

Дьүөгэм кэһиитин биир биэдэрэ лэһигирэс соболору ыыппыт, онтубун ыһаарылаан сырдьыгынаттым. Ол сахха икки этээстээх уопсайга олоробут, балык ыһаарытын сыта минньигэс баҕайытык иһинэн-таһынан тарҕанна. Бүтэн баран ырыа тойук бөҕөнөн дьиэбин сууйан саҕалаатым, оччолорго түргэним тарҕаным дэлэ дуо.

Ол бириэмэҕэ тастыҥ бырааппыт «Новай” сопхуостан оттоон бүтэн Сунтаардаан иһэннэр миэхэ массыына күүтэр буоллулар. Алталар. Ийэм тоҕо эрэ соботуттан көҥөнөн ууран кэбис диэбитин, айан дьоно аччыктаан иһэллэр, собобут буспут сыта дьикти диэн куолулаан остуолга уурдум. Дьиҥэр, ийэм көҥөһө суох, дэлэй эмээхсин этэ ээ.

Уолаттар аһаан бүтэн, массыыналара кэлэн махтал бөҕө буолан бардылар. Аны бэйэм оҕолорум киирэн аһаатылар, идэлэринэн сэсиэт оҕолоро эмиэ маппатылар. Дьиэбин салгыы сууйа-сото сырыттым. Көрдөхпүнэ, ийэм тэриэлкэҕэ собо тута-тута саалаҕа тэлэбииһэрин иннигэр баран сиир. Куукунньабын хомуйа киирбитим — икки эрэ собо ордубут. Аны мин ыксаатым, көрдөрбүтүнэн собобуттан матар буоллум. Түргэн үлүгэрдик илиибин суунан, биир собом үрдүгэр түстүм. Саҥа ыраастаан сиэн испитим баара уҥуохха хардым, куолайбын ойоҕоһунан батары киирдэ. Эҥин араастаан куух-хаах буоллум да, туһа суох. Аны төбөм биир эрэ өттүгэр хайыһар буолла, ыксал тирээтэ. Ийэм олус куттанна, сэсиэттэри ыҥырда. Туһа суох, өлөр буоллум диэн ытыыбын. Ийэбин эн көҥөнөҥҥүн бу буоллум диэн хомуруйабын. Быраас кэлэн, сарсын Сунтарга хирурга киирэн ыллаттар диэн дьаһайда.

Сарсыарда таксибар түөрт мөһөөкпүн, кэлэр-барар бырайыаспын биэрдим. Сирэй-харах дьаабы, түүнү супту ыгыллыбыт сирэй туох аанньа буолуой. Эбиитин сэсиэттэр таҥнары турдахха түһэр диэн таҥнары тутан сордообуттара, сирэйим дыҥ курдук.

Киирэн хирурга көрдөрбүппүн, ыраах баҕайы киирбит быһыылаах диэн туох да көмөнү оҥорбото, оннук төннөр буоллум. Киһи аайы хайдах собо сиэн маннык буолтум туһунан дакылаат бөҕө. Таарыччы, баҕар, өлөн хаалыам диэн страховкаланан барыларын кытта истиҥник быраһаайдастым. Ол сылдьан сэсиэт кыыспын көрүстүм. Уолун балыыһаҕа киллэрбит, миигин кытта барыс, ыалым «Камаһынан” кэлсибитим, босхо барыахпыт диир. Мин, дьиҥэр, таксибар төлөөтөҕүм дии, кыыспар доҕор буолаары уонна массыына билигин төннөөрү турар буолан сөбүлэстим. Суоппарбыт тимири ыйыстыбыт курдук саҥата суох киһи. Саатар массыынатын иһэ кирэ-хоҕо дьоһун.

Тиийэн кэллибит. Түһээри гыммыппар төлөө диэтэ, мин соһуйан кыыһым диэкки көрөбүн, кыыһым саҥарбат. Кыйаханан, кирдээх баҕайы массыынанан кэллим диибин. Ону буоллун, эмэһэҥ тиэллэн кэллэ, төлөө диэн икки мөһөөкпүн туура тутан ылла.

Үлтү кыйаханан дьиэбэр киирэн, рис хааһы сиэтим, ытыыбын эҥин. Ийэм эрэйдээх буруйга ылынан уку-сакы. Арай туохха эрэ хайыһаары гыммытым, куолайбын туох да аспат, били риспин кытта уҥуоҕум барсан хаалбыт. Үөрүү-көтүү бөҕө.

Бэйэм да эмтэниэх эрээри алта мөһөөгү төлөөн турдаҕым. Ол иһин этэбин — биир собону алта мөһөөккө ылбытым диэн. Болҕомтоҕут иһин махтал.

 

26 мая, 2015 Главные новости

Добавить комментарий

*