НӨНҮӨҺЭ: Аламай сырдык күн ийэлии кууһуоҕа

26 мая, 2015 в 5:01
Картина масломТабага

Тылы наардыы сатыыртан

Ыараханы билбэппин,

Тылы таба тайаныы

Үөрүүлээҕин эбитин.

Эн ырыаҕар уйдараммын

 

Көрөрүм өбүгэм алааһын,

Сунтаарым тырымныыр уоттарын,

Хатыҥым суугунуур сипсиэрин,

Ньургуһун сибэкким ырыатын.

Сиэйэм Уолун

Туох хара тыына буулаата,

Хараҥанан бүрүйдэ?

Ыллыырыҥ дии кэрэни,

Туойарыҥ дии тапталы;

Сөбүлүүрүҥ сырдыгы, ырааһы,

Таҥарыҥ мэлдьитин сырдыгы.

Быыһыаҕыҥ, доҕоттоор,

Хаарыаннаах уолбутун.

Кэп-дьэбэр дьуоҕатыттан,

Хараҥа күүстэртэн,

Сымыйа балыыртан

Быыһыаҕыҥ оҕобутун.

 

ххх

 

Хоһоон тыла сороҕор

Чэбдик тыаллыы илгийэр,

Үрүҥ илгэ кэриэтэ

Үрүлүйэ кутуллар.

 

Хоһоон тыла ардыгар

Ынчык курдук эҥсиллэр,

Харах уутун кэриэтэ

Тохтообокко суккуллар.

 

Тылы наардыы сатыыртан

Ыараханы билбэппин,

Тылы таба тайаныы

Үөрүүлээҕин эбитин.

 

Куокунугут кэрэ айылҕатыныы

 

Кэрэ да кыргыттаргыт эһиги,

Сардааналаах хонуутунуу

Сиэдэрэй да эбиккит.

Үрдүк сүдү хайаҕыт

Дохсун санааны сахтаҕа,

Бүлүү эбэ хотуҥҥут

Намыын гына айдаҕа.

Бииртэн биир кэрэҕит.

Үлэ үрдүк чыпчаалын

Дабайдыгыт хорсуннук,

Үөрэх үрдүк кыһатын

Өссө үрдүккэ көтүттүгүт.

Мэлдьи да маннык

Кэрэ буолуҥ, кыргыттаар,

Куокуну кэрэ куолара.

 

Айуу чэ

 

Эн мин диэки саатар биирдэ

Кынчыатана көрүөн дуу,

Кэннибиттэн батыһа

Одуулаһа хаалыан дуу.

Суох, хата бэйэм

Кыҥыырбыттан кылар буоллум,

Айуу чэ,

Эн миигин санаан

Үөһэ тыыныаҥ баара дуу,

Ааппын күҥҥэ сүүстэ

Ааттаан ылыаҥ баара дуу,

Эн ааккын ааттыы сатаан

Эппэт кэлэҕэй буоллум.

Айуу чэ,

Эн, миигин санаан

Үөһэ тыыныаҥ баара дуу,

Көрсүөм этэ диэн

Суолбун маныаҥ баара дуу.

Суох барытыгар

Бэйэм, бэйэм,

Айуу чэ.

 

ххх

 

Хоһоон сибэккилээх хонуутугар

Күөлэһийэбин астына,

Биирдии тылы лыахтыы тутаммын

Олустук үөрэбин.

 

Быыһыгар саһарбыт сэбирдэх

Толкуйдатар олохпун,

Ардыгар ньургуһун сибэкким

Хорсуннук эн олор диэн алгыыр.

 

Сардаана сибэкким тэтэрэн

Таптал кэрэтин сипсийэр,

Лаглайбыт хатыҥым оргууйдук

Муударай буоларга такайар.

 

Хоһоон сибэккилээх хонуутуттан

Чэпчээммин мин төннөбүн.

 

ххх

 

Сырдыкка эн тардыс,

Хараҥаттан эрэ тэй,

Үтүөнү эн үксэт,

Мөкүгэ кыттыһыма,

Кэрэни кэрэхсээ,

Сидьиҥтэн эн куот,

Күндүнү сыаналаа,

Тапталы ытыктаа,

Ааспыты аһардан

Сайыһар буолума,

Кэлиэхтээх кэмнэри

Долгуйа кэтэһээр.

Оччоҕо кэлиэҕэ

Уостубат уоскулаҥ,

Тулаҕар мэлдьитин

Чыычааҕын ыллыаҕа,

Сибэкки тыллыаҕа,

Аламай сырдык күн

Ийэлии кууһуоҕа.

 

26 мая, 2015 Главные новости

Добавить комментарий

*