НӨНҮӨҺЭ (Надежда Румянцева): «Гастролга» уонна «Сиэн балтылар»

30 мая, 2015 в 3:49

Ол кэнниттэн арай Сыккынньам саҥата: «Айуу-айа, сиһим бары ыарыйда, туруоруҥ эрэ, хайа, Ньаадьаа арыгыбын хаһан биэрэҕин?” — диэн саҥа иһиллибитигэр, хайыһа түспүтүм, Сыккынньа «хоруобар »

олорор эбит. Саалаҕа киһи бары күлэн уҥа сытар.

Гастролга

 

Урут 80-с сылларга нэһилиэккэ агитзонанан үлэ күүскэ ыытыллар этэ.

Саас аайы кэнсиэринэн күрэхтэһэр этибит. Биир сыл испэктээктэ туруоруҥ диэн буолла. Зонабар мин худрукпун. Билигин умнан кэбиспиппин ханныгы туруорбуппун. Арай баачыкалаах уонна бокуонньуктаах этэ. Хордуоҥканан хоруоп оҥорон, остуол үрдүгэр уурдубут. Ким да бокуонньук буоларга сөбүлэспэт, дьиҥэр, саҥата суох сытар оруол этэ. Арай биир Сыккынньа диэн хос ааттаах, иһэрин сөбүлүүр эмээхсин, чэ, миигин сытыарыҥ, туохпун да сүтэрэрим суох, ол гынан баран өлүү аспын биэрээриҥ диэн сөбүлэстэ. Мин үөрүүнү кытта булуох буоллум, оччолорго ол аспыт талон.

Көрдөрөр күммүт буолла. Оҥостуу, гримнэнии кытаанаҕа. Үөрүөм иһин, Сыккынньам хата өйдөөх кэллэ. Көрүҥүнэн хайдах эрэ цыган эмээхсинин курдук. Оҕо-уруу суох киһитэ этэ.

Испэктээх саҕаланна. Мин баачыка оруолун толорон, бокуонньук таһыгар таҥара күлүгэр үҥэ турабын.

поп

Син добуочча уһуннук саҥардым быһыылаах. Арай ол турдахпына, саала диэкиттэн бастаан соһуйар, өмүрэр саҥалар иһилиннилэр. Ол кэнниттэн арай Сыккынньам саҥата: «Айуу-айа, сиһим бары ыарыйда, туруоруҥ эрэ, хайа, Ньаадьаа арыгыбын хаһан биэрэҕин?” — диэн саҥа иһиллибитигэр, хайыһа түспүтүм, Сыккынньа «хоруобар »

олорор эбит. Саалаҕа киһи бары күлэн уҥа сытар.

Били трагедия эрэ, туох эрэ барыта умнулунна. Аны эмээхсиним сууллуо диэн ол мучумаана. Кэлин эмээхсиним бэйэбин мөҕөр: «Туох айылаах өр үҥтүҥ, эрэпэтииссийэҕэ саҥаҥ кылгас этэ дии”, — диэн.

Көрбүт дьоннор кэпсээннэриттэн иһиттэххэ, мин үҥэ турар кэммэр хоруоптара хамсыыр үһү. Онтон арбайбыт баттахтаах илэ абааһы кыыһа быган тахсыбыт. Өмүрэхтэр онно өмүрбүттэр эбит. Борук-сорукка дьулаан дьүһүн буолуо дьэ. Хата, ол испэктээкпитинэн кыайаммыт улуус киинигэр киирэн эмиэ ситиһиилээхтик кыттыбыппыт.

 

Сиэн балтылар

Икки этээстээх уопсайга олорорбут саҕана балтыларбыт күн аайы киирэн оонньоон, дьиэлэрин курдук сылдьаллара. Сороҕор дьонноро ыраата бардахтарына хоноһолуур да чиэскэ тиксэллэрэ.

Улахан балтыбыт Ариша сытыы-хотуу, киириилээх тахсыылаах киһи, оттон Марина көрсүө-сэмэй, кырдьаҕас киһи курдук, уоһун чорбото-чорбото куолулаан томтотор. Үһүс Юлиана абытай киһи, күнү супту ытаан аппыт айах биир, ол иһин кинини аппыт айах диибит. Оҕолор мин аһылыгым ыскаабын аптаах ыскаап курдук көрөллөр. Туох суоҕай манна: кэмпиэт, бэчиэнньэ, фрукта, утах мэлдьи баар курдук кинилэргэ.

Биирдэ күнүскү эбиэт иһитин сууйа турдахпына түргэн атах тыаһа иһиллээтин кытта куукунньам ортотугар Аришам биирдэ чиккэс гына түстэ. Кэмпиэт сиибин диэтэ да, ыскаап үрдүттэн харбаан ылла да, холорук курдук сүтэн хаалла. Мин чыпчылыҥнаан эрэ хааллым. Кырдьык, киирэ сырытта дуу, тугуй дуу диэммин. Онтон сотору буолан баран, ааҥҥа сэмэй сирэй быкта. Маринам эбит. Эбэбит кириэһилэҕэ олорон тэлэбииһэр көрөр. Ону иэдэһиттэн сөрүү тутан сэрэнэн сыллаан сырылатта, эбиитин сыта үчүгэй диэн хайҕааһыннаах буолла. Дьэ, ол кэнниттэн сэмээр ыскаабын диэки көрөн туран, эһиэхэ кэмпиэт баар дуо диэн култуурунайдык ыйытта. Оччо үчүгэй тактика кэнниттэн кэмпиэти сиэбигэр ботуччу уктум. Киһим сэмээр сонунун кэпсии түһэн баран таҕыста.

сиэн

Ситэри иһиппин сууйа турдахпына, туох эппитэ баарай, аантан сирена курдук часкыыр иһиллэр, онтон дэлби ытаабыт Юлиана сирэйэ көстөр. Миэхэ кэмпиэт суох диэн тылы ол часкыыр быыһыгар нэһиилэ арааран истэммин, били баҕалаах аһын биэрэн һуу гынан, таһырдьа утаарабын.

Уоскуйан олордохпуна аны ааммын тоҥсуйаллар. Ким кэллэ диэн улахан киһини көрөөрү аспытым, атахпар туох эрэ төкүнүс гынар уонна саҥа иһиллэр, манна киириэххэ наада диэн. Аны ыкса ыалым оҕото эбит, миэхэ эмиэ кэмпиэт наада диир. Оччо ирдэспит киһиэхэ биэрэн быыһанабын.

Сиэн балтылар биир күннээҕи мучумааннарыттан суруйдум. Киһи күлүөх дьоно.

 

30 мая, 2015 Главные новости

Добавить комментарий

*