НӨНҮӨҺЭ: Оҕо сааһым доҕотторо

9 июня, 2015 в 3:47
images

Оҕо оҕо курдук мин эмиэ өрүүтүн истиҥник, туоххаһыйа саныыр доҕоттордоох этим.

Мэлдьи кинилэргэ күүтүүлээх киһи буоларбыттан олус үөрэрим. Ол дьиэм таһыгар олорор ыаллыы эмээхситтэрим этэ.

Сэттэлэр этэ, ол иһин нэдиэлэҕэ биирдэ барыларын өҥөйтөлүүрүм. Ол курдук, бэнидиэнньиккэ Омоон Кисиэнньэбэр тахсан хойуу үүттээх чэй иһэбит. Миэхэ диэн анаан туох эрэ сонун ас уурбут буолар. Оптуорунньукка Өлөксөөнүм күүтэр, эбэһээт саха лэппиэскэлээх күөрчэҕинэн күндүлүүр. Сэрэдэҕэ Сөдүөт Настаатыгар тахсан сахалыы баахыла сиэн мэтиргэтэбин. Чэппиэргэ Кэтэриинэлээх Боруохарга тахсан хойуу үүттээх чэйбин кытта тойуу саахар буолар. Кэмпиэт хоппоттон хостонор. Онтон наллаан олорон хамсаларыгар табах уурунан тардаллара умнуллубат көстүү буолан хаалбыт. Бээтинсэҕэ Стручковтар эбэлэрэ сэмэйдик алаадьылаан күүтэр. Субуотаҕа Бабыкан Өлөксөөһүм элбэх саҥатын быыһыгар күлэн бэтигирэтэн кэбиһэр уонна мин хайаан да киһи киһитэ буолуоҕум туһунан сырдыгы ыралыыр. Хайаан да компот уурар, кэтэхпиттэн сыллыыр. Өрөбүлбэр биир Өлөксөөммөр сылдьан маанылатабын.

Ол курдук эмээхситтэрим котокулар мэлдьи тэҥнээх киһи курдук сэлэһэллэрэ, уруккуну-хойуккуну кэпсииллэрэ истиҥин эриэхсит.

Билигин да сорох түгэннэргэ хайдах эрэ урут маны ханна эрэ көрбүтүм эбэтэр истибитим ээ дии саныыбын, кэлин өйдөөбүтүм, кырдьаҕастарым кэпсээбит кэпсээннэрэ туолар эбит. Дьэ, дьикти.

Миэхэ мэлдьи истиҥник, харыһыйан, таптаан сыһыаннаспыттарыгар куруутун махтана саныыбын.

9 июня, 2015 Главные новости

Добавить комментарий

*