НӨНҮӨҺЭ: Ыһыах мучумааннара

15 июня, 2015 в 10:33
Надпись Сунтаар ыьыага

Ити курдук, биир кэппиэйкэтэ суох ыһыахтаан турабын. Уулуссаҕа умналыы сылдьар дьону көрдөхпүнэ, ол ыһыаҕы саныыбын, куһаҕан да этэ.

Икки тыһыынча сыллардаахха кулуупка үлэлии сылдьан Сунтаар ыһыаҕар биир күн эрдэ киирэн павильоннары киэргэтэҕит, маныыгыт диэн миигин уонна Лариса диэн охранник кыыспытын эрдэ утаардылар.

Ол сахтарга хамнас олох кэлбэт, кур иэстэн иэскэ сылдьыллар кэмнэр этэ. Барарбытыгар дьоммут дьэ сарсын хамнас биэрэллэр үһү, эһиэнин лөкөччү ыламмыт киллэрэн биэриэхпит диэн тыл минньитиилээх атаардылар. Иннэ гынан харчыламмыт саҕа сананан, ыһыах таҥаһын онтон ылынан кэтиэхпит диэн сүбэлэһэн, оробуочай таҥаспынан бардым. Онтум да джинсы ыстаан, клеткалаах ырбаахы, кобвойдар киэннэрин курдук сэлээппэ, кроссовка.

Тиийэн түүннэри утуйбакка, кумаар быыһыгар киэргэтии, үлэ бөҕө буоллубут. Санаабытыгар, биһиэнэ ордук курдук буолла: саламанан ураһабыт диэн, таска көппүт кыталыкпыт диэн. Түүннэри хорчуоппаҕа иккитэ эрэ аһаатыбыт. Харчы бүттэ, дьоммутун күүтэбит. Кэллилэр. Хамнас биэрбэтэхтэр. Сирэйбит уһаата. Саатар таҥаспын көрө көрө тойоммут туох маляр курдук таҥаһын кэттиҥ, уларыт диэн мөҕөр, ханна эрэ харчы аҕалбыт киһиэхэ дылы. Аны нэһилиэктэринэн параадтаан киирэҕит диэн чүөчэлэр саха былааччыйата бөҕөнү кэтэрдэ сатаатылар да, биир да барсыбат эбит, эһэни былаачыйалаабыт курдук. Тойонум эмиэ мөхтө, ол таҥас барсыбатаҕар мин тугум буруйа эбитэй. Павильоннаргытын манааҥ диэн баран бэйэлэрэ аһыллыытыгар кытта бардылар.

Саатар итии баҕайы күн, Ларисабынаан аччыктааһын буолла. Түүнү супту утуйбакка кумаар аһылыга буолбуппут, сирэй харах дьоһун, били «Королева бензаколонки” киинэ Надежда Румянцевата диэн туох кэлээхтиэй, ол анараатынан сирэй буоллум. Хорчуоппа минньигэс сыта куртахпытын курулатта. Билэр дьоммуттан иэс көрдүөҕү бэйэлэрэ ааҕынан киирбит дьон үптэрэ тутах буолла. Айаҕалыы сатаан, нэһилиэкпит дьонун хорчуоппатыгар баран муҥатыйбыппытыгар, хата, босхо аһатан абыраатылар. Испит тотон, чуоп-чаап буолан миэстэбитигэр эмиэ төнүннүбүт. Таҥаспыттан саатан ханна да быкпаппын, билэр дьоммуттан көҥөнөн соччо кэпсэппэппин, сөҕөллөр быһыылаах. Күнүс итиитэ сүрдэннэ. Кыһалҕатын кыһайан, куртах маатыска эмиэ ас көрдөөн сулуйан, атахпыт эмиэ хорчуоппа диэки барда. Син ону өҥөйөн, маны көрөн ас минньигэс сыта аччыкпытын күүскэ санатта. Дьолбутугар, биир билэр кырдьаҕас оһуохайдьыт оҕонньорбутун көрсөн, үөрүү-көтүү бөҕө буолла. Кураанахпыт туһунан үҥсэргии оҕустубут. Чэ, киирэн талбыккытын ылыҥ, мин төлүөм диэн, дьэ, тото-хана аһаатыбыт, эбиитин биэс уоннуу солкуобай сэмсэлэннибит.

Ити курдук, биир кэппиэйкэтэ суох ыһыахтаан турабын. Уулуссаҕа умналыы сылдьар дьону көрдөхпүнэ, ол ыһыаҕы саныыбын, куһаҕан да этэ. Ол иһин этэбин — харчыта суох бырааһынньык суох.

15 июня, 2015 Главные новости

Добавить комментарий

*