Олоххо иккистээн эргиллии

22 июня, 2015 в 2:02

Олох олоруу хонууну туорааһын буолбатах ,араас эндирэ бутуура элбиих элбэх. Олус үчүгэйдик сылдьан оһоллонуу, ыалдьыы, быһылааҥҥа түбэһии. Ким да буруйунан буолбакка араас идэмэрдээх иэдээҥҥэ түбэһии, олох очуругар-чочуругар оҕустарыы бу олоххо элбэх буоллаҕа.

Ордук өлөр өлүү дэгиэ тыҥыраҕар хаптаран ыарахан ыарыыга ыллардахха, үрүҥ халааттаах аанньалларбыт барахсаттар олоххо иккистээн эргиллиигэ кимиэхэ да, тугунан да сыаналаммат улахан сүдү бэлэҕи бар дьонноругар буор босхо оҥороллор. Арыт биһиги ону үөрэнэн хаалан буолуохтаах буолуохтааҕын ылынабыт.

Хомойуох иһин, ол быыһыгар арыт киһи сонньуйуох да түгэннэрэ тахсаллар. Холобура, миигин төрөөбүт Намым быраастара муҥурдааҕым ыалдьыбытын билбэккэ нооруҥ ыалдьыбыт, диэн нэдиэлэни быһа эмтээтилэр. Ол түмүгэр муҥурум тэстэн бу олохтон олох да бырастыылаһар кутталлаах быһыыга-майгыга киирэ сылдьыбыппын. Нэдиэлэ устата араас ыарыыны аһардар укуоллары симэ сыттахтарына, хата кэргэним Александр Сергеевич балыыһаттан түүн уоран киллэрэн Дьокуускай куорат уобаластааҕы балыыһатыгар амырыын ыарыыттан түҥ-таҥ барбыт киһини киллэрбит.

Манна киирээппин хантан тоҕо кэллигит, кимнээххитий, туоххутуй диэбэккэ, тута операционнай остуолга сытыаран дириҥ билиилээх хирург Андрей Николаевич Николаев мындыр илиитигэр, уран тарбахтарыгар түбэһэн балтараа чаас операция остуолугар сыппыппын. Ол кэнниттэн бу балыыһа хирургическай отделениятын кыһамньылаах, дириҥ билиилээх бырааһыгар Анатолий Николаевич Колодезниковка түбэһэбин. Анатолий Николаевич балыыһаҕа сыппыт түөрт ыйым тухары бу ыарыыны утары кырдьык да киһи эрэ махтаныах дьаныардаахтык охсуһан атахпар туруоран олоххо төнүннэрдэ. Бу балыыһа хас биирдии сиэстэрэтиттэн, техническэй үлэһиттэриттэн саҕалаан улахан врачтарыгар медицинскэй наука кандидаттара, доктордара, профессордар балыыһа салалтата кылаабынай быраас Борис Витальевич Андреев ыарыһахха кыһамньыларын, үлэлэригэр эппиэтинэстээхтик сыһыаннаһалларын эппинэн-хааммынан чахчы билэн-көрөн итэҕэйэн таҕыстым. Биһиги республикабыт олохтоохторо маннык эмчиттэрдээх буоллаҕына киһи доруобуйатын туһугар чахчы улахан көмө баарын олохпунан итэҕэйдим.

Медицинскэй наука доктора, профессор Михаил Михайлович туһунан дьон махтанан кэпсэтэрин урут да истэрим, бэчээкэ да көрөн билэрим. Билигин аны ыарыһах быһыытынан кини анал хонтуруолугар киирэн эмтэнэн чахчы да улахан киһи итии-сылаас сыһыанын, идэтигэр дириҥ билиитин эппинэн-хааммынан биллим. Онон амырыын ыарыы буулааһыныттан букатыннаахтык босхолонон күн-ый буолбут маҥан халааттаах аанньалларбар махтанар күнүм үүннэ. Бу балыыһа хирургическай отделениятын базатыгар үлэлиир профессор М.М.Винокуров салалтатынан эдэр студеннартан саҕалаан, наука кандидаттара хирургияҕа дириҥ билиини, кини уран тарбахтарын мындыр ньымаларыгар уһуллаллар эбит.

Биһиги республикабыт тыатын сиригэр маннык үрдүк таһымнаах быраастар, эмчиттэр коллективтара элбии турарыгар баҕарабын.

Саамай бириһирээбитим кылаабынай быраас Б. В. Андреев врачтар эмтиир таһымнарын үрдэтиигэ ураты болҕомтотун уурар. Ол курдук эмтээһин көрүҥнэринэн Россия уонна кыраныысса таһыгар тиийэ аан дойду бастыҥ клиникаларыгар бэйэтин быраастарын ыытан идэлэрин үрдэтиигэ сүрүн болҕомтотун уурар. Ол да иһин балыыһаҕа киирэр ааныттан киһи киһиэхэ сыһыаныттан саҕалаан үрдүк таһымнаах култууралаах сыһыантан чахчы күүстээх чиҥ билиилээх эмчиттэр илиилэригэр киирбиккин тута арааран билэр эбиккин.

Үлэбэр тахсаат аан бастаан бу балыыһа коллективыгар махтана үрүҥ халааттаах аанньаллар күннэринэн анаан-минээн эҕэрдэлээн кэллим. Балыыһа коллектива эмтээбит ыарыһахтарын үөрэ-көтө көрсөн миигин аны олох да долгутан кэбистилэр.

Өссө төгүл улаханнык махтанабын. Үрдүк билиигитинэн, түбүктээх мындыр үлэҕитинэн бар дьоҥҥутун абырыыр, быыһыыр идэҕитигэр ситиһии эрэ сэтиилэниҥ, кыайыы хотуу эрэ кынаттаныҥ. Үлэҕит үтүө түмүгүттэн өссө да үгүс үөрүү-көтүү эрэ үктэллэниҥ, диэн сахалыы алгыс тылларын аныыбын.

 

Саха Республикатын Судаарыстыбаннай Мунньаҕын (Ил Түмэн) норуодунай депутата Алина Романовна Винокурова.

 

 

 

22 июня, 2015 Главные новости

Добавить комментарий

*