Олох «бырастыыната»

7 октября, 2014 в 1:56
images

Бэлиэр бүтүн олоҕу сахсыйан, ааспыт сабыытын сэгэтэн ахтыы суруйар кэмим тирээтэҕэ.

Ити лоскуйга киирии тылла суруйан кулу, бу тэрилтэ туһунан санааҕын эт дуу диэн көрдөһүүлэрин быһа гыммакка өрөбүлбүттэн түгэн анаан суруксуттуу сатаатаҕым үһү.

Ыырым биллэр биир, ычам кыараҕас, барыны хабан, хас түгэни хастыы тардан сөллүбэттии баайар кыаҕым суох эбит. Устан бүппүт ууттан тугу булан ылыаҥый? Уу аата уу. Субу ытыскынан сомсон ылбытыҥ да, тохтон, ытыс соттон хаалыаҥ. Ол кэриэтэ олох хас түгэнин харыстаан хаһаанар кыаҕыҥ суох.

Умнуллубут, урукку умуллубут, устубут аата устубут. Туох тахсарынан тиһэ сатаатым да, хаһан эрэ ханна эрэ эппит дуу, туһаммыт дуу, ахтыбыт дуу түгэннэрим хатыланар курдуктар. Ол эрэ түгэннэр өйбөр-санаабар сөҥөн хаалан, хат-хат күөрэйтэлээн эрдэхтэрэ.

Ол иһин ахтыыны хас эмэ киһи кыттыһан суруйар ордук дуу дии санаатым. Били быыбар саҕана дуу, бюджет барылын таҥыыга дуу оҥостор «бырастыыналарын» кэриэтэни айан таһаарар буоллахпыт. Биир киэнин иккис ситэриэ, үһүс туох суоҕун эбэн биэриэ. Ити – тэрилтэ дуу, нэһилиэк дуу устуоруйатын суруйууга сыһыаннаах. Оттон бэйэлээх бэйэҥ олоххун эрэбиисийэлииргэр ким көмөлөһүөй? Чугас дьонуҥ, аймахтарыҥ эбии-сабыы буолуохтара эрээри, санаммыт санааны, ымыыламмыт ыраны кинилэр да тыктаран көрөр кыахтара суох.

Суруксут элээмэтэ итинник диир буоллаҕына, көннөрү дьон көмүс тэҥэ түгэннэрэ күрэммиттэрин аанньа күөрэйбэттэр дуо?

Күһүҥҥү күнү-дьылы күдэҥҥэ көтүтэ таарыйа, суруйбут аатын ылаары, ааспыты анаара сатаатым да, соччо кыаллыбата. Бу түгэнтэн түгэни сөллүбэттии баайарым оннугар.

Хас бэйэбит харахпытыгар хатылаан көрөр бэлиэ түгэммитин ханна эрэ тиһэн истэрбит, олох «бырастыыната» таҥыллан иһиэ этэ. Ону «марайдаабат» курдук дьаһанан олорорго дьулуһуо этибит…

7 октября, 2014 Главные новости

Добавить комментарий

*