Путин пресс-конференциятын ту´унан кэтэх кэпсэл

21 декабря, 2013 в 11:59

Үтүө дьон ыллылар да Москубаҕа айанныыллар, турдулар да турга туруналлар. Туран-олорон, киирэн-тахсан, саҥаран-иҥэрэн истэххинэ табыллар.

Ол эрээри ити эттэххэ эрэ дөбөҥ. Арай, мин Дьокуускайга эрдэхпинэ дойду президенин администрациятыттан эрийэн, өйүүн Путин пресс-конференциятыгар барыаҥ үһү диэбиттэрэ буоллар, хантан мин командировка уруһуйдуу охсон, улахан тойону көрсүөм этэ диэн көтүөм эбитэй. Атын, эрдэттэн былааннаммыт дьыалаҕа Москубаҕа көтөн кэлэн саҥа һуу-һаа буола сырыттахпына, эрийбиттэрэ. Эн пресс-конференцияҕа аккредитацияны аастыҥ, салгыы тугу гынарыҥ туһунан электроннай почтаҕар суруйуохпут диэтилэр.

Үөрдүм диэҕи, былааннаммыт тиһэх түгэҥҥэ тиэрэ эргийэрин сөбүлээбэппин. Төһө да сумбурнай дуу, бурнай дуу олохтоох курдугум иһин, консервативнай соҕуспун диэн нууччалаан кыһытыахха буоллаҕа.Жаждущие задать жару

Үлүбүөй талан ыллылар диэн сымыйалаабаппын, инньэ ый иннинэ интернеккэ информация оҕото баарын таба көрөн, Кремль сайтыгар анал форманы толорон ыыппыттааҕым. Эрдэ ахсынньы 17 күнүгэр буолар диэбиттэр курдук этэ. Өссө мин ити күн хайаан да Госдумаҕа буолуохтаахпын, арай, конференцияҕа ыҥырдахтарына, хайатын талыах муҥмунуй – Госдуманы дуу, Путины дуу диэн санаан аһарбыттааҕым да, бу ыксалга ол туһунан таһыччы умнан кэбиспит этим.

Москубаҕа санаа санаан араарылынныҥ да, куорат тэтимиттэн төлө тэбиллэн, өтөр ситиэҥ да суоҕа. Мин бу сырыыга кулгааҕым да истэр, күүстээх ачыкы көмөтүнэн уулусса нөҥүө вывескаларга туох суруллубутун кытары ааҕабын. Хайа көтөн кэлиэхпиттэн ол тэтими кытары сөп түбэһэн, күнүһү-түүнү биир гынан үлэ үөһүгэр түстүм. Мин үлэм диэн биллэр – көрүү-истии, барытын биир сапка тиһии уонна ону информация диэн ааттаан дьоҥҥо тиэрдии. Били консервативнайым ол өттүгэр кэлэн сотуллар. Мин суруйууларым соһуччу өрүттээхтэр. Ол истиилим диэн буолбатах, бэйэтэ тахсары батыһан барсан иһэбин. Илэ кэлэн саҥарбакка хаалар түгэним элбэх буоллаҕына, суруйарга кэлэн атыммын, көстүбэккэ олорон көрүлүүрү сатыыбын. Ити өрүттэрим Путин пресс-конференциятыгар миэхэ мэһэйдээбиттэрэ быһыылааҕа. Эрдэтээҥҥи эрэдээктэр суруналыыс быһыытынан сулустаах чааһыҥ үүммүт, кытаат, кытарчы көр диэниттэн саҕалаан, сахалар ааттарыттан тыл эт, сахалары түһэн биэримэ диэҥҥэ тиийэ этитэлээбиттэрэ. Сулустаах чааһым суруйууларым кэннилэригэр сурулаан ааста. Сүүһүнэн дьыраадыйбыт атахтаах камералар эйиэхэ туһаайылыннахтарына, бэллэйбит азиаттыы сирэйгин аан дойду көрүүтүгэр таһаардахтарына бэрдэ суох курдук. Урутаан эттэххэ, ЦМТ саалатын иһигэр буола турары хабар камералар тиэрдэллэрэ икки улахан мониторга хабылларыгар элэҥэс көстөн ылбыппын көрөн баран, аны хабыллыбатах киһи дии санаабытым. Оттон пресс-конференция иннигэр «Россия-1» канааллара интервью оҕото ылбыттарыгар, бэйэм тута көстүбэт буолан, кыһаллыбатаҕым. Сөҕө саныыбын, хайаан мин түөрт сылы быһа телевидениеҕэ үлэлээбитим буолла диэн. Эдэрбэр тэптэрэн ини. Уонна ол торҕоннообут тоҕус уонус сылларга атын үлэ дэбигис көстүбэтэ.

(Бу матырыйаал салгыытын «Алтан Сэргэ» хаһыат ахсынньы 24 күнүгэр тахсар 54 №-ригэр ааҕыаххытын син).

 

Венера ПЕТРОВА

21 декабря, 2013 Без рубрики

Добавить комментарий

*