Салалтаҕа баҕа санаалар

21 июня, 2015 в 2:02
властт

Хомойуох иһин, билигин бүтүн улуу Россия үрдүнэн, бары билэ-көрө, истэ сылдьаргыт курдук, олохпут эҥин араас кризис, дефолт, коррупция, Крым, Украина проблемаларын содулугар оҕустаран, күн-түүн улам ыараан-уустугуран иһэр. Мантан биһиги Сахабыт сирин кыһалҕата ырааппата.

Аны билигин Сахабыт сирэ арыгылааһын, наркомания, холуобунай ыарахан буруйу оҥоруу, үлэтэ суох буолуу курдук көрдөрүүлэринэн Хотугулуу-Илиҥҥи федеральнай уокурукка инники күөҥҥэ сылдьабыт курдук, киһи саатар даҕаны. Билэргит курдук, былыр биһиги өбүгэлэрбит, төрүттэрбит кымыс, быырпах, үүт-сүөгэй иһэн олорбуттара-улааппыттара, күннэри-түүннэри өрөбүлэ-тойо суох кыһыннары-сайыннары үлэ үөһүгэр сылдьаллара – үлэтэ суох буолуу диэни билбэт этилэр. Барыта илии үлэтэ. Ол түмүгэр сылгы, ынах сүөһү алаастар, өтөхтөр хотооллорунан буолар үһү. Билигин балаһыанньа хайдаҕын бэйэҕит билэҕит. Сылгыбытын, сүөһүбүтүн эһэр уһукка тиийэн эрэбит. Кырдьаҕас көлүөнэни солбуйа тыаҕа эдэр ыччат саараама тахсыбат, олохсуйбат, куораты, улуус кииннэрин була сатыыр. Саамай куһаҕана диэн, бу биричиинэтэ – тыа сирин олоҕо ыарахана, төрөппүттэр оҕолорун куоракка күрэтиилэрэ, бэйэлэрэ улуустартан киин сирдэргэ көһүүлэрэ. Бу барыта билиҥҥи олох ыарахаттара, уустуктара. Россияҕа социализм систиэмэтэ ыһыллан, сатала суох капитализм – ырыынак усулуобуйатыгар киирии. Улуу кытай норуота сатабыллаах буолан хайдах курдук сайынна, орто дойду үрдүнэн иккис миэстэ! Урукку патриотизм, интернационализм диэн өйдөбүллэр суох буоллулар. Ол оннугар Украина, Кавказ, Прибалтика, Чечня айдааннара, АХШ, Европа дойдуларын кытары утарыта туруу политиката сытыырхайда, баай-дьадаҥы диэн араҥалар үөскээтилэр. Киһи санаата эрэ түһэр балаһыанньата буолла. Дойдубут сирин баайа-дуола барыта биир харчыта суох, чэпчэки сыанаҕа Россия баайдарын, корпорацияларын илиитигэр киирэн бүттэ. Хаһыаттарга суруйалларынан, бу балаһыанньа республика үрдүкү сололоох салайааччыларын сатала суох дьаһалларын түмүгэр буолла. Норуот ону билэр, хомойор, кэлэйэр.

Иһиттэххэ, өйдөөх Африка дойдулара сирдэрин баайыттан киирбит дохуоттарын 30 %-нын бэйэлэригэр хааллараллар, сайдаллар-чэчирииллэр. Биһиэхэ холоотоххо, олох фантастика, остуоруйа дойдулара үһү. Толкуйдаан көрдөххө, биир мөлүйүөнү кыайбат нэһилиэнньэлээх Саха сирин баайа-дуола баһырчы соҕус буолара чуолкай! Ыраах Африкаҕа тиийбэккэ, кыһыйыах, хомойуох иһин, улахан омуктарбыт татаардар, казахтар, башкирдар, узбектар бэйэлэрин суверенитеттарын, конституцияларын тутан сайда, чэчирии, ахсааннара элбии олороллор. Оттон биһиги, сахалар, суверенитеппыт, конституциябыт сүрүн, олохтоох ыстатыйалара барыта көннөрүллэн, уларытыллан, халлааннаан көттүлэр, сирдээн тимирдилэр, ый-кус ыһыаҕа буоллулар.

Россияҕа үтүөмсүйэн, бастакынан, ким-хайа иннинэ холкуостары, сопхуостары ыспыппыт. Онтон кыайан көрүммэккэ сүрүн баайбытын сүүскэ биэртэлээбиппит, бааһыналарбыт, ходуһаларбыт билигин сыыс окко былдьатан тураллар – ону акаары эрэ киһи өйдөөбөтө буолуо.

Биһиэхэ барыта ырыа-тойук, шоу, Гиннес рекорда, ыһыахтар, ханнык эрэ олоххо киирбэт мега-проектар уруйдара-айхаллара – киһи көрүөн-истиэн баҕарбат буолла. Холобура, ити нэдиэлэҕэ үстэ-түөртэ буолар биирдии чаастаах «Охота и рыбалка в Якутии», ыытааччы баай киһи, министр А.Борисов «Якутск музыкальный», В.Индигирскэй авторскай биэриилэрэ туохха нааданый? Түргэнник бу биэриилэри эфиртэн устан, бириэмэтин арыгыны, наркоманияны, холуобунай кэһиилэри утары хайдах охсуһары-туоратары сырдатар үчүгэй ис хоһоонноох биэриилэри таһаарыахха наада. Ити да биэриилэрэ суох биһиги, сахалар, бултууру, ырыаны-тойугу сатыырбыт биллэр, ол хааммытыгар баар. Бу проблеманы туох да правительствота, Ил Даархана суох НВК генеральнай директора, Ил Түмэн депутата И.Андросов быһаарар кыахтаах.

Биир сүрүн сорук – эдэр ыччаты тутууга, промышленноска сэниэлээхтик сыһыарыы, үөрэтии буолуохтаах. Бу эрэ үлэтэ суох буолууттан быыһыыр суолун өйдүөххэйиҥ.

Түмүккэ: Сахам сирин олохтоохторо, бары төрөөбүт республикабыт чэчирии сайдарын туһугар түмсүөҕүҥ, үлэлиэҕиҥ-хамсыаҕыҥ, ыччаппытын үчүгэйгэ иитиэҕиҥ, үөрэтиэҕиҥ – куһаҕан суолтан көмүскүөҕүҥ!

Е.Сергеев этэрин курдук, быыһанар суолбут биир – ынах-сылгы иитиитэ, тыа хаһаайыстыбата, тутууга, промышленноска киирии буолар.

Бу ыллыктаах баҕа санаалары аҕа баһылык салайааччыларбыт, депутаттар нэһилиэктэртэн, улуустартан саҕалаан өйүөхтэрэ-өйдүөхтэрэ диэн баҕа санаа баар. Дойдум дьоно бары санааҕытын этиҥ-тыыныҥ, көхтөөх, айымньылаах буолуҥ, салайааччылары, депутаттары уһугуннартааҥ диэн сүбэлиибин.

А.Николаев, үлэ бэтэрээнэ, Дьокуускай.

21 июня, 2015 Главные новости

Добавить комментарий

*