Саҥа аат — Сайылык Уола: Хатыҥым ыралаах тойуга

14 ноября, 2014 в 14:32
4-1.Сана аат Сайылык уола

ххх

Бу Сиргэ кэллим мин
Ырабын ырыалаан ыллаары,
Хомойуу, үөрүү түгэнин
Хоһуйа түһэн ылаары.
Айылҕам арыллар кэрэтин
Кэтээммин кэпсээммэр тиһээри.
Эргиччи эргийэр дьүһүйүү,
Тохтообот тойугун истээри.
Дьол, таптал сыдьаайын
Сүрэхпэр иҥэрэн ылаары,
Күн сиригэр баарбыттан
Күн аайы үөрээри.

Сайылыгым чараҥар

Сайылыгым хатыҥнаах чараҥар
Тиийэммин этиэҕим ырабын,
Сэбирдэх суугунун быыһыгар
Истиэҕим сипсийэр тылларгын.
Сайылыгым чараҥа,
Күөх суугунун кэрэтэ,
Дууһам долгуйар нарына,
Хатыҥым ыралаах тойуга.
Ахтылҕан тылларын арааран
Ырыабар анааммын тиһиэҕим,
Алгыстаах арчыгын анааран
Айылҕам тойугар аныаҕым.
Үрүҥ туос кылбаҕар ньуурдаргар
Иэдэспин сыһыаран иһийэн,
Илдьиттиир тойуктан дуоһуйан,
Ньимийэн туруоҕум уоскуйан.

ххх

Эргиччи үрүҥ өҥ…
Эргийэр маҥан хаар
Тохтообот үҥкүүтэ
Тулалыы суһумнуур.
Халыҥ хаар көмнөхтөн
Хахыйах иэҕэйбит,
Халыҥыыр саҕынньах
Хам баттыыр да эбит.
Санааҕа ылларан
Иэдэйбит киһини
Санатар эбиттэр
Айаннаан иһэрин.
Ыар баттык сүгэһэр
Ыарыылаах буоллаҕа,
Ол иһин бөкчөйөн,
Бүгүллэн истэҕэ.
Арай, дьэ, баараҕай
Харыйа самныбат,
Үйэлээх көмнөҕү
Бүрүнэн аастаҕа.
Олоҕун тухары
Арааһы биллэҕэ,
Аргыары, айхалы
Аннынан аастаҕа.
Оо, көмнөх сүгэһэр
Сүгүллэ сылдьаҕын,
Үйэбит тухары
Санааны тумнаран.
Арай, дьэ, кырдьаҕас
Кыраттан бохсубат,
Сөҥүөрэн олорон
Олоҕун ырытар.
Санаалар, санаалар
Кыыдамнаан ааһаллар,
Эдэркээн кэмнэри
Эргитэ санатан.
Оргууйдук нуоҕайа налымнаан,
Күн күлүм сырдыгар күлүмнээн,
Күндээрэн ылаҕын, кыламнаан,
Бүрүйдүҥ сыһыыны-хонууну.

ххх

Кылбаарар маҥан хаар тунаарда,
Кылбаччы маҥхаттын бүтүннүү,
Киэҥ халлаан ньууруттан суһумнаан,
Сир өҥүн ыраастыы ойуулаан.
Наскыччы тэлээрэр бэйэтэ
Куугунуур ырыалаах хойунна,
Сирэйбэр ирбэккэ кырыаран
Күндү Күн күлүмүн көрдөттө.
Түһэр хаар тохтообот элбэҕиэн,
Кыыдамнаан,тулабын туманныыр,
Санаабын саймаарда чэлгитэн
Саҥалыы санааҕа бэлэмниир.

Көмүс кыырпах үҥкүүтэ

Күөл көнө ньууругар,
Харах саатар үрүҥэр,
Күн түһэн күлүмнүүр,
Кыстана ыһыллар.

Кыстык хаар үрдүгэр
Көмүс үрүҥ кыырпахтар,
Кылбачыһа чаҕылла
Күн уотунуун оонньууллар.

Кыыс оҕо мичээрэ
Кыттыспытын кэриэтэ,
Кылбаа ыраас санаата
Курдат тэйэр тырыма.

Кэрэкэтин эбитин
Күҥҥэ үөрэр үҥкүүтэ,
Күлүмүрдэс дьэҥкирэ
Күлүм-чаҕыл күлүүтэ.

Сахалыы санаалаах буоламмын…

Сахалыы санаалаах буоламмын
Айылҕам тыынарын истэбин,
Ытыырын, ыллыырын арааран
Ырыалыыр тылларбар аныыбын.

Сахалыы саҥарар буоламмын
Сайаҕас санаабын тиһэбин,
Саргылаах буоларга самааммын
Саха баай тылыгар тииһэбин.

Сахаттан төрөөбүт буоламмын
Сайдам да, мындыр да эбиппин,
Саҥалыы олохпут туругун
Сахалыы мискийэн биллэҕим.

Сахабын дэнэртэн үөрэбин,
Сайдан иһэрин истэбин,
Соргулаах кэмнэрэ кэлбитин
Сарыаллыы этэммин туойабын.

Ыйдаҥалаах түүн

Сыһыыларга, хонууларга
Ый суһума күлүмнүүр,
Быстах былыт быыһыттан
Кыбыстаҥнаан кылбаҥныыр.

Эйигинниин көрсүһэн
Мичилийэ мичээрдиир,
Күөйэ көтөн батыһан
Кулаачыктыы эргийэр.

Ыйдаҥалаах түүннэргэ
Ыра санаа ытыллар,
Баҕа санаа туоһута
Сулустарга этиллэр.

Куйаар сулус үҥкүүтэ
Тула өттүҥ эргийэр,
Күөрчэхтэнэ дьиримнээн
Чаҕылыҥныы көрүлүүр.

ххх

Тапталы таарыйыаҥ,
Кылыска үҥкүүлүөҥ,
Кыыс, уол кэрэтин
Кэрэхсии таптаһыаҥ.

Тапталга бэриниэҥ,
Таалалыы минньийиэҥ,
Имэҥнээх иэйиини
Билэҥҥин чэчириэҥ.

Тапталы таҥнарыаҥ,
Татакай кыымнаныаҥ,
Идэмэр аттыгар
Илгистэ үҥкүүлүө.

Тапталы иҥэриэҥ,
Иччилээх имэҥтэн
Дьоллонон дуоһуйуоҥ,
Уоскуйан нуурайыаҥ.

2014 с.

14 ноября, 2014 Главные новости

Добавить комментарий

*