Саҥа автор: САҺАРҔА – Алаас ахтылҕана

8 сентября, 2014 в 2:11
Намылыйбыт намчы сэбирдэх

Саһарҕа – Парасковья СТРУЧКОВА Мэҥэ Хаҥалас Нуораҕанатыгар олорор. Кини хоһоонноро «Эркээйи», «Туймаада» хаһыаттарга бэчээттэммиттэрэ.

ххх
Кэргэммэр Гаврил Стручковка аныыбын

Саһарбыт хаартыска буламмын
Санаатым ол ааспыт кэмнэрбин,
Сайаҕас-элэккэй майгыгын,
Ып-ыраас сандаарар хараххын.

Ол киэһэ эн биһи сиэттиһэн
Омоон суол батыһан испиппит,
Ол онно ый үөһэ устара,
Одуулуур курдуга ыраахтан.

Таптаһар сүрэхпит битийэн
Таһынан тахсыахтыы мөхсөрө,
Толломмут биир тылы эппэккэ
Турбуппут эн биһи өр да өр.

Бу курдук сиэттиһэн эн биһи
Олохпут устата кэллибит,
Оҕолономмут, сиэннэнэммит
Дьоллоох эһээ-эбээ буоллубут.

Махтанабын эйиэхэ билигин
Кэргэммэр эрэллээх доҕорбор,
Бу сиргэ кыыс оҕо буоламмын
Олохпун толору олорбуппар.

Харыстааҥ, оҕолоор, олоххутун,
Хаарыаннаах эрэллээх доҕоргутун,
Харах уутунан сууннарымаҥ,
Кып-кыра кырачаан оҕолоргутун.

Хомолто

Ийэҕэ саамай хомолтото
Оҕотун сүтэрбит кэмнэрэ,
Ытыан да, хаһыытыан билбэккэ
Тулатын эргиччи көрбөхтүүр.

Тулата уу чуумпу сатыылыыр,
Көхсүгэр ыар таастыы саайыллар,
Дууһата, сүрэҕэ кураанах,
Дөйүөрэн тиит мастыы тураахтыыр.

Туох кэлэн киниэхэ көмөлөһүөй,
Ким кэлэн оҕотун төнүннэриэй,
Аптаах да күүс ол ону быыһаабат,
Таҥара ыйааҕа буоллаҕа.

Соҕотох ийэни аһыммат,
Хараҕын уутунан сууннарар,
Ытаама, ийэкээ, ытаама,
Хараҕыҥ ууларын илгэн кээс.

Оҕолоруҥ, сиэттэриҥ туһугар
Олоххун ситэри олорууй,
Билэбин эн хаһан даҕаны
Умнубат эйгэҕэ киирбиккин.

Билэбин эппинэн-хааммынан
Сүрэҕиҥ нүөлүйэн ыларын,
Утуйан даҕаны уоскуйбат
Ынырык түгэҥҥэ киирбиккин.

Хомус

Истэбин хомуһум тыаһыгар
Күөрэгэй дьырылыыр ырыатын,
Өлүөнэм үллэҥниир долгунун,
Туундарам нэлэмэн хочотун.

Табакам айанныыр сырыытын,
Кыыс Аммам сөтүөлүүр ууларын,
Хотой кыыл үөһэнэн көтөрүн,
Үөр сылгы иҥэрсийэн ыларын.

Дьүрүһүй, хомуһум, дьүрүһүй,
Эн ырыаҥ үөһэттэн кутуллар,
Сүрэххэ дириҥник иҥэллэр,
Дьолунан, үөрүүнэн туолаллар.

Алаас алтылҕана

Элэмнэс аппынан айаннатан
Эниэни таҥнары түһэбин,
Төрөөбүт алааспар киирэммин
Төбөбүн хоҥкутан турабын.

Саныыбын ол туран ийэбин,
Үүт сыттаах илиитин сыллыыбын,
Халадаай ырбаахы таһынан
Ыксары кууһабын ийэбин.

Ийэкэм төбөбүн имэрийэр,
Түһэҕэр олордон, кууспахтыыр,
Мин оҕом дьоллоохтук олоруо,
Үөрэхтээх үлэһит буолуоҕа.

Алааспын эргиччи көрөбүн,
Туох да суох ол онно билигин,
Оҕо буолан сүүрбүт кырдалым
Сибэкки отунан тэлгэммит.

Өтөҕүм оннугар билигин
Хаптаҕас, дьордьуман үүммүт дии,
Ытыспар хомуйан ыламмын
Сиэтим дии тотуохпар диэри мин.

Кып-кыра көлүччэм барахсан
Ып-ыраас уугуттан амсат дии,
Сүһүөхпэр, сүрэхпэр иҥэрэн
Күүс-күдэх ылынан барыам дии.

Сотору сынньана барыаҕым,
Дойдубар эргийэн кэлиэҕим,
Алааспын чөлүгэр түһэрэн
Сынньаныам, олохпун уһатыам.

Саһарҕа

Сарсыарда саһарҕа тыгыыта
Хаамабын сиик оту кэһэммин,
Ып-ыраас таммах уу атахпын
Сиигирдэр сып-сылаас уутунан.

Хаамабын сымнаҕас отунан,
Нассыын от тэлгэммит сиринэн,
Түөспүнэн толору тыынабын,
Сибиэһэй салгыны ыймахтыы.

Саһарҕа чаҕылла сыдьаайан
Күлүмнүүр кустугун оонньотто,
Күөрэйдэ саҥа күн сарсыарда
Сырдатта алааһым сыһыытын.

Эрдэһит бөтүүгүм хаһыыта
Туруорда үлэһит дьоннорун,
Ынаҕым маҕырыыр саҥата
Сайылык иһин аймаата.

8 сентября, 2014 Главные новости

Добавить комментарий

*