САҺАРҔА: Олох устар түргэнник

23 сентября, 2014 в 1:28
Уу оргуйар

Кэтэһиий, эн миигин доҕоруом

Тоҥуу хаары кэһэммин
Аппынан хаамтаран иһэбин,
Көҕөччөр атыырым үөрүн
Хомуйан илдьэ иһэбин.

Үрэҕим устун батыһан
Алааспар эрдэ тиийдэрбин,
Күнүм киэһэрэн барда дии,
Дьиэбэр хойутуур буоллум мин.

Алааһым көһүннэ, оо, үөрүү,
Үөрдэрбин хаайыаҕым түргэнник,
Суолум төрдүгэр киирэммин
Дьиэбэр ойутуом түргэнник.

Дьиэбэр күүтэр кэргэним,
Түннүккэ кэтэһэн турдаҕа,
Оҕом утуйан ырааттаҕа,
Түүн түһээн миигин көрдөҕө.

Тиийиэм сэгэрбэр түргэнник,
Кууһан ылыаҕым нарыннык,
Сүүскүттэн сыллаан ылыаҕым,
Ахтыбыт эбээт сүрэҕим.

Атым барахсан айаннатыый,
Дьиэбэр түргэнник тиэрдиий,
Ыйым суолбун сырдатыый,
Доҕоруом кэтэһиий эн миигин.

Балтыбар Прасковья Константиноваҕа

Күлэн -үөрэн, мичилийэн,
Хааман-сиимэн дугулдьуйан,
Кэпсээн-ипсээн сэргэхситэн,
Киирэн кэллэ Туйаарыма.

Кини аанньал кэриэтэ,
Кэтэһэллэр-манаһаллар,
Сүбэ-ама ылаарылар,
Санааларын түмээри.

Астаабыт аһа амтаннаах,
Иистэммит ииһэ түмүктээх,
Оҥорбута оруннаах,
Санаабыта сатанар.

Билиитэ-көрүүтэ баһаам,
Тохтоон турбат кини онно,
Сүүрэр-көтөр, түбүгүрэр,
Сиэнин да бэрийэн ылар.

Кини кимий ол диэтэргит,
Таайыаххыт суоҕа олоччу,
Таайбарыҥнаамаҥ даҕаны,
Кини мин балтым Боккуойа.

Эр дьон ымсыыра көрөллөр,
Кистии саба иҥээҥнииллэр,
Онно эрэ кыһаммаппыт,
Бэйэтэ таптыыр киһилээх.

Олох устар түргэнник

Олох устар түргэнник,
Билбэккэ да хаалаҕын,
Номнуо маҥан баттахтар
Чанчыктарбын саппыттар.

Эдэр-сэнэх кэмнэрбит
Эргийбэттии усталлар,
Кыайан тутан ылбаппыт
Ол ааспыт түгэннэри.

Токуруйбут тобуктар
Аны сүүрэн бүттүлэр,
Имигэсчээн тарбахтар
Мастыйбахтаан хааллылар.

Ыырбыт суола кыччаата,
Өйбүт-санаабыт кылгаата,
Кырдьыы кэмэ чугаһаата,
Ыксал буолла биһиэхэ.

Дьоһуннаахтык түмүктүүр
Дьыллар тирээн кэллилэр,
Сиэттэрбит барахсаттар
Олохторун оҥоруохха.

Өссө туран хаамыахха
Сүһүөхпүтүн эрчийэн,
Санаабытын түмэммит
Өссө олоро түһүөххэ.

23 сентября, 2014 Главные новости

Добавить комментарий

*