Суруйааччылар Ил Дархаҥҥа кими мэктиэлииллэр?

30 апреля, 2014 в 12:29

Муус устар 30 күнүгэр Дьокуускай куоракка Бэчээт дьиэтигэр СР Суруйааччыларын сойууһун уочараттаах мунньага буолла. http://yktnews.ru/wp-includes/js/tinymce/plugins/wordpress/img/trans.gif

Бу сойуус бэрэссэдээтэлэ поэт Иван Мигалкин ааспыт сыл устата бырабылыанньа, тус бэйэтэ уонна сойуус чилиэннэрэ туох үлэни ыыппыттарын туһунан кэпсээтэ. Үбүлүөйдээх да дьонноро үгүс, тахсыбыт да кинигэлэрэ элбэх, кыттыбыт тэрээһиннэрэ да үтүмэн эбит.

20140430_111724

Сойууска өр сылларга бэрэссэдээтэли солбуйааччынан үлэлээбит поэт Василий Сивцевкэ народнай поэт үрдүк аата иҥэриллибитинэн истиҥник эҕэрдэлээтэ. Ону таһынан Дьааҥы поэта, Дулҕалаах сэлиэнньэтин баһылыга Виктор Стручковка СР үтүөлээх үлэһитин аата бэриллибит. Икки киһи СР тыатын хаһаайыстыбатын туйгуннара буолбуттар, түөрт киһи СР тыатын хаһаайыстыбатын Бочуотунай грамотатынан наҕараадаламмыт.

Быйыл сойуус чилиэнэ поэтесса Н.Михалева — Сайа 50 сааһа туоларынан СР култууратын үтүөлээх үлэһитэ ааты иҥэрэри туруорсаллар. 

Суруйааччы Егор Неймохов туһунан ахтыы кинигэтин эмиэ бу сойуус чилиэнэ Василий Илларионов бэлэмнээн «Саха сирин киэн туттар дьоно» диэн серияҕа киллэртэрбит.

Илларионов

Николай Габышев «Анфиса» «Уран тыл уустара» сериянан тахсыбыт. Степан Дадаскинов талыллыбыт кэпсээннэрэ туспа кинигэнэн күн сирин көрбүт. Онтон да атын билигин баар да, айан-тутан, олорон ааспыт суруйааччылар айымньылара бэчээттэнэригэр сойуус бырабылыанньата кырата суох үлэни ыыппыт.

Айар түмсүүлэр үлэлэригэр күүс-көмө буолаллар.

Бэйэтэ быйыл үбүлүөйдээх Иван Васильевич Мигалкин аҥаардас биир сыл иһигэр тус бэйэтинэн 41 тэрээһиҥҥэ кыттыбыт, географиятынан көрөр буоллахха, эмиэ киэҥ сири хаппыт — Ньурбанан, Сунтаарынан, Бүлүүнэн, Намынан, Хаҥалаһынан сылдьыталаабыт.

Бу сылга киирэн баран, номнуо 32 тэрээһини ытыспыттар. Биирдиилээн суруйааччылар кыттыспыт, ыытыспыт тэрээһиннэрин ааҕан сиппэккин.

Саха Республикатын Суруйааччыларын сойууһа үс анал мэтээли олохтоон турар. Бастыҥ суруйуулаахтар Иван Крафт, Кулантай, Күлүмнүүр аатынан мэтээлгэ түһэриллэллэр. Туһунан бэлиэ значоктаахтар.

Бу кэнниттэн бэрэссэдээтэл сойууска саҥа киирбит дьоҥҥо дастабырыанньаларын туттартаата. Саҥа дьон ахсааныгар биллэр оһуокайдьыт, суруйааччы Николай Сафонов, «Сардаана» биэрии ыытааччыта, прозаик Сардаана Сивцева — Даана Сард бааллар.

И.Мигалкин солбуйааччыта «Полярная звезда» сурунаал кылаабынай редактора Владислав Доллонов кыратык бэлиитикэлээн ылан баран, аны күһүҥҥү быыбарга Ил Дархан дуоһунаһыгар үлэлээн кэлбит бэрисидьиэн Егор Борисов кандидатуратын өйүүргэ ыҥырда.

МСПС (Международное сообщество российских писателей) бэйэтэ туһунан литературнай хаһыаттаах. Онно кылаабынай редакторынан урут  «Якутия» хаһыат редактора суруйааччы Владимир Федоров үлэлиир. Кини соторутааҕыта буолан ааспыт МСПС уочарата суох съеһин үлэтиттэн билиһиннэрдэ. Хаһыаттарыгар Саха сириттэн төрүттээх айар үлэһит үгүһүн бэлиэтээтэ. Онон, нууччалыы тылынан суруйар дьон, биитэр сахалыыттан нууччалыы тылбаастаммыты атыттар даҕаны ити хаһыакка бэчээттэниэхтэрин сөбүн туһунан эттэ.

Выступает В.Федоров

Манна даҕатан эттэххэ, урукку СНГ суруйааччыларын барытын түмэр сойуус бэрэссэдээтэлинэн эмиэ биир дойдулаахпыт Иван Переверзин үлэлиир.

Владимир Федоров:

— Я все еще считаю, что нахожусь в Москве в длительной командировке. Летом хотя бы на две недели хочу приехать в свой родной Таас Тумус, в Кобяйский улус.

Народнай поэт Василий Сивцев В.Федоров нөҥүө Переверзиҥҥэ махталын тиэртэ. Баарына биир да дуоннаах наҕараадаҕа тиксибэтэх улуу поэппыт Иван Гоголевы чиэстиир үлэтин иһин.

— Урут Даниловтар эрэ аатырар кэмнэрэ этэ. Сүдү талаан Иван Гоголев кыайан сыаналаммакка хаалбыта. Леонид Попов, Петр Тобуруокап даҕаны бриэмийэҕэ түһэриллибэтэхтэрэ. Гоголев 50-ча драмалаах, оттон билигин баара эрэ 5 драматическай айымньылаах киһи сыаналанар, — диэн аксакал санаатын аһаҕастык эттэ.

Народнайдар тыллара ыйааһыннаах уонна этэллэрэ оруннаах. Аҕыйах хонуктааҕыта өссө биир народнай суруйааччыбыт, эмиэ бу сойуус чилиэнэ Семен Руфов Поярков аатынан уулуссаҕа Барахов аатын биэриэххэ диэн эппитэ уос номоҕо буолла.

Сойууска саҥа ылыллыбыт ытык кырдьаҕас Николай Сафонов — Дьырылы дьэ үлэлиир-хамныыр буоллаҕым диэн баран тойугунан алҕаата.

Николай Сафонов туойар

ХИФУ саха литературатын кафедратын сэбиэдиссийэ Валентина Семенова:

— Инникитин күүспүтүн түмэн үлэлээн бэйэбитин биллэриэхпитин наада, — диэн биир сойуустаахтарын ыҥырда.

Валентина Семенова

Мунньах кэмигэр поэт Иван Горнай «Муҥур үйэ муудараһа» диэн хоһооннорун саҥа кинигэтин бэлэх тутан үөрдүбүт.

И.Горнай кинигэтэ

Мунньаҕы Иван Мигалкин маннык тылларынан түмүктээтэ:

— Суруйааччы сойууһун чилиэнэ буолуу — киниискэ эрэ ылыы буолбатах, бу айар үлэҕэ кынат анньыы.

Быйыл Саха сирин суруйааччыларын сойууһа тэриллибитэ 75 сылын бэлиэтииллэр.Саха сирин суурйааччыларын сойууһун эрэ үбүлүөйэ үһүө, ол сэттэ уон биэс сыллааҕыта суруйааччылар Саха сирин уонна Саха Республикатын сойуустарабыт диэн арахсыбат этилэр буоллаҕа.

Суруйааччылар итинник хайдыһыылара, тэрилтэлэрин аата этэринэн, биһигини икки сиргэ тэҥҥэ олорор курдук санатар — Саха сиригэр уонна Саха Республикатыгар.

Аныгы мунньах күһүн ыҥыраллара күүтүллэр.

Эбии  түгэн…

Нууччалыы тыллаах поэт Виктор Чернявскай бэрисидьиэҥҥэ мэктиэлээн эрэр киһибитин — Борисов положительнай имиджин оҥорууга кыттыаҕыҥ диэн ыҥыран баран хоһоонунан онтун ыпсарда.

Нуучча киьитэ поэт

Онон, суруйааччылар Ил Дархан солотугар Дьөгүөр Барыыһап кандидатуратын өйүүр туһунан сурук бэлэмниэх буоллулар.

Оччотугар мин аатым онно «по умолчанию» аптамаатынан киирэрэ дуу?

Биир бэйэм хайа да бэйэлээххэ хахха буолуом этэ диэн ааппын мэҥэһиннэрэр санаам соччо суох. Миигинэ да суох мэктиэлээччи күн-түүн үксүү турар курдук…

Венера ПЕТРОВА

 

30 апреля, 2014 Главные новости

Добавить комментарий

*