Суруйбут аатын ылаары: Босхо дьол

18 мая, 2014 в 5:22

Сайын быйыл эрдэлээтэ. Айылҕа эргиирэ түргэтээн эбитэ дуу?

Хайдаҕын да иһин, харах хайҕыы көрөр, санаанан эрэ саатыыр кэмтэн төлө көтөн, эт бэйэнэн эйэргэһиэх, бэрт дэлэйин кытары эҥээрдэһиэх баҕа баһыйар.

Туох барыта тыллар, тыыллар, тыынар кэмигэр хайа эрэ куорат биир дьиэтин кыараҕас хоһугар хаайтаран олоруу таҥара накааһа. Дьолго, мин бу маны уонна кыра атыны тиһээт, көҥүл көтүөм, таска тахсыам, ыраахха ыстаныам. Ол буолар – дьол. Босхо дьол.

Бу күннэргэ үйэбэр үөрүйэхпинэн айылҕаҕа таластым. Манна онтубут ыраах уонна атын да буоллар, мас-от тылларын, күөх баһыйарын көрбүт саҕа сананным.

Мин ийэм эмиэ үөлээннээхтэрин кытары тыа саҕатыгар тахсан хатыҥ уутугар иһит тоһуйан кэлбит.

хатын3

Ити муода биһиги кыра эрдэхпитинэ үөдүйэ сылдьыбыттааҕа. Төһө да бэйэлээх ууну сүүрдэн ылбат этибит да, онтуҥ туһугар эмиэ сонор. Кэлин бааҥкалаах хатыҥ уулара атыыланар буолбуттара. Бу санаатахха, хайа да ууну саахардыы түһэн баран оннук атыылыахха сөп. Оччолорго таах да албын аҕыйах этэ.

Сонор диэбиккэ дылы, тыаҕа туох да соруга суох ойууру кэппэккин. Манна курдук көннөрү салгын сиэм этэ диэн көстөөх сиргэ тиийбэккин. Кырата тугу эрэ үргүү, хомуйа бараҕын.

Ийэм хас хардыытын хара ытым хараҕын араарбакка маныыр. Маанытык таҥыннаҕына киэр хайыһар бэйэтэ, ойуурга бараары гынарын эндэппэккэ билэр. Ыт эрэ ити идэтэ. Урукку ыппыт миигин киирэрбин-тахсарбын маныыртан ордубата. Биллэ да булумахтаныы, биир кэм эргичийии. Мин хаһан хомунан бүтэрбэр тиийбэккэ ыйылаамахтыыра. Тыаны биир гына иккиэн кэрийэрбит ахан. Сааһын тухары баайыыга турбут ыт күнэ-ыйа миигиттэн тахсара. Бөһүөлэги биир гына аймаан барарбыт. Ыт барыта туора көрөрө, уулуссаҕа бэйдиэлээбэти атыҥырыыр буоллахтара.

Билиҥҥи ыппыт босхо сылдьар эрээри, тиэргэниттэн тэлэһийбэт. Куорат ыта диэн туора көрүөхтэрин, биһиэнэ, хата, боотур.

Чиппо у воды

Кырабын-харабын дэммэт, үрэрэ диэн бэйэтин киэнэ. Кини дьарыга ыттары үрүү. Биирдэ үс эсэһит ыт күөйэ сүүрэн кэлбиттэригэр өрө баһыгырыы түспүтүгэр үһүөн үрүө-тараа куоппуттара.

Ойуурга мыык да диэбэт. Дьоҥҥо эмиэ кыһаллыбат. Куоракка биир хоско биир кириэһилэҕэ олорон күнүн аһарарын курдук буолуо дуо, дэриэбинэҕэ ырай олоҕо. Үрэрин оннугар айаҕын иһигэр “ыых” эрэ диир бэйэтэ, антах ыт үрэрин иһиттэ да, дьиэ аанын көҥү көтөн тахсан үрэн тоҕу барар.

Сыылкаҕа барбыт бэйэтэ ырай олоҕор тигистэҕэ. Куоракка баппатаҕа диир кыах суох. Атын хайа ыт биир кириэһилэҕэ хараҕаланан олорбутун туһунан истибит суох. Айаҕын аппакка үрэри эмиэ. Ону ол диэбэккэ эркин нөҥүөтээҕи дьахтар ааттаах сайабылыанньалаһа сатаабыта. Ыкка бэйэтигэр буолбатах, миигин аһара эрдэ турар, ытын күүлэйдэтэр диэн. Өйдүү-саныы сылдьарын курдук, дэлби түүннэри улуйан биэриэ эбит.

Ыппар төлөпүөнүнэн ымманыйдахпына, хайдах буолуон билиминэ эймэҥниир үһү.

ЧЭГДЭ.

18 мая, 2014 Главные новости

Добавить комментарий

*