Суруйбут аатын ылаары: Бэйэ ыккардыгар

2 апреля, 2014 в 4:24
Не болтай

Кэлиҥҥинэн санаабын аһаҕастык этэртэн туттунар буоллум. Мин эрэ үһүө, киһи үксэ кирийдэ. Өйдөрүн ытыйдарбатах өттүлэрэ.

Ол мин да булгуруйбат биир санааланарым саарбахтардаах. Арыт-ардыгар киһи барыта итинник диир, маннык диир, оччотугар мин өйүм тиийбэт буолан, дьон өйдүүрүн өйдөөбөтүм дуу дэтэлиир буолбутум этэ ээ.

Хата, көстөн турар сиргэ диэри биир бэркэ билэр киһибин кытары аргыстаһабын диэн, санаам көтөҕүлүннэ. Мин курдук саныыр киһи баар эбит. Төттөрүтүн, мин кини курдук саныыр инибин. Кини тус санаатын туруулаһарынан, онтун уларыппатынан уратылаах. Сахалыы чиҥ өйдөөх киһи. Урукку өттүгэр кырата суох тойон үһү. Онон, бары биир буолуу кэмигэр соччо быгыалаабатаҕа буолуо гынан баран, бэйэтэ этэринэн, оччолорго да «баппат» үһү. Санаабытын малтаччы этэр киһини билигин да туора көрөллөр. Кини онно, хата, кыһаллыбат. Бу быыһык кэми толору туһана сатыыр.

Кини биһикки отур-ботур кэпсэтэн тыыммытын таһаара түстүбүт. Сотору ол да баҕалаах кэмнэрэ кэлиэхтэрэ ини. Хаһыаттаһа сатаан баран, суруйууларын барытын кинигэ гынарынан үлүһүйэн эрэр. Санаатын тиэрдэ, өрүскэлэһэн, бу бутуур олоххо түөн да саҕа туһаны оҥоро сатыы сылдьар киһи.

Уора-көстө, отур-ботур, бэйэ ыккардыгар, санаа кэтэҕэр, эргитэн суруйуу ис хоһоонун кэннигэр эрэ кырдьыгы булар кэммит кэлэн иһээхтээтэҕэ. Ону була сатааччы баар буолара дуу, суоҕа дуу?

ЧЭГДЭ.

 

 

 

 

2 апреля, 2014 Главные новости

Добавить комментарий

*