Суруйбут аатын ылаары: Күһэлэҥ күүлэй

1 мая, 2014 в 1:39

Бүгүн Биэрибэй Маай. Сайыммыт эрдэлээтэ диэн буолар да, чуо бу күн тыалы-хаары эрэннэрдилэр. Күһэлэҥ күүлэй барыбытын күүтэр.

Күһэлэҥ кэнниттэн күүлэйин дьиҥнээҕэ кэлиэ турар. Урут да оннуга, быйыл да эргийэн кэлиэ. Урут дьон маевкалыы, билигин шашлыктыы диэн айылҕаҕа тахсыахтара, сайыҥҥы өтөхтөрүн булуохтара. Эрдэлээбит ньургуһуннары кэрэхсиэхтэрэ, уһун өрөбүл хас күнүн туһаҕа таһаарыахтара.

Үөрүнэн үөрүүгэ киһи үөрэнэр. Биһиэхэ мэлдьи да оннук. Ол олохсуйбут үгэстэн туора туруннуҥ да туох дьаралыгы иилиэхтэрэ биллибэт.

Бу күн тиийэн кэллэ да, хайдах эрэ халбарыс гыммыт, мүччү көппүт киһи диэн өйү сынньыы саҕаланар. Кэллэктииптэн тэйимээри сылын аайы мэник санаабын хам баттаан маайдыы барар буоларым. Ээ, биирдэ син куоппуттааҕым. Буолаары буолан, букатын кыра сылдьан. Ийэм ааҕы кытта маевкалыы барсан хаалбытым иһин маевкаһыт диэн хос ааты сыл аҥаара сүкпүтүм. Ол сопхуос хонтуоратын дьахталлара да хайаан параадтаабакка күрэммиттэрэ буолла? Таах да кинилэрэ дуо суох киһи элбэх ини. Кыра дэриэбинэҕэ сыл баһыгар-атаҕар эрэ итинник күргүөмнээх тэрээһиннэр буолаллар. Ону хайаан көтүтүөҥүй, дьиэҕэ бүгэн олоруоҥуй. Маевкалыы соруннахха, тыаҕа күн аайы да кыаллар дьыала. Тиэргэҥҥиттэн аҕыйах хаамыылаах сиргэ – тыа, хонуу.

Ол дойдуга аны маайдаабаттар, күргүөмүнэн хаамсыбаттар. Этитиитэ да суох тахсыа эбиттэр, суоҕа бэрт. Урут киин уулуссанан хаамсан өрүс үрдүн диэки халҕаһалаан кэлэн мас трибуна иннигэр турунан кэбиһэллэрэ. Хас Маайы өйгө хатаан сылдьыаҥый. Арай, аһара элбэх шариктаахпын уолаттар тэһитэ ытыалаан хомоппуттарын өйдүүбүн. Сылын аайы хатыҥ, тиит лабаатын тоһутан тылыннарыллара. Онно ардыгар кумааҕыттан сибэкки оҥорон иилэр буоларбыт. Уһун мас төбөтүгэр үрүҥ кумааҕы холууп олордуллара, шариктары баайыллара. Ураатыы барарга бэлэм буоллаҕыҥ ол.

Мин ааппын аан маҥнай ити трибуна ааттатан турар. Өһүү саныыр дьоммун ыыстаан онно миэлинэн суруйан, аны трибуна суруксута диэн аат иҥмитэ. Бу сырыыга сылы быһа ааттаммытым быһыылааҕа. Табельбар «поведение» диэҥҥэ «неуд» турбута да, үчүгэйдик үөрэнэрим өрө тардан, сыллааҕыбар «удовл.» буолбута. Миигин наар физкультура уонна поведение атахтаан, уопсай көрдөрүүнү таҥнары тардарым. Трибуна суруксута аатыран, оннук саакка-суукка барбыппын өйдөөбөппүн. Сыалбын ситиспит саҕа сананнаҕым дии. Оччоттон баччаҕа диэри сирэй аахсыахтааҕар суругунан киирсэр буоллаҕым.

Устудьуоннуу сылдьан микрорайоннарынан параадтыырбыт. Кураторбыт техникум партийнай тэрилтэтин салайааччыта этэ. Онон биһиги группа авангарднай аатын сүгэрэ. Ол Пиночетка диэн ааттыыр препод ким эмэ маайдыы кэлбэтэҕинэ тыыннаахтыы тутан сиир буоллаҕа. Биир сиргэ бөҕүөрүөхпүтүгэр диэри тура сатаан баран эмискэ сүүрдэллэрин өйдүүбүн. Оннук хартыына хас сылын аайы хатыланар.

Манна Дьокуускайга «таах олоруу саарыстыбатыгар» үлэлиир сахха биирдэ шашлыгынан мэҥиэлээн дьону бүтүннүүтүн таһаарбыттара. Хаамар уочараппыт ырааҕа да бэрдэ. Кэтэһэ таарыйа Күөх Хонууга шашлык, бырааһынньык бөҕөтө. Ленин пааматынньыгын аттынан хайдах ааспыттарын билбэт буолуор диэри маайдаабыттар да бааллара.

Күргүөм диэн тыл трендовай буолуута онтон мүччү түһэр өссө уустуктарданан эрдэҕэ. Параакка тахсыбыт бириэмийэтин сүтэрбэт, ГТО нуорматын туттарбыт хамнаһа үрдүүр диэн кэпсэл баар. Манньалаатахха күргүөмүнэн ким диэки буоларыҥ көҥүл.

Онон-манан араҕас тумалаах, кыһыл кыбытыктаах биир кэм күөх долгуҥҥа олорсон өссө биирдэ маайдыыр буоллахпыт.

ЧЭГДЭ.

 

1 мая, 2014 Главные новости

Добавить комментарий

*