Суруйбут аатын ылаары: Сана лоскуйдар

23 апреля, 2014 в 12:48

Бэйэм бэлэм уобараспын

 

Биир улахан кыһалҕа быһаарыллан һуу диэри гыммытым да, онтум син биир салгыылаах. Итиннэ-манна бытарыйан, сарсын дьылҕам быһаарыллыахтааҕын туһунан оройдотор соло суох.

Эмиэ да үчүгэй. Буолуохтааҕы бүөлүү түһүөхтүү тоҕо эмиэ айманан. Кэмин иннигэр кэриэлийэн, хоһоон тылыгар холбоон сөп гыннаҕым. Билигин баары ороон ылан лоскуй оҥорор эрэ кыахтаахпын. Кыаҕым тиийэрин тухары тиһиликкэ тугу эмэни да эбэ турар баҕалаахпын.

Ыйыппакка эрэ атыттары дьоруой гынан сордуур этим. Билигин бэйэм бэлэм уобараспын. Бэйэм олохпуттан ордубут кэрчигэ – сүһэн ылыллар сүһүөт дуома.

Ол диэн, өссө биир сайыммытын уордарар буоллубут. Сарсын ол кытары суолтата суох буолан соһутара дуу?

 

Ситтэрбэт кирбии

 

Ыра санаа ырааҕы чугаһатар, суоҕу баар гынар диэн ыаһахтыыллар.

Ыра ыҥыран ыраатар, өлөн-охтон биэрбэккэ өнүйэр буоллахпыт. Кимиэхэ эрэ төрүөхтэриттэн төлөннөөх төлкөнү дьоно түстүүллэр. Мин оҕом улуу киһи буолуо диэн хас ийэ алҕас тылласпытын аайы аартык аһыллан биэрбэт. Улуу буолуу диэн уодаһыннаах, уйара уйуо. Дьон тыла ситэн сиир, алдьатар адьынаттаах диэн. Аһара арбыыр, халлааҥҥа диэри хайгыыр тыл оннооҕор ордук кутталлаах курдук. Ол төбөнү эргиттэ да бүтүүкэтэ. Киһи уонна өрүттүбэт.

Ийэ оҕотугар үчүгэйи баҕаран, ымманыйан саҥарарын быһыыта. Оҕо өйүгэр үйэ-саас тухары сүппэттии иҥэн, олоҕун бүтүннүүтүн ол ситтэрбэт кирбиини ситэргэ аныа дии санаабата биллэр.

Сороххо ийэтэ эппитэ суолдьут сулус кэриэтэ олоҕун сүрүннүүр. Ыы, оҕом улааттаҕына улуу суруйааччы буолан улахан да улахан кинигэни суруйуо диэбитин күн аайы хатылаан, чахчы, суруйааччы буола үүммүт син баар. Сороҕу биллэ-көстө сатаама, сымыыттааҕар бүтэй буола улаатаар диэбиттэрин утары баран, соруйан өсөһүгэр аатыран алдьанар. Аат-суол толуга улахан. 

Туох барыта толуктаах. Аатыран да баран аллара аараан ааһары, биллэн да баран бэтэрээнэн ыырданары, солотуйан да баран солколуу майгыланары, байан да баран биир уларыйбат сүрүннэнэри сатыыр киһи ахсааннаах.

 

Дьол

 

Соһуччу үөрүү. Саамай үрдүк үөрүү! Өссө да эрдэ өһөргө, үөстэн туораан биэрэргэ.

Туһата биир – хас күнү бэлэх дии үөрэнии. Табыллыбатын, баҕар, туох эрэ. Мал буоллар сүттүн, киһи кэлэттин, харчы бүттүн. Бу баарыҥ да баһаам.

Дьол диэн бу түгэн.

 

23 апреля, 2014 Без рубрики

Добавить комментарий

*