«Суруйбут аатын ылаары», сурулла сылдьартан: Бутэйэ буемурэн

11 апреля, 2014 в 2:55

Хобдох сонун буолаарай – «Голос Америки» диэн араадьыйанан биэриини боппуттар үһү.

Ол эрэ үһүө, атын социальнай сеть арааһын эмиэ кырыылаах харахтарынан көрөн эрэллэр. Америка диэн тыллаах барыта сотору сотуллара буолуо. Арыыламмыппыт да букатын вакуумҥа киирэрбит эрэ хаалла.

Ити биэриини кэлин истибит да суох. Араарыллыбат араадьыйа баарына тыаҕа олорор эрдэххэ устар күнү быһа араадьыйа биэриилэринэн саатыырбыт. Тыала суохха тыас курдук – баара, суоҕа биирэ. Билигин анаан араадьыйа истиэхтээҕэр тэлэбииһэртэн сорох тэйбитэ ыраатта. Уонна кэлэн аһыйан эрдэҕим дуу? Дьыала чопчу биэриигэ буолбатах, атыҥҥа. Чэ, ол атын туһунан анааран бардахха, бүгүн бүтүллүбэт.

Араарыллыбат араадьыйаттан ордон, аҕам улахан спидолатыгар биир долгуну булларара. Кыра эрдэхпинэ сарсыарда эрдэ уонна киэһэлик эмиэ «Голос Америки» диэн икки тылы истэ үөрэммитим. Буолуохтаах буолуохтааҕын курдук этэ. Тоҕо, дьэ, дьаарай хомуньуус аҕам өстөөх долгунун булларан, сыыһа биэриини истэрий диэн ыйытык ыйамматаҕа. Оттон күнүн аайы биир информацияттан арыый атыны ол эрэ долгунтан булаллара этэ буоллаҕа.

Сайдан-сайдан аан дойду хайа да муннугар ким тугу тыбыырбытын кытары куйуурдаан булан ыларга, саатар виртуальнай көҥүлгэ үөрэнэн испиппит баара, эмиэ өлүүлэммитинэн уонна өтүүктэммитинэн сөп буолар сүөргү кэмҥэ үктэнэн эрдэхпит.

Атын баара ааларынааҕар бүтэйэ бүөмүрэн тугу да билбэтэх-көрбөтөх ордук дэһэр буоллахпыт. Хара уу ньуурун устун хатайданар харааптан ханна да барар кыаҕа суох аата.

ЧЭГДЭ.

 

 

 

 

 

 

11 апреля, 2014 Без рубрики

Добавить комментарий

*