Тус санаа: Ааты ааттаһан ылбаттар

19 мая, 2014 в 3:21

Харчы, былаас, аат-суол. Ол туһугар киһи тугу да кэрэйбэт эбит.

Харчы хаҥыы туруо, былаас иититтэн өтөр тахсыахпыт суоҕа диэбиттии өрө мөхсөллөр, өлөллөрүнэн түһэллэр. Харчы саҕа халбархай, былаас саҕа быдьар уонна тиэрэ эргийиик кэриҥ суох ини.

Арай аат-суол ити икки кэриҥтэн тутулуга суох буолуохтааҕа. Үбүнэн кэмнэммэт үтүө, дьол толуктаах дьоҕур, сыллата барбыт сыраҥ кэлиин-кэлин сиэтэн аҕалыахтаах этэ. Онтубут эмиэ тиэрэ эргийэн, үп үҥкүүлэтэр, былаастаах быһаарар туох эрэ былдьаһыктаах… туох диэххэ сөбө эбитэ буолла, устуукатыгар кубулуйда. Били духуобунай диэммит итиннэ эмиэ материальнай бэрдэ буолан хаалла.

Ааты ааттаһан ылбаттар, кэм-кэрдии көҥүллээтэҕинэ, дьон-сэргэ сөбүлээтэҕинэ бэйэтэ кэлэр буолуохтаах этэ. Ону быһа түһээччи үксээтэ. Кэмин иннинэ кэпсэтиһии, дьону нөҥүөлээн үрдүк өһүөлээхтэри манаһыы. Бэйэ сүүрэн-көтөн, киирэн-тахсан, ньымааттаһан, ньылаҥнаһан, эргитиһэн, эрийсэн, улахан эрэйинэн, туохха эрэ мэнэйинэн сонордоһон ылбыт аата да диэн.

Былдьаһыктаах буолла аны аат-суол. Бэйэ түөһүн охсуна-охсуна мин аҕай дэммэтэҕинэ, ким да эйигин кэпсиэ-макаар диэ суоҕа ини. Бааргын биллэриминэ айа-тута, үлэлии-хамныы сырыттаххына, ол сылдьан улууну да уһааран таһаардаххына, били бэйэлэрин бэйэлэрэ бэрт дэнээччилэр урут түһэн улуутуйуохтахтара, эрдэ тииһэн эбиниэхтэрэ. Мөлтүүр-алтыыр, өлөр-сүтэр күҥҥэ-дьылга били тыл, кэпсэнии кэтэҕэр туохтаахтара тургутуллан ааттара ааттаныаҕынааҕар алдьаныан сэрэйэн, эрдэттэн дьаһанан эрдэхтэрэ.

Сир баайа бараныыта, сайда сатаан баран самнан барар сахха ааты кытары атыылаһан, тыыннаахха ол суотугар ордуктук олоро түһээри гыналлара буолуо. Тумулук туттуохтаах өйүнэн өнүйбүт дьоммут бүтүн киһи аймах бүтэһигин олорорун баттаһардыы сүпсүгүрэллэрин туһунан иһиттэххэ, санаа ордук түһэр.

Ама да аат-суол баҕалааҕын иһин баардааххын барытын ол туһугар туран биэрии атыыга кэлбит аатыҥ кэтэҕэр ыыс тылы ыйаан кэбиһээрэй?

Бастыҥ, ол аата баартан барытыттан бастаабыт, чулуу, ол аата эн ордуккун дьон таба көрбүт, улуу, ол аата кэлэр кэминэн тургутууну ааспыт. Норуодунай, ол аата бар дьон баардаах диэбит, билбэт да дьоно билиммит, норуотугар, омугар сүдү үтүөлээҕин итэҕэппит киһи. Ил хайа эрэ дархана тылын тиэрдэн уустук үллэһиги быһаарда да быраап диэн буолбата ини.

ЧЭГДЭ

19 мая, 2014 Главные новости

Добавить комментарий

*