Уйэбит оннук, улэбит оннук. «Суруйбут аатын ылаары» (сурулла сылдьартан)

10 апреля, 2014 в 3:46

Хас күнүм барыта биирдик таҥыллар. Ол туох да куһаҕана суох. Өйү сыспакка, аптамаатынан олорор, үлэлиир буоллахпыт. Айар үлэни кытары аптамаакка, автопилокка дуу туруоруохха син эбит.

Айар диэн, баҕар, аһара улаханнык ааттаабытым буолуо. Оттон суруйан хамнастанар аата, син биир кыралаан айар инибин. Биитэр баары батыһа балыыҥкалыырым айар суотугар киирсибэтэ дуу?

Хайдаҕын да иһин, айа сатыыбын. Бэйэ тылынан бэрди да, бэтэрээнэн да соҕуһу ааһан иһэн айыахха син. Итинник этэрбэр тиийэбин – уу чуумпуга санааттан саҕыллары суруйар түгэн кэмчи. Барыта ааһан иһэн, алҕаска аараан. Бу да тэлэбииһэр тэрил, төлөпүөн обургу төлө барыахтарын иннинэ кыл мүччү тиһэ сатыы олоробун. Онтон атына олохтон бэйэтиттэн нэһиилэ оронон тахсан, санаа сахпытыттан саҕаланан сурулла охсор.

Ыарырҕатарым диэн – нууччалыы суруйуу. Ол да тылынан ааһан иһэн айарым, алҕаска аараат клавиатураны табыгыратарым буоллар, саха тэҥэ суох сананыам этэ. Дьэ, онно кэлэн өйү өрүкүтүөххэ, былыр дьапталлыбыты түөрүөххэ наада. Өссө оскуола сахха нуучча тылын уонна литературатын олус бэркэ үөрэппиттэрэ иҥэ сылдьар буолан, ити да кэриҥҥэ аптамаат холбонон ылар. Хаһан эрэ аахпытыҥ, учуутал этэрин хатылаан суруйбутуҥ син өйгө хааллаҕа. Мэйии диэн син биир информацияны, звуковой уонна видео файл курдуктары сүппэт хасааһыгар илдьэ сылдьыахтаах.

Сайт сонуннарын тиһэр элбэҕи суруйа үөрэммит киһиэхэ маҥнай табыгаһа суохха дылыта, кэлиҥҥинэн хаһыаттааҕар ордоруох курдукпун. Иһэ үлүннэҕинэ, биэс этиинэн сонуну тиэртиҥ да, бэйэҥ киэнэ. Сүрүнэ – суруйууҥ аата иһинээҕи информациятынааҕар ордук дириҥ буолуохтаах. Хаһыытыы сылдьыахтаах. Иһирдьэ киирбиттэрэ – аатыгар сылдьар этиини сайыннарар оннугар түмүктүүр эрэ тыллар баар буолуохтара. Киирдиннэр эрэ, аахтыннар эрэ. Эттээх суруйууну тулуйан ааҕар уһун тыыннаах аны суох. Информация эрэ илэ мэнээк. Аныгы супермаркетка киирэн баран киһи хараҕа иирэрин курдук, дьон тугу таба көрбүтүн аахтаҕына ааҕар. Ол иһин онно эмиэ маркетинг сокуоннара үлэлииллэр.

Ааһан иһэн айааччы суруйбут аатын ылар. Алҕаска аараан үрдүнэн-аннынан ааҕааччы аахпыт курдук сананар. Үйэбит оннук, үлэбит оннук.

Хаһыат сирэйигэр баппакка эттээх суруйууну эмтэритэр адьынаппын манна кэлэн илгэммин, халыйдар халыйа сыстым дии. Нуучча тылын оскуолаҕа үчүгэйдик үөрэппиттэрэ бу туһалаан эрдэҕин диэри бу суруйууну саҕалаатым этэ. Саха тылын ол оннугар соччо үчүгэйдик үөрэппэт этилэр. Ол нуучча тылын учууталлара чаас эбинээри сахалыыга кытары кыттыһаллара.

Ити тылынан илэ кэлэн санаабын сайа эппэтэҕим иһин, аптамаатынан суруйууга бэлэм лоскуйдары өйүм түгэҕиттэн хостоон туттабын. Учууталларбыт барахсаттар үөрэтэн үөрэппиттэрэ биир кэлим билии курдук да буолбатар, итинник лоскуйдарынан бүтүн сылдьара улуу дьол.

ЧЭГДЭ. 

 

 

 

 

 

 

 

10 апреля, 2014 Без рубрики

Добавить комментарий

*