Хаайыы халҕана чып гына хатанарын курдук…

9 октября, 2014 в 1:17
2-2.Хаайыы халгана чып гына

Биир бэйэм суруналыыстаан аһыыр буолуохпуттан бу дьыала сыһыллар-соһуллар. Ону эрэ да суруйан суруйбут аатын ылыахха сөп.

Уһун-киэҥ сууттарга Афанасий МАКСИМОВ чугас дьонун кытта биир кэккэҕэ олорон, тыыммакка да эрэ бу сырыыга баҕас киһибит кырдьыга кыларыйан тахсар ини диэн эрэл кыымын күөдьүтэ сатаабыттааҕым.

Суох, сыл ааста, икки-үс сыл дуу, дьыала хатайдана сатаан баран, Афанасий Николаевич уонна Иннокентий ПАХОМОВЫ эмиэ күлүүс хаайыытыгар уураахтаатылар. Эмиэ да Максимов бэлиитикэ киинигэр сылдьарга, орто дойду дьолун билэн, уол оҕолонон, кэрэ ойохтонон, тус бөртөлүөтүнэн Саха сирин тилийэ көтөн, барыта этэҥҥэ буолуох курдуга. Онтубут эмиэ итинник тиэрэ эргийэн таҕыстаҕа.

Ити тухары бу күннэргэ үйэ аҥаардаах үбүлүөйүн бэлиэтээбит киһи доруобуйата биллэ кэрбэннэ, дьонун да киэнэ тупсан испэтэ буолуо. Маҥнайгы ойоҕо, оҕолоро кытары улахан охсууну ылбыттара. Бу сырыыга өссө олорор дьиэтэ-уота суох хааллахтара.

Суут уураахтаата да бүтүүкэтэ диир сыыһа. Хас сүүстэ үҥсүһэн хат көрүллүө, көтүрүллүө биллибэт. Оттон олох устан иһиэ. Онтон биир да күнү түрмэҕэ атаарар сыанан аҕаабат.

Быыбар буолаатын кытары, ити курдук быыс түһэн, оонньуу бүтэн, дьиҥ олох дьэбирэ көстүтэлээн истэҕэ. Хаайыы халҕана чып гына хатанарын курдук, барыта лыгыччы хатаммытын кэннэ, олохпут биир ии иһигэр, биир бөлөх дьон санаатын хоту салаллан бараахтаатаҕа.

Өссө 50 мөлүйүөн төлүүрдээх хааллылар. Бырааттыы Магомедовтарга. Дьэ, хайдаҕый?.. Максимов Москубатааҕы квартиратын атыыта эмиэ ити Магомедовтар хармааннарыгар киириэ үһү.

Афанасий Максимов өссө эбии 900 тыһыынча ыстараабы төлүөхтээх. Кэргэнин ийэтэ инньэ урукку сууттар быыстарыгар киһибитин кырытыннардылар даҕаны, харчыта да быһынна диэбиттээҕэ. Магомедовтар маҥалайдарын толорорго били бэртээхэй оҕо оонньуурун курдук көстөр бөртөлүөт кытары атыыга барара буолаахтыа.
Максимов бэйэтэ этэринэн, кини дьыалатыгар туох да кириминээл суох, барыта бэлиитикэ. Сууттар бэлиитикэттэн быһаччы тутулуктаахтар. Итиннэ биһиги бэйэбит бадарааммытын бэрэлиир улахан туустар интэриэстээхтэр.
Бу дьыалаҕа 70-ча туоһу ыйытыкка сырытта. Төһөлөөх том суруллубута биллибэт.

Тиэрэ сууттаах, тутулуктаах сууттаах, сутурук оруолун толорор сууттаах кэмнэри кэрэһилиир бу дьыала кэнэҕэскитин юристары үөрэтэр кинигэҕэ киириэ эбитэ дуу… Аматын да иһин, маннык быһыы-майгы хаһан эмэ арыый атынынан солбуллар ини.
Венера ПЕТРОВА.

9 октября, 2014 Главные новости

Добавить комментарий

*