Хаартыскаҕа хабыллыбыт түгэн: Тимирбит «Украина»

8 сентября, 2014 в 2:33
IMG_20140908_082903

Барытын сыл-хонук симэлитэн, кэм-кэрдии кэрбээн, олохпутуттан ордоро ордор.

Тутан хаалара туга да суох сылдьан, сир үрдүгэр сүгүн сылдьар аат диэн суох. Бүгүн муҥур былаастаах, сарсын киһи аахсыбат киһитэ буоллаҕына көҥүл ээ. Оннук дьон сүтэрэллэрэ үгүс, сарсыҥҥылара сатанарын туһугар бүгүн дьаһаннахтарына эрэ сатанар. Оттон ол дьон этэринэн сылдьааччыларга саатар эрэ сарсын үүннүн. Бүгүҥҥү бүүрүктэнэ охсон бүтэйэ оһоругар ыксааччы үгүс. Кинилэр баайдара диэн сарсыҥҥыга эрэллэрэ.

Сайын аайы ыырым аарыыр ырааһыйам отунан-маһынан саба үүнэн киһи билбэт буола уларыйбытыгар муна оонньуубун. Атын кэм кэллэр кэлэн иһэрин мас түргэнник үүнэрэ кэрэһилиир.

Уолбат уулаах Угуйа диэн ааттыын угуйар улуу үрэх иккис аата Украина диэн буоларын саҥа биллим. Инньэ былыр ийэм ааҕы кытары маевкалаһа диэн манна кэлсэммин оскуолаҕа дьүүллэнэрим саҕана, чахчы, бу үрэх төрдүгэр «Украина» диэн катер үйэтин моҥоон, тоҕо эрэ итиннэ дьаакырдаммыт этэ. Дьэбиннирэн эрэр хараап харахпар көстөн кэллэҕэ үһү. Бырааттыы норуотугар кырдьыгынан сулууспалаабыт катер Угуйа барбыт чэйдии кыһыл уутун аннын буллаҕа.

Онон манна бэйэбит Украиналаахпыт, тимирбит аалы кэриэстээн, ытык аакка ити тылы мэҥэһиннэрдэхпит. «Украина» биһиэхэ туһалаабыта үгүс. Украина уолаттара дьиэ бөҕөтүн тутан дьэндэппиттэрэ биһиэхэ билиҥҥэ диэри сулууспалыы турдахтара. Биһиги кыргыттарбыт сорох-сорохторугар эргэ тахсан, ити славян норуотун кытары хааммытын холбоотохторо.

Аныгыта туран, ити норуоту да, дойдуларын да ахтарбыт атын суолталаах буолаары гыннаҕа үһү.

От ыйын 10 күнэ. «Алтан Сэргэ» 28 №-рэ, от ыйын 22 күнэ.
Хаартыскаҕа: «Украина» Угуйа от уонна балаҕан ыйдарыгар.

8 сентября, 2014 Главные новости

Добавить комментарий

*