Хаһааҥҥа диэри маннык олоробут? Саха араадьыйата

26 июня, 2015 в 2:29
загружено

Бүгүн эмиэ араадьыйа, телевидение кыттыылаах аһаҕас эфир буола турар. Кыттыһа сатаатым, үгэс курдук, тахсар телефонун нүөмэрин уларыттахпына, оператор ылан билигин холбуом диир даҕаны, ааппын-суолбун эттим да арааран кэбиһэллэр. Сороҕор биэрии бүтүөр диэри харчы аахтара тураллар.

Кэтэһиннэрэн баран холбооботтор, параллельнай телефону холбууллара иһиллэ турар. Бу барыта ыйытар ыйытыгым эриэхэбэйин түмүгэ диэччилэр бааллар да, мин санаам атын. Миигиннээҕэр өйдөөх, уустаах тыллаах буолан, дьону салайа, дьаһайа сылдьар дьонтон өйдөөбөппүн өйдөтүҥ диэн ыйытарым тоҕо сатамматый? Дэҥҥэ ыанньыйбыт санаабын тиэмэҕэ сыһыаран ыйытааччыбын. Ол барыта, Путин этэринии, дьон туһугар үлэлиир дьонтон, кимиэхэ эрэ наадалаах буолаарай диэн ыйытабын. Бэйэм туспар, хамнас, дуоһунас, дьиэ-уот, наҕараада туруорса иликпин, бэйэм өйдүүрбүнэн.

Боппуруостарбар эппиэттэри сорох булан саҥарбатаҕа мин буруйум үһү дуо? Онон араадьыйаҕа демократия тохтоото дуу диэн ыытыахпын баҕарабын.

Сибээс үлэтэ олох куһаҕан, тиийбэт. Миниистирдэрэ Борисов эмиэ ханна эрэ бултуурун туһунан киинэ устан харчы оҥороро буолуо диэхпин, мин туспар араадьыйа режиссердара Юрий Босиков, Юрий Чокуров күннэригэр телефону ыла да барбаттар. Оо, аптаах буолан, кинилэр ким сорудаҕын толорооччу буолалларын билбит киһи… Эбэтэр атын режиссеры Новгородованы Саҥа дьылынан  эҕэрдэлээн, онно күнүүлээн муҥнаналлара дуу? Хайдаҕын да иһин, ханнык да киһи көҥүлүн күөмчүлээһин, куолас быһан сэнээһин сэттээх, иэстэбиллээх буолар. Атыҥҥа баҕарбытыҥ бэйэҕэр кэлэр диэн дириҥ өйдөбүллээх өс хоһоонноох этибит.

Мин араадьыйаҕа куруук ыйыта сатыыбын да, манныкка эппиэт ыла иликпин: республиканскай тэҥ харчыны оҕоҕо, пенсиялаахха, чааһынайга, бюджетникка тэҥник биэрэллэрэ тоҕо сатамматый? Ону эһиги бырыһыанынан эҥин тэҥ диэн булкуйумаҥ. Хамнас акылаатыгар сыһыарбакка бэриллэрин тоҕо туруорсубаккыт диэн ыйытыгым. Билэбин, ити харчы бюджекка чуолкайа суох көстөр. Ол коррупционер тойоҥҥо улахан туһалаах буолан аныаха эри быһаарыллыбат диэтэхпинэ, хамнас разницата кыччыырынан, сокуон иэччэҕинэн туһана олорооччулар сүтэрэллэрэ элбэх буолан, сыалай тойоттор касталара утарар. Мэктиэтигэр, ити боппуруоһу көтөҕөн депутат буолбут киһи улахан сурук бэлэмнээбитэ ситэ илик үһү. Уонна профосоюзпут урукку тойоно суутунан быһаарар быраабын туһанарын умнан кэбистэ. Эмиэ саҥа быыбар буолан, эмиэ кимнээх эрэ былаас былдьаһыыларыгар куоһур буолан быһаарыллыбата наада быһыылаах.

Өрдөөҕүтэ биир райком үлэһитэ демократтар быыбардааччы 50 %-тан тахсата недовольнай буолалларын оҥордохторуна, эмиэ былаас уларыйыа, биһиги тахсыахпыт диэбиттээҕэ. Тоҕо тойотторбут биһиги эрэ этэрбит сөптөөх, үлэбит үчүгэйи аҕалыа дииллэрий? Тоҕо умналларый бэл төрөппүт оҕотугар үчүгэйи баҕаран ииппитэ олох атын кэтэспэтэх түмүктээх буоларын? Рынок үйэтигэр ким байарын, субсидия көмө ыларын-ылбатын быһаарар тойон буолуон баҕалаахтар былаас былдьаһалларын көрө эрэ олоробут дуо?

Тыа сирин олохтооҕор хас да сыл барыбытыгар тэҥ харчы биэрбиттэрэ буоллар, ким сүрэхтээҕэ, үлэһитэ, өйдөөҕө былыр биллиэ этэ. Ону баара билигин тойоҥҥо бэрт буолбут, араас өҥөнөн туһанар, ньылаҥнаабатах тойону куоластаабатах атын сиргэ көһөрүн бары көрө-истэ олорон олохпут оннук, көнөрө саарбах, араадьыйаҕа саҥарыма дии сырыттахпытына. Сорохтор араас тэрилтэни бары банкроттатан баран байдылар диэн кистээн сибигинэһэ олорорбут кимиэхэ туһалааҕый?

Хаһааҥҥа диэри маннык олоробут?

Георгий ХРИСТОФОРОВ, Үөһээ Бүлүү.

 

26 июня, 2015 Главные новости

Добавить комментарий

*