Химзаводу утары: Ыҥырыы сурук

6 мая, 2015 в 4:04
соготох эр хоьуун

Кэнники кэмҥэ биһиги республикабыт олохтоохторун болҕомтото ТОСЭР «Заречье» тула тахса турар быһыыга-майгыга күүскэ хатанна.

Норуот ити хамсааһын туһунан төһөнөн өйдөөн иһэр даҕаны, соччонон химзавод тутулларын утарара, сөбүлэспэтин биллэрэрэ күүһүрэн иһэр. Тоҕо? Бу ыйытыкка харда быһыытынан маннык хоруйу биэриэххэ сөп:

  1. Метанолу, карбамиды, аммиагы оҥорон таһаарыы бэйэтэ даҕаны сүрдээх сэрэхтээх. Оттон холобур ылан көрдөххө, атын сымнаҕас климаттаах дойдуларга үлэлии турар собуоттарга тахсар көннөрү техническэй харгыстар, биһиги +40-60 диэри халбаҥныы турар кыраадыстаах климаппыт усулуобуйатыгар улахан содуллаах саахалга кубулуйуохтарын сөбө күүстээх дьиксиниини үөскэтэр.
    2. Атын сылаас сирдэргэ дьаат сиргэ тохтор түбэлтэтигэр, сир анныгар түһэн, аллара араҥаҕа иҥэр эбит буоллаҕына, биһиги сирбитигэр тоҕуннаҕына, ирбэт тоҥу курдаттыыр кыаҕа суох буолан, халыйан, сир аннынааҕы сүүрээннэри кытары устан аһыыр уубутугар, өрүспүтүгэр түһэн аһыыр уубутун сүһүрдэр кутталлаах.
    3. Сууккаҕа, быһа холоон, 10 тыһыынча туоннаттан тахса ууну туттар собуот, иһэр уубутун ырааһырдыбата биллэр.
    4. Наьаа улахан итии кыраадыһы туттан үлэлиир, 1 мөлүйүөн 700 тыьыынча туонна кыамталаах үлүгэрдээх улахан собуот, турар миэстэтин аннынааҕы ирбэт тоҥу ириэриитэ алдьархайдаах саахал тахсар төрүөтүнэн буолуон сөп.
    5. Сахабыт сирин айылҕата сүрдээх уйан. Собуот күннээҕи үлэтинэн таһаарар сүлүһүннэх салгыныттан ылар баастарын оһорунарыгар, чөлүгэр түһэригэр төһөлөөх уһун кэмнэр барыахтарай?
  2. 6. Онкология ыарыыта онто да суох элбии турдаҕына, собуоттан тахсар кирдээх салгын ити ыар ыарыыны өссө күүскэ көбүтүө,элбэтиэ. Ыарыһах оҕолорбут ахсааннара элбээн иһиэ, өссө күүскэ ыалдьан, сүһүрэн барыахтара.
    Бу химзавод тиэрдиэн сөптөөх содулларын ыйан туран, Сахабыт сирин олохтоохторун, омуккутуттан, итэҕэлгититтэн, олоххо, политикаҕа көрүүгүтүттэн тутулуга суох, бука барыгытын, уутунан угуттанан иһэ олорор, ыраас салгынын түөскүтүнэн толору тыына сылдьар, бэйэтин киэҥ дуолунан уһуннаран аһата-сиэтэ, таҥыннара, олоххут уйгутун оҥоро уста сытар улуу Эбэбитин көмүскүүр хамсааһыҥҥа кыттыһыҥ, сарын сарыҥҥытыттан өйөһөн, хаарыан өрүспүтүн харыстыырга турунуҥ диэн ыҥырабыт! Салгын кыраныыссата суоҕун, өрүстэрбит, күөллэрбит бука бары бэйэ бэйэлэрин кытары ситимнээхтэрин умнумаҥ, бары биир сиргэ, биир дойдуга олорорбутун өйдөөҥ, иэдээммит, кыһалҕабыт эмиэ биир буоларын санааҥ! Ил Түмэн депутаттарыгар, айылҕаларын харыстыылларыгар туруорсан накааста биэрэн сурукта суруйуҥ. Үөрэх, оҕо иитэр кыһаларга оҕолор Ийэ айылҕаларыгар харыстабыллаахтык сыһыаннаһалларын өйдөтөр сыаллаах уруһуй күрэхтэрин тэрийиҥ. Олортон талан республика күрэҕэр ыытыҥ. Аймахтаргытыгар, доҕотторгутугар, таһынааҕы ыалларгытыгар, бииргэ үөрэммит үөлээннээхтэргитигэр, ыраах олорор дьоҥҥутугар өйдөтөр үлэтэ ыытыҥ, хамсааһыҥҥа кыттыһалларын көҕүлээҥ. Бэйэҕит идеяларгытын, көрүүлэргитин, санааларгытын бу маннык электроннай аадырыска ыытыаххытын сөп : zarazvitiesakha @ gmail.com Бука диэн химзаводу утарар илии баттааһын хомуйуутугар көмөлөһүҥ. Былырыын Краснодарскай кыраай Темрюкскай оройуонун олохтоохторо метанол оҥорор собуот тутулларын утаран кыайыыны ситиспиттэрин холобур оҥостон, биһиги эмиэ күүскэ туруорсуоҕуҥ. Бары бииргэ буоллахпытына, сомоҕолостохпутуна эрэ кыайыахпыт, ылсыбыт үтүө дьыалабыт табыллыа! Сахабыт сирин кэрэ бэйэлээх айылҕатыттан, Улуу Элиэнэ эбэбититтэн мэлдьи ыла, туһана эрэ олорбуппут — аны билигин утары уунар кэммит кэллэ -көмүскэли, харыстабылы, тапталы!»Защитим реку Лена! » түмсүү кыттыылаахтара:
    Степанов Иван Валентинович
    Байанайдаах кыыһа Сулустаан Мыраан.

http://forum.ykt.ru/viewtopic.jsp?id=3652434

6 мая, 2015 Главные новости

Добавить комментарий

*