Чурапчыга Олоҥхо ыһыаҕа: сыаната 206 мөлүйүөн

20 июня, 2015 в 2:33
images

Бэс ыйа үүннэ, саха сирэйдээх ыһыаҕы ыралаабытынан барда.

Көннөрү дьон бэлэм көргө сылдьан санаалара көнньүөрүө, харчы төлөөн амтаннаах аһы амсайыа, уохтаах кымыһы омурдуо. Ыалдьыттарга арай ас үтүөтэ босхо буолуо. Ыалдьыта суох ыһыах үһү дуо, былыр былыргыттан олохтоммут үгэс кэһиллибэт.

Былыр да ыһыах ыһарга үгүөрү үп наадата буолуо. Онно туттуохпут диэн эрдэттэн сүөһү, убаһа талыллара. Үксүн ыһыаҕы нэһилиэк бас-көс киһитэ анаан тэрийэрэ. Арай билигин уопсай уохха ыһар идэлэннибит. Биир сүрүн улахан ыһыахха бүттүүн күүлэйдиир гына хааһына да харчытын хамната түһүөххэ син сөп этэ. Ону баара биһиги устар сайыны быһа соһулла сылдьан ыһыахтыыр буоллахпыт.

Былырыын Хаҥалас сиригэр Олонхо ыһыаҕын ыытарга 179 мөлүйүөн солкуобай ороскуоттамытыттан 90 мөлүйүөнэ бюджет харчыта дииллэр, 51 мөлүйүөнү улуус уйуммут, 38 мөлүйүөнү “Сайдыы” фонда булан биэрбит.

Оттон быйыл үбүлүөйдээх Олоҥхо ыһыаҕа Чурапчыга ыытыллара былааннанар. Бу аарыма тэрээһиҥҥэ 206 мөлүйүөн солкуобай ороскуоттанара күүтүллэр. Өрөспүүбүлүкэ бюджетыттан 40 мөлүйүөн солкуобай бэриллэрэ былааннанар. 76,70 мөлүйүөнү улуус, нэһилиэк бэйэлэрэ уйуналлар. Манна анаан Чурапчы улууһун сайдыытын «Олоҥхо» фондата тэриллибитэ, кини 89,08 мөлүйүөнү булуохтаах.

Эрэкэлээмэни оҥорооччуларга Саҥа дьыл, быыбар уонна ыһыах саамай харчыланар кэмнэрэ. Ыһыах киэргэтиитигэр диэн чурапчылар харчы бөҕөнү куталлара былааннанар: баннердары, флажоктары, араас атын былакааттары оҥорорго балтараа мөлүйүөн, мэтээллэри, хайҕал суруктары, кубоктары оҥорууга биир мөлүйүөн, атын полиграфияҕа, анал сайт үлэлииригэр 3,67 мөлүйүөн көрүллүбүт. Тыа хаһаайыстыбатын министиэристибэтэ ат сүүрдүүтүгэр Ил Дархан бронзаттан анал бирииһин оҥорорго 100 тыһыынчалаах тендер биллэрдэ.

Маннык далааһыннаах ыһыахха анаан араас ураһалары, сайыҥҥы тутуулары оҥорорго барыта 53 мөлүйүөн көрүлүннэ. 3000 миэстэлээх киин трибуна сыаната 3,7 мөлүйүөн. Олоҥхоһуттар туспа түһүлгэлэрин сыаната 245 тыһыынча солкуобай. Ыһыах саамай сүрүн тутууларынан тойон-хотун тоҕуоруһар түһүлгэлэрэ буолуоҕа: Ил Түмэн ураһата 2,75 мөлүйүөн, Ил Дархан туспа тусаһата 3,25 мөлүйүөн, киирэр анала аан 5 мөлүйүөн солкуобайы эрэйэллэр.

Култуура министиэристибэтэ ааҕыытынан ити Чурапчы ыһыаҕар балтараа тыһыынча вип-ыалдьыт кэлэрэ күүтүллэр. Ил Дархан дьаһалтата 971 киһиэхэ анаан аска сайаапкаласпыт. Ити ыҥырыылаах ыалдьыттар уопсай хорчуоппаны кэрийэ сылдьыбаттара биллэр. Кинилэри аһатар аармыйа эрдэттэн талыллар. Туспа-туора аһыыр дьон буоллаҕа. Биир оннук ураты киһи аһыырыгар ортотунан 2780,64 солкуобай көрүллэр курдук, ол аата бары аһыылларыгар 2,7 мөлүйүөн ороскуоттанар буолан тахсар.

Ыһыах көрүн-нарын көҕүлүү өрөспүүбүлүкэ култууратын бастыҥ дьоно тиийиэхтэрэ. Көр да харчыга турар.

4,7 мөлүйүөн ыһыах аһыллыытын-сабыллыытын тэрилигэр, таҥаһы-сабы тигиигэ ороскуоттаныаҕа. Бу анаан тиийбит дьон хас эмэ хонугу быһа хоноллоругар, олороллоругар, аһыылларыгар диэн 4,65 мөлүйүөн көрүллүбүт. 2,6 мөлүйүөн волонтердар, режиссердар, сценаристар, артыыстар үлэлэрин төлөбүрүгэр барыаҕа. 0,7 мөлүйүөн култуурунай-маассабай тэрээһиннэргэ анаммыт. Биир мөлүйүөн араас спецэффектэри оҥорууга суоттаммыт. 500 тыһыынча техническэй обслуживаниеҕа уонна музыканан доҕуһуолга диэн бэриллибит. Ат сүүрдүүтүгэр диэн 3 мөлүйүөн көрүллүбүт. Ол аата Чурапчы аҥаардас көрө 17,5 мөлүйүөнү эрэйэр.

Ити үлүгэр үп күдэҥҥэ көтүөҕүн, хата, чурапчылар ыһыахтыыр сирдэрин чугаһынааҕы суоллара оҥоһуллан хаалара үөрдэр. Онно диэн 37 мөлүйүөнү көрбүттэр. “Олоҥхо” диэн оҕо эстетическэй киинин 62 мөлүйүөҥҥэ туттарыахтара, Чурапчытааҕы музейы 5 мөлүйүөҥҥэ саҥардыахтара,  600 тыһыынчалаах икки бюст уонна 2 мөлүйүөн суумалаах олоҥхоһукка пааматынньык туттаран ылыахтара.

Чурапчы көрө 79 мөлүйүөн солкуобайга турар. Ити харчыга чурапчыларга 41 кыбартыыраны бэлэх уунуохха сөбө (47 кв.м иэннээх).

Тыа хаһаайыстыбатын министиэристибэтэ Кыайыы 70 сылыгар аналлаах тыа хаһаайыстыбатын үлэһиттэригэр анаан Үс Хатыҥҥа тэрээһин ыытарыгар тендер биллэрбит. Онно баара эрэ биир мөлүйүөн ороскуоттаныа үһү. Ыччат ыһыаҕа Томпо улууһун Мэҥэ Алданыгар ыытылларыгар ыччат министиэристибэтэ 688 тыһыынча наада диэн быһаарбыт.

Отуттан тахса улуус, ол улуус бары нэһилиэктэригэр, Саха сирин үрдүнэн туох баар тэрилтэ, түмсүү ыһыах ыһарыгар төһөлөөх үп наадатын уонна бэйэҥ ааҕан көрүҥ…

Путин корпоративтары бэйэҕит суоккутугар төһө баҕарар ыытыҥ диэбит тылын дорҕооно биһиэхэ арай сыһыана суох курдук.

 

Оттон көннөрү дьон ити 206 мөлүйүөнү өссө туохха туттуохха сөп этэй диэн куолулууллар…

Ити харчыга куорат эргэ, самнархай дьиэлэрин көтүрүөххэ сөбө.

Ити харчыны куорат кытыытыгар аата эрэ дьиэлэргэ симиллэн олорор дьадаҥы араҥаҕа биэриэххэ сөбө.

Ити харчыны суол оҥоруутугар туттуохха сөбө.

Ити харчыны онкологическай киин бырайыагын оҥорорго уонна акылаатын түһэрэргэ ыытыахха сөбө.

Ити харчыттан саатар 300-500 тыһыынчаны тыа сирин оҕуруот аһын үүннэрээччилэригэр биэриэххэ сөбө.

Ити харчыны тыа сиригэр общественнай транспорт сайдыытыгар, оҕуруот аһын харайар сирдэри тутууга аныахха сөбө.

Ити харчыны улуус балыыһаларыгар саҥа медицинскэй тэриллэри ылыыга утаарыахха сөбө.

Ити харчыны ыараханнык ыалдьар оҕолор атын сиргэ эмтэнэ баралларыгар аныахха сөбө.

Ити харчыны ыччат тыаҕа үлэлээх буоларыгар туттуохха сөбө.

Ити харчыны тыаҕа баар эдэр ыаллар дьиэ тутталларыгар туһаайыахха сөбө.

Ити харчыны кыһыҥҥы теплицалары оҥорууга биэриэххэ сөбө.

Ити харчыны дьиэтэ-уота суох, ускул-тэскил сылдьар дьоннору киһититэргэ туһаныахха сөбө.

Ити харчынан Өлүөнэни туоруурга саҥа паром уонна дебаркадер атыылаһыахха сөбө.

Ити харчынан куоракка крематорий биитэр бөҕү туһаҕа таһаарар собуоту туттарыахха сөбө.

Ити харчыттан туһанан, киин куоракка общественнай тукалеттары туттарыахха сөбө.

Ити харчыга куоракка ууну ыраастыыр собуоту аһыахха сөбө.

Оттон биир киһи букатын да ити харчыны билиҥҥи Ил Дархан быыбарын хаттаан ыытарга аныахха баар этэ диэн саайбыт… (http://forum.ykt.ru/viewtopic.jsp?id=3694349)

 

20 июня, 2015 Главные новости

Добавить комментарий

*