ЫМЫЫ: Сайын кэлиитэ

20 января, 2014 в 2:45

 

Тµµл дуу, илэ дуу?   

 

Түннүгүнэн ый уота тыгара

Түлүк-бараан уубун аймыы.

Түүҥҥү хараҥа муннуктан үөмэрэ

Түүлээх илиитинэн саба харбыахтыы.

Түбүктээх үлэбин бүтэрэн,

Түүрүллэн ороммор сыппытым.

Түҥнэри-таҥнары эргийэн,

Түлэкэдийэн барбытым…

 

Түүл эбитэ дуу… илэ эбитэ дуу…

Түргэн айаннаах туйах тыаһа,

Түптэ түлүөн түһэрэн

Түннүгүм анныгар кэлбитэ…Луна

 

Тµллэх гыммыт үрүҥ күдэрик

Түллэн аанынан киирбитэ,

Түгэх тиийэн иҥнэ түһээт

Түөрэ эргийэн сүппүтэ,

Түүнүк сытынан тунуйан

Түүлээх арбаҕас устубута,

Түнэ этэрбэс сырдырҕаан

Түөрэҥэлээн кэлбитэ,

Түрдэстигэс сүүс анныттан

«Түөллүгэн» харах көрбүтэ,

Түүтэх курдук барыйбыт күлүк

 Түөһүллэн олорбута.

Түһэҕиттэн тайанан

Түөһэ эппэҥнээн ылбыта,

Түһүмэх,түһүмэх түһэрэн

Түс-бас саҥалаах буолбута:

         Түҥкэтэх дойдубун илдьи кэһэн,

Түптээх уубун аймаатыгыт!

Түөлбэ сирбэр түөн ууран,

Түтүм үөһэ түһэрдигит!

Түөкэй омугу буулатаҥҥыт

Түрбүөн бөҕөнү тартыгыт!

Түһээн, кутуу үрдэтэҥҥит,

Түптүр-күтүр дэлэттигит…

 

Түксү, түксү, сөп буолуо,

Түҥүр, хотоҕой мустаҥҥыт,

Түөрэххитин кэбиһиҥ!

Түһүлгэни тэнитэҥҥит,

Түптэ буруотун унаардыҥ!

Түүйэ-биттэнэ барбакка

Түскүтүн түмэн кэбиһиҥ!

Түҥнэри төлкөнү көннөрөн

Түмсэн бары холбоһуҥ!

Түгэн түргэн,ааһан иһиэ

Түөлбэҕитин чэлгитиҥ!

Түспэдийиҥ, өйдөнүҥ,

Түстээҥ Сахам саргытын!..

 

………………….

 

Түөһүм иһэ хам тутан

Түҥ-таҥ тэбиэлээн ылбыта…

Түүл дуу… илэ эбитэ дуу?

Түүл дуу эбэтэр илэ дуу?

Түргэнник ойон тураммын

Түүлбүн арыйан көрбүтүм

Түспүт кыраһа кылбайара

Түөрт эҥээри ый сырдатара…

Түүнүк сыта тунуйбут хоспор,

Түүҥҥү хараҥа үөмэрэ…

 

 

Сайын кэлиитэ

 

Күһүҥҥүттэн ыла

Күлэрин көрдөрбөккө,

Күрэммит үрүҥ күн

Күндээрэн тахсан,

Күн сирин үрдүн

Күлүмүрдэппитинэн барда.Сардана на фоне реки

 

Ааспыт кыһын тухары

Арахпыт күн

Арылыйан тахсан,

Аан ийэ дойдуну

Аламай сырдыгынан

Айхаллаабытынан барда.

 

Илин диэкиттэн

Иҥиэттибит хара былыт,

Иҥнэһийэн тахсан,

Илгэлээх ардаҕы

Ибиирдэ барбакка

Иҥнэри кутта.

 

Хоту диэкиттэн

Халҕаһа былыт

Халыһыйан тахсан,

Хаппыт сир үрдүн

Харыстыы барбакка

Халыччы түстэ.

 

Инньэ гынаатын…

Көтөҕөнөн бүрүллүбүт

Көҥкөлөй хара тыа

Көрдөрбүтүнэн туран,

Көҕөрөкөҕөрө

Көтөҕүллүбүтүнэн барда.

 

Аҥаарыйа иһийбит

Атарахсыйбыт алаас

Алларыйбыт арҕаһа

Ача,кырыс тардан,

Амтаннаах быйаҥынан

Арыллыбытынан барда.

 

Дьэргэлгэн кустук

Дьэндэйэр халлааҥҥа

Дьэргэйэн тахсан,

Дьэрэкээн өҥүнэн

Дьирбии кур буолан

Дьирибинии турда.

 

Өҥ бөҕөтөөрө аста,

Күөх бөҕөтө күөгэччи үүннэ.

Сибэкки арааһа

Ситэри ситтэ.

Көтөр бииһэ

Көччүйэ көттө

 

Сайаҕас бэйэлээх

Сайыммыт кэллэ.

 

 

 

Мин дойдум ураты к³стµµтэ

 

Ма²ан хаар

 

Дорообо, саҥа хаар, дорообо!

Дойдубут ураты көстүүтэ.

Кылбаарар, кыыскэрэ айылҕам

Кылбайар сып-сырдык урсуна.Хаар

 

Дьиэрэҥкэй үҥкүүлүүр маҥан хаар

Дьиримнии ыһыллар кыырпаҕа

Дьиктини ырааһы түстүүгүн

Дьиҥ-чахчы сахалыы ырыаҕын.

 

Долгуйар ыраас хаар кыыдамын

Долгуйа күүтэбин сыл ахсын.

Доҕорбун көрсүбүт кэриэтэ

Дьоллонон, сүрэхтиин үөрэбин.

 

 Мин тыыннаах тылларым

 

Холбоһуҥ, тылларым,

Хоболуу чугдаарыҥ,

Хоҥкунуу ыллааҥҥыт

Хомоҕой бэйэлээх

Хоһооммор тыллаарыҥ.

 

Холбоһуҥ, тылларым,

Хоһуйа ытыллыҥ

Холорук буолаҥҥыт

Хомуһун аптанан

Хоһооммор хонооруҥ.4.Хоьоон хоьо

 

Холбоһуҥ, тылларым

Хотоойу күүстэнэн —

Хотойдуу көтөҥҥүт

Хотторбот куттанан

Хоһооммун булаарыҥ.

 

Холбоһуҥ, тылларым

Холкутук, наҕыллык —

Хомуллан, мунньустан,

Хостонор баай буолан,

Хоһооммор кистэниҥ.

 

Ирина КОЛОДЕЗНИКОВА – ЫМЫЫ,Таатта

 

20 января, 2014 Без рубрики

Добавить комментарий

*