Үйэлээх малга махтал

13 июня, 2014 в 7:02

Атеизм ааҥнаан турдаҕына, таҥара баар диэн тылгыттан хаптарбаккын.

Атын сирдэргэ таҥара дьиэлэрин куупалларын килбиэнэ онон-манан син килбэйэр эбит буоллаҕына, биһиги диэки таҥара күлүгүн да булан көрбөккүн. Арай, устуоруйа учуобунньугар фрескалар бааллара быдан дьыллардааҕыны кэрэһилииллэрэ. «Огонек» сурунаалга хам-түм тахсара. Биирдэ, ону да хойут уларыйыы тыына биллэрин саҕана, Алла Пугачева хаартыската бэчээттэммитигэр аһаҕастык кириэс иилиммит этэ.

Таҥара ыраах, оттон саха сиэринэн ол-бу сибиэн, иччи туһунан кэпсэли син истиэ эбиппит буолуо да, мин эбэм абааһымсаҕа суоҕа. Аҥаар хараҕа уола оһон хаалбытын, кыратыгар холорук кэлэн түһэн сыыс киирбититтэн сылтаан диирэ. Абааһы диэн амырыын куһаҕан сыттаах диэн, таах да биирдэ быктарбыттааҕа. Хараҕар сыыс киирэригэр абааһы сыһыаннааҕын курдук өйдөөбүтүм.

Бүтэр уһук диэн баарын туһунан хайа эрэ кэмҥэ диэри оройдоппокко сылдьыллыбыта. Туох эрэ кэпсэли истэн баран, эбэбиттэн киһи өлбүтүн кэннэ туох буоларын туһунан туоһуластым. «Бу буспут эти көрөҕүн дии, ол курдук киһи эмиэ тугу да билбэт куҥ буолар», — диэн соһуттаҕа үһү. Онтон ыла уйабар уу киирбитэ. Киһи аймах баарын устата үүйэ-хаайа тутар ыйытык миигин буулаабыта. Философия кинигэлэригэр суруллар суоллары быһаара сатаан өйбүн сыһар буолбутум. Ити – букатын кырабар. Ыылаах ыйытыктар оҕо сааспар курус тыыны сыбаабыттара. Онтон атын кыһалҕа диэн суоҕа.

Биир кэлии эмээхсин кириэс ойуулаах кулону тоҕо эрэ биэрбитэ. Туох эрэ таастартан таҥыллан оҥоһуллубут этэ. Кэтэ сылдьар кыаҕыҥ суох, иилиллэр сирэ алдьаммыт. Ол уонна өссө туох эрэ баара быһыылааҕа. Куокунуга дьүөгэлэспит Егорова Луиза диэн улахан кыыһым биһиэхэ хонон сытан ол кириэһи сөҕө көрбүтүн туһунан кэлин ахтар этэ.

Тохтоон хаалбыт курдук кэм. Аан дойдуттан арыыламмыт курдукпут. Араадьыйа эрэ айдаарар, күннэтэ наар үчүгэй кэпсэли ыаһах гынар. Арай, улахан радиоланан аҕам туора долгуну хаптаҕына атын соҕус сонуннары сомсуохха сөбө. Ол радиоланы араас долгуҥҥа туһаайан атын саҥаны, омуктуу ырыаны истэрбит. Биитэр «Вокруг света» сурунаал хартыыҥкаларынан сирдэтэн, аан дойду киэҥин, киһи ааҕан сиппэт атына баарын билэрбит.

Радиола аҥаар өттүгэр пластинканы эргитэн ыллатаҕын. Сэбиэскэй кэмҥэ тэнийбит ырыа үксэ баара. Онно сөп буолбакка сымнаҕас күөх пластинка киллэһиктээх сурунааллары сурутарбыт. Биирдэ оннук кыра пластинкаҕа аҕабын эҕэрдэлээн сакаастаабыппар, нууччалыы мин аҕабар анаан саҥарбыттар этэ. Онтон кини номох гынан кэпсиир ырыаһыта Мария Биешу ырыата суруллубут этэ.

Ол радиола быысапкалаах маҥан таҥас сабыылааҕа. Үрдүгэр кып-кыра от күөҕэ дьиҥнээх уулаах аквариум сувенир ууруллара. Маҥан таҥаһы маанылыыр үйэ этэ. Утуйар таҥас хаата барыта маҥан. Өрүү куруһуба киллэһиктээх маҥан сыттык хахтара билигин да бааллар. Атын да таҥаһы ийэм туох да иһин бырахпат. Мин кэмиттэн кэмигэр наадата суох малтан босхолонор ухханыгар ылларбатым буоллар, бары-барыта билиҥҥэ диэри баар буолуо этэ. Ол курдук үйэлээх тэрил, мал-сал, таҥас-сап эгэлгэтэ элбэҕэ.

Бырахпыт, суох гыммыт буруйбун боруостаан, үйэлээх малларга махталбын тылынан тистэҕим. Киһи диэн кэбирэх, оттон сорох мал үйэлээх. Билиҥҥи киһи өссө ордук кэбирэх, малбыт кытары биир-икки эрэ сыллаах. Хаһан эрэ радиола иһигэр хаайтарбыт, «Вокруг света» эрэ көмөтүнэн көрүнньүк буолар аан дойдубут арылыс гыммыта ыраатта. Ким ханна барара-кэлэрэ көҥүл. Аныгы тэрил сир дьонун биир иилээтэ эрээри биир тыыннабыта биллибэт. Сырыыбыт сыыдамырда, олохпут тэтимирдэ, кэм биллэ түргэтээтэ. Сайда сатаан самнарга тиийэрбит чугаһаата.

Көрдүүр таҥарам күлүгэ хас хардыы аайы хараҕы аалар. Итэҕэл онтон сылтаан күүһүрбүтэ көстүбэт. Киһи саллар суола үксээтэр үксүүр. Бу сиргэ бүтэһигин олорордуу олустуубут, ордук сананабыт. Ааспыттан атыннык олорорбутунан өҥнөрбүтүн ааһан, кэлэр кэмнэртэн кытары күрүөлэнэбит. Биһиги – бүтэһигин олоробут. Биһиги иннибитинээҕилэр да иккистээн кэлиэхпит диэн суоттамматахтара буолуо. Ол гынан баран үтүө ирээтин биһиэхэ өлүүлээбиттэр. Биһиги ол дьолтон тугу да ордорботубут. Ол дьол олохпут сарсыардатыгар эрэ баара дуу? Билигин да баарын өйдөөн көрбөппүт эбитэ дуу?

ЧЭГДЭ.

 

 

 

 

13 июня, 2014 Главные новости

Добавить комментарий

*