Facebook дуу, олох дуу?

23 апреля, 2014 в 23:52

Билигин соцсеть диэни билбэт, онно киирэн күнүн ыыппат киһи диэн суоҕун тэҥэ.

Орто саастаах үксэ Facebook ситимигэр киирэр. Бу ситим уратыта, абырала диэн кини аан дойду үрдүнэн биир санаалаах, биир үлүһүйүүлээх дьону түмэр. Ситимҥэ сир дьонун 10%-на олорор дииллэр.

Маҥнай сонуҥҥа барыта бэрт курдук. Ол гынан баран дьон аһаралыыр. Күнүн онно ыытар, илэ олохтооҕор интернет иһигэр тылынан оонньуурун ордорор.

Итиннэ олорорго туһунан быраабылалар бааллар эбит. Уон быраабыла.

 

Онлайн-уоран көрүүнэн үлүһүйүмэҥ

 

Бу ситим өссө биир уратыта – биллэр дьон тугунан олорорун, тугунан тыынарын, тугу бүгүн аһаабытын кытары билэргэ кыах биэрэр. Бэйэ санаатын кыттыһыннарымына эрэ наар оннук дьону чуҥнуурунан үлүһүйүү туох да үчүгэйи аҕалбат.

 

FOMO куттала, JOMO туһата

 

Ситимҥэ киирэ-тахса үөрүйэх дьон хас чаас аайы киирэн, ким тугу диэбитин, туох сонун баарын бэрэбиэркэлииллэр. Түүнүн ойон туран кытары көрөллөр. Ону FOMO дииллэр – мин суохпар туох эрэ уһулуччу буолбутун билиминэ хаалыам диэн куттаныы.

Онно JOMO диэни утары туруораллар – билбэт ордук диэн. Ситимҥэ биир күн саатар киирбэтиҥ эмп курдук буолар.

 

Facebook – атас-доҕор альтернативата

 

Биир кэм ким тугу диэбитин ааҕа оонньоон, илэ кимиэхэ эмит төлөпүөннүүр да солоҥ суох буолар. Илэ доҕордоһордооҕор Фейсбук нөҥүө билсэри ордорон бараллар. Киһи барыта табаарыс, атас, доҕор. Харчы көрдөөбөттөр, тыл тарҕаппаттар.

 

Доҕор ахсаана

 

Ким элбэх доҕордооҕунан куоталаһан бараҕын. Оттон учуонайдар этэллэринэн, социальнай ситимҥэ 148 доҕор сөп гынар. Онтон элбээтэ да, ким тугунан тыынарын кэтии сатаан букатын ити ситимҥэ олохсуйаргар тиийэҕин.

 

Анал таймер наадата

 

Аһара өр аараары гыннаххытына, анал таймер туруораргытыгар тиийэҕит. Google Chrome иһигэрTime Tracker баара туһалыа.

 

Facebook – мөккүөр түөлбэтэ

 

2009 сыллаахха кэтээн көрөн баран, Facebook – мөккүһэргэ табыгастаах сир диэн быһаарбыттара.

 

Анал настройкалар

 

Соцсеть – бэлэм досье. Ол эрээри анал настройкалар онтон хаххалыахтарын син. Холобур, AVG Privacyfix программа.

 

Facebook – олох тупсарыллыбыт куоппуйата

 

Facebook диэн олох тупсарыллыбыт куоппуйата диэн өйдүөххэ наада. Онно дьон бэйэлэрин туһунан информация үрүҥүн эрэ киллэрэллэр.

Өскөтүн марсианнар ити ситимҥэ киирэллэрэ буоллар, Сиргэ толору дьоллоох дьон олороллор эбит диэн түмүккэ кэлиэ этилэр.

 

Дьоллоох дьонтон ордумаары

 

Дьэ, ол толору дьоллоох «доҕотторгун» көрө-истэ сатаан баран, мин эрэ дьоло суох эбиппин диэн санааҕа кэлиэххин син.

Ол иһин ити ситимҥэ сөбүн көрөн киириэххэ наада, хас киһи киһиргиирин кырдьыктаныа суохтааххын.

 

Үлэ оннугар Facebook

 

Ситим сүрүн үлэттэн, үөрэхтэн, олохтон бэйэтиттэн эһигини ороон ылан бэйэтигэр сөрүүр. Үөрэтэн көрбүттэригэр, дьон үлэлэригэр кэлэн баран баара эрэ алта мүнүүтэ үлэлээт, интернет иһигэр киирэн аан дойдуну умнар эбит.

 

Facebook дуу, олох дуу?

 

Баара үчүгэй, туһата буолунай. Ол эрээри туохха барытыгар буоларын курдук, сөбүн көрөн ити ситиминэн туһаныахха наада.

Олох – уларыйбат улуу кэриҥ. Facebook диэн көннөрү программа, приложение эрэ буоларын умнумаҥ.

 

Мария ФЕДОРОВА

23 апреля, 2014 Главные новости

Добавить комментарий

*